حضرت رافع بن خدیج سے مروی ہے وہ فرماتے ہیں کہ میں نے حضور صلی اللہ علیہ وآلہ وسلم کو فرماتے ہوئے سنا: حق کے ساتھ صدقہ وصول کرنے والا عامل (زکوٰۃ و صدقات وصول کرنے والا) اللہ کی راہ میں جہاد کرنے والے غازی کی طرح ہے یہاں تک کہ وہ واپس گھر لوٹ آئے۔ [مصنف ابن ابي شيبه/كتاب الزكاة/حدیث: 11024]

حضرت ابو موسیٰ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: بیشک امانت دار خازن جس کو جس چیز کے دینے کا حکم ہو وہ اس چیز کو مکمل، وافر اور طیب خاطر سے اس شخص کو دے دے کہ جس کو دینے کا اس کو حکم ملا ہے، تو وہ دو صدقہ کرنے والوں میں سے ایک ہے۔ [مصنف ابن ابي شيبه/كتاب الزكاة/حدیث: 11025]

حضرت حسن بن مسلم المکی فرماتے ہیں کہ حضرت عمر فاروق نے بنو ثقیف میں سے ایک شخص کو صدقات (وصول کرنے کیلئے) بھیجا، پھر اس کے بعد آپ نے اس کو دیکھا تو اس سے فرمایا: کیا تو نہیں دیکھتا کہ تیرے لیے بھی اللہ کی راہ میں (جہاد کرنے والے) غازی کی مثل اجر ہے۔ [مصنف ابن ابي شيبه/كتاب الزكاة/حدیث: 11026]

حضرت حسن فرماتے ہیں کہ جس شخص کو صدقہ دیا گیا پھر اس نے اس کو، اس کی جگہ پر رکھ دیا تو اس کے لئے بھی اس کے مالک جتنا اجر ہے۔ [مصنف ابن ابي شيبه/كتاب الزكاة/حدیث: 11027]

حضرت عمرو بن میمون سے مروی ہے کہ حضرت عمر بن خطاب نے عراق والوں پر ہر جریب (زمین) پر ایک قفیز اور درہم مقرر فرمایا تھا۔ [مصنف ابن ابي شيبه/كتاب الزكاة/حدیث: 11028]

حضرت ابو مجلز سے مروی ہے کہ حضرت عمر بن خطاب نے کھجوروں کے باغات کے جریب پر آٹھ درہم مقرر فرمائے تھے۔ [مصنف ابن ابي شيبه/كتاب الزكاة/حدیث: 11029]

حضرت ابو عون محمد بن عبید اللہ الثقفی سے مروی ہے کہ حضرت عمر بن خطاب نے عراق والوں پر جریب زمین پر جس کو پانی پہنچتا ہو خواہ وہ زمین آباد ہو یا غیر آباد ایک درہم اور طعام میں سے ایک قفیز مقرر فرمایا، اور باغات والوں پر ہر جریب زمین پر دس درہم اور دس قفیز کھانے میں سے، اور انگور والوں پر ہر جریب زمین پر دس درہم اور دس قفیز کھانے میں سے، اور ترکاریوں (سبز فصلوں) میں ہر جریب زمین پر پانچ درہم اور پانچ قفیز کھانے میں سے مقرر فرمایا۔ اور کھجور کے درختوں پر کچھ مقرر نہیں فرمایا بلکہ ان کو زمین کے تابع کردیا، اور مردوں میں مالداروں پر اڑتالیس درہم خراج، درمیانے درجے کے لوگوں پر چوبیس درہم اور فقیروں پر بارہ درہم خراج مقرر فرمایا۔ [مصنف ابن ابي شيبه/كتاب الزكاة/حدیث: 11030]

حضرت محمد بن عبید اللہ سے مروی ہے کہ حضرت عمر فاروق نے عراق والوں پر مقرر فرمایا پھر ابن مسہر کی حدیث کے مثل ذکر فرمایا۔ [مصنف ابن ابي شيبه/كتاب الزكاة/حدیث: 11031]

حضرت ابو مجلز سے مروی ہے کہ حضرت عمر نے حضرت عثمان بن حنیف کو زمین کے رقبہ کی پیمائش کے لئے بھیجا۔ حضرت عثمان بن حنیف نے انگوروں والی زمین کے ہر جریب پر دس درہم مقرر فرمائے اور کھجور والی زمین کے جریب پر آٹھ درہم مقرر فرمائے اور جو والی زمین کے جریب پر دو درہم مقرر فرمائے اور ہر شخص پر سال میں چوبیس درہم خراج مقرر فرمایا اور عورتوں اور بچوں سے خراج کو معطل کردیا۔ [مصنف ابن ابي شيبه/كتاب الزكاة/حدیث: 11032]

حضرت حکم سے مروی ہے کہ حضرت عمر نے حضرت عثمان بن حنیف کو عراق بھیجا تو انہوں نے ہر وہ زمین جہاں پانی پہنچتا ہو خواہ آباد ہو یا غیر آباد اس کے ہر جریب پر ایک درہم اور ایک قفیز یعنی گندم اور جو مقرر فرمایا اور انگور والی زمین کے جریب پر دس درہم اور ترکاری (سبز فصل) کے جریب پر پانچ درہم مقرر فرمائے۔ [مصنف ابن ابي شيبه/كتاب الزكاة/حدیث: 11033]