حضرت علی رضی اللہ عنہ بن ابی طالب فرماتے ہیں کہ تم میں سے کسی نے اگر کسی مہینے کے کچھ دنوں میں نفلی روزہ رکھنا ہو تو وہ جمعرات کو روزہ رکھے، جمعہ کو روزہ نہ رکھے کیونکہ جمعہ کا دن کھانے، پینے اور ذکر کا دن ہے۔ اس طرح اللہ تعالیٰ اس کے لئے دو نیک دن جمع فرما دیتے ہیں ایک اس کے روزہ کا دن اور دوسرا مسلمانوں کے ساتھ اس کی عبادت کا دن۔ [مصنف ابن ابي شيبه/كتاب الصيام/حدیث: 9491]

حضرت قیس بن سکن فرماتے ہیں کہ حضرت عبد اللہ کے کچھ شاگرد جمعہ کے دن حضرت ابو ذر کی خدمت میں حاضر ہوئے، ان سب کا روزہ تھا۔ حضرت ابو ذر نے ان سے فرمایا کہ میں تمہیں قسم دیتا ہوں کہ تم روزہ توڑ دو، کیونکہ یہ جمعہ کا دن دراصل عید کا دن ہے۔ [مصنف ابن ابي شيبه/كتاب الصيام/حدیث: 9492]

حضرت علی رضی اللہ عنہ فرماتے ہیں کہ جمعہ کے دن کا خاص عزم کرکے اس دن روزہ نہ رکھو۔ [مصنف ابن ابي شيبه/كتاب الصيام/حدیث: 9493]

حضرت ابوہریرہ فرماتے ہیں کہ تم میں سے کوئی شخص جمعہ کے دن روزہ صرف اس صورت میں رکھے کہ ایک دن پہلے یا ایک دن بعد میں بھی روزہ رکھے۔ [مصنف ابن ابي شيبه/كتاب الصيام/حدیث: 9494]

حضرت شعبی نے صرف جمعہ کے دن کو خاص کرتے ہوئے اس دن روزہ رکھنے کو مکروہ قرار دیا ہے۔ [مصنف ابن ابي شيبه/كتاب الصيام/حدیث: 9495]

حضرت ابراہیم فرماتے ہیں کہ اسلاف نے جمعہ کے دن روزہ رکھنے کو مکروہ قرار دیا ہے تاکہ جمعہ کی نمازبھر پور قوت کے ساتھ ادا کی جاسکے۔ [مصنف ابن ابي شيبه/كتاب الصيام/حدیث: 9496]

حضرت ابو ایوب عتکی حضرت جویریہ رضی اللہ عنہا سے روایت کرتے ہیں کہ ایک مرتبہ نبی کریم صلی اللہ علیہ وآلہ وسلم جمعہ کے دن ان کے پاس تشریف لائے۔ ان کا روزہ تھا۔ نبی کریم صلی اللہ علیہ وآلہ وسلم نے ان سے پوچھا کہ کیا کل تمہارا روزہ تھا؟ انہوں نے کہا نہیں۔ آپ نے پوچھا کہ کیا آئندہ کل روزہ رکھنے کا ارادہ ہے؟ انہوں نے کہا نہیں حضور صلی اللہ علیہ وآلہ وسلم نے فرمایا کہ پھر روزہ توڑ دو۔ [مصنف ابن ابي شيبه/كتاب الصيام/حدیث: 9497]

حضرت زیاد حارثی فرماتے ہیں کہ ایک مرتبہ ایک آدمی نے حضرت ابوہریرہ سے کہا کہ کیا آپ ہیں جو جمعہ کے دن روزہ رکھنے سے منع کرتے ہیں؟ حضرت ابوہریرہ نے فرمایا کہ اس حرمت کے رب کی قسم یا اس عمارت یعنی خانہ کعبہ کے رب کی قسم! میں نے اس سے منع نہیں کیا بلکہ محمد (صلی اللہ علیہ وآلہ وسلم) نے اس سے منع کیا ہے۔ [مصنف ابن ابي شيبه/كتاب الصيام/حدیث: 9498]

حضرت عمران بن حصین فرماتے ہیں کہ رمضان کے علاوہ کوئی ایسا دن مقرر نہ کرو جس دن روزہ رکھنا ضروری سمجھو۔ [مصنف ابن ابي شيبه/كتاب الصيام/حدیث: 9499]

حضرت ابن عباس رضی اللہ عنہما کسی دن کو کوئی خصوصی امتیاز دینے، یا مخصوص دنوں میں روزہ رکھنے یا مخصوص مہینوں میں اس طرح روزہ رکھنے سے منع فرماتے تھے کہ اسے کبھی نہ چھوڑا جائے۔ [مصنف ابن ابي شيبه/كتاب الصيام/حدیث: 9500]