حضرت فاطمہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: زکوٰۃ سال میں دو بار ادا کرنا نہیں ہے۔ [مصنف ابن ابي شيبه/كتاب الزكاة/حدیث: 11044]

حضرت ابو جعفر فرماتے ہیں کہ بنو ہاشم میں سے بعض کے بعض کو زکوٰۃ دینے میں کوئی حرج نہیں۔ [مصنف ابن ابي شيبه/كتاب الزكاة/حدیث: 11045]

ابراہیم فرماتے ہیں کہ کہا جاتا تھا کہ زکوٰۃ صرف فقراء اور مہاجرین کیلئے ہے۔ [مصنف ابن ابي شيبه/كتاب الزكاة/حدیث: 11046]

حضرت بکر فرماتے ہیں کہ حضرت عثمان حمل کی طرف سے بھی صدقہ الفطر ادا فرماتے تھے۔ [مصنف ابن ابي شيبه/كتاب الزكاة/حدیث: 11047]

حضرت ابو قلابہ سے مروی ہے کہ صحابہ کرام صدقہ ادا فرماتے تھے اور حمل کی جانب سے بھی صدقہ الفطر ادا فرماتے۔ [مصنف ابن ابي شيبه/كتاب الزكاة/حدیث: 11048]

حضرت ابراہیم فرماتے ہیں کہ اگر زکوٰۃ وصول کرنے والا مقررہ جانور سے بڑا کوئی جانور لے لے تو وہ دو بکریاں یا بیس درہم واپس کرے گا۔ اور اگر وہ مقررہ جانور سے کم عمر کا جانور وصول کرے تو زکوٰۃ دینے والے دو بکریاں یا بیس درہم مزید ادا کریں گے۔ [مصنف ابن ابي شيبه/كتاب الزكاة/حدیث: 11049]

حضرت عمرو بن شعیب فرماتے ہیں کہ اگر مقررہ جانور سے کم عمر کا جانور نہ ملے تو زیادہ عمر والا جانور وصول کرے اور جانوروں کے مالک کو دو بکریاں یا بیس درہم واپس کر دے۔ [مصنف ابن ابي شيبه/كتاب الزكاة/حدیث: 11050]

حضرت عبداللہ بن عبد الرحمن انصاری فرماتے ہیں کہ عمر بن عبدالعزیز نے اپنے گورنروں کو یہ خط لکھا کہ اگر کسی شخص کے اونٹوں میں وہ عمر کے جانور نہ ملیں جو زکوٰۃ میں اس پر فرض ہیں تو اس سے انہی (مقررہ عمر کے) جانوروں کے سوا کچھ وصول نہ کیا جائے، بلکہ اس کے اونٹوں کی مثل یا منصفانہ قیمت وصول کرلی جائے۔ [مصنف ابن ابي شيبه/كتاب الزكاة/حدیث: 11051]

حضرت حماد فرماتے ہیں اس شخص کے بارے میں کہ جس کے مال پر زکوٰۃ جو واجب ہوئی ہے وہ اس کے پاس نہیں ہے تو دونوں آپس میں زیادتی کو لوٹا لیں گے۔ (یعنی جو زائد لے گا وہ اس کے بدلہ میں کچھ واپس لوٹائے گا)۔ [مصنف ابن ابي شيبه/كتاب الزكاة/حدیث: 11052]

حضرت علی رضی اللہ عنہ فرماتے ہیں اگر زکوٰۃ وصول کرنے والا مقررہ عمر سے کم عمر کا جانور لے تو (فرق کے طور پر) دو بکریاں یا دس درہم لوٹائے جائیں گے۔ [مصنف ابن ابي شيبه/كتاب الزكاة/حدیث: 11053]