حضرت ابو العالیہ فرماتے ہیں کہ اللہ تعالیٰ نے جو مصارف بیان فرمائے ہیں ان میں سے کسی ایک کو دے دینے میں کوئی حرج نہیں ہے۔ [مصنف ابن ابي شيبه/كتاب الزكاة/حدیث: 10744]

حضرت حجاج فرماتے ہیں کہ میں نے حضرت عطاء سے دریافت کیا کہ آٹھ مصارف میں سے کسی ایک مصرف کو ہی زکوٰۃ دے سکتے ہیں؟ آپ نے فرمایا جی ہاں۔ [مصنف ابن ابي شيبه/كتاب الزكاة/حدیث: 10745]

حضرت حسن فرماتے ہیں کہ آٹھ مصارف میں سے کسی ایک مصرف کو زکوٰۃ دینے میں کوئی حرج نہیں ہے۔ [مصنف ابن ابي شيبه/كتاب الزكاة/حدیث: 10746]

حضرت ابراہیم فرماتے ہیں کہ اللہ تعالیٰ نے جو مصارف مقرر فرمائے ہیں ان میں سے کسی ایک کو دینے میں کوئی حرج نہیں ہے۔ [مصنف ابن ابي شيبه/كتاب الزكاة/حدیث: 10747]

حضرت عکرمہ فرماتے ہیں کہ زکوٰۃ تمام مصارف میں تقسیم کرو۔ [مصنف ابن ابي شيبه/كتاب الزكاة/حدیث: 10748]

اور حسن فرماتے ہیں کہ ان میں سے جس مصرف کو بھی دے دو، تمہارے لیے کافی ہے۔ (سب کو دینا ضروری نہیں ہے)۔ [مصنف ابن ابي شيبه/كتاب الزكاة/حدیث: 10749]

حضرت جعفر فرماتے ہیں کہ میں نے حضرت میمون سے سنا وہ فرماتے ہیں کہ اگر میں دو مصارف فقراء اور مساکین کو زکوٰۃ ادا کر دوں تو میں دیکھتا ہوں کہ یہ میری طرف سے کافی ہے۔ [مصنف ابن ابي شيبه/كتاب الزكاة/حدیث: 10750]

حضرت ابو عمرو بن حماس فرماتے ہیں کہ میرے والد حضرت حماس چمڑے اور تیروں کے تھیلوں کی بیع کرتے تھے۔ ایک مرتبہ حضرت عمر نے ان سے فرمایا: اے حماس اپنے مال کی زکوٰۃ ادا کرو۔ انہوں نے عرض کیا خدا کی قسم میرے پاس تو کوئی مال نہیں ہے۔ میں تو چمڑا اور تیروں کا ترکش بیچتا ہوں۔ آپ نے فرمایا ان کی قیمت لگاؤ اور اس پر زکوٰۃ ادا کرو۔ [مصنف ابن ابي شيبه/كتاب الزكاة/حدیث: 10751]

حضرت ابو عمرو بن حماس سے مروی ہے کہ میرے والد حضرت حماس چمڑا اور ترکش بیچا کرتے تھے۔ باقی حدیث اسی طرح منقول ہے۔ [مصنف ابن ابي شيبه/كتاب الزكاة/حدیث: 10752]

یونس فرماتے ہیں کہ حسن سے دریافت کیا گیا کہ ایک شخص نے سامان خریدا پھر اس پر زکوٰۃ واجب ہوگئی (تو وہ کیا کرے)؟ آپ نے فرمایا جس دن اس پر زکوٰۃ واجب ہوئی اس دن کی قیمت کے حساب سے اس کی زکوٰۃ ادا کرے گا۔ [مصنف ابن ابي شيبه/كتاب الزكاة/حدیث: 10753]