حضرت عبد اللہ بن عمر رضی اللہ عنہما فرماتے ہیں کہ سامان پر زکوٰۃ تب تک نہیں ہے جب تک کہ وہ سامان تجارت کے لیے نہ ہو۔ [مصنف ابن ابي شيبه/كتاب الزكاة/حدیث: 10754]

حضرت ابن سیرین ارشاد فرماتے ہیں کہ سامان کی قیمت لگائی جائے گی پھر اس پر زکوٰۃ ادا کی جائے گی۔ [مصنف ابن ابي شيبه/كتاب الزكاة/حدیث: 10755]

حضرت عبد الملک فرماتے ہیں کہ حضرت عطاء سے دریافت کیا گیا کہ ایک شخص نے سامان خریدا پھر وہ سامان کئی سال تک اس کے پاس رہا کیا اس پر زکوٰۃ ہے؟ آپ نے فرمایا کہ نہیں۔ [مصنف ابن ابي شيبه/كتاب الزكاة/حدیث: 10756]

ابراہیم فرماتے ہیں کہ ہر وہ چیز جو تجارت کیلئے ہو اس پر زکوٰۃ ہے خواہ وہ کچی اینٹیں ہوں یا مٹی ہو۔ [مصنف ابن ابي شيبه/كتاب الزكاة/حدیث: 10757]

راوی فرماتے ہیں کہ حضرت حکم کی بھی یہی رائے تھی۔ [مصنف ابن ابي شيبه/كتاب الزكاة/حدیث: 10758]

حضرت قاسم سے مروی ہے کہ حضرت صدیق اکبر جب بیت المال سے کسی کو وظیفہ دیتے تو اس سے دریافت فرماتے کہ کیا تیرے پاس مال موجود ہے؟ اگر اس کا جواب ہاں میں ہوتا تو آپ اس کے وظیفہ کے مال میں سے زکوٰۃ نکال لیتے وگرنہ اسکے سپرد کردیتے۔ [مصنف ابن ابي شيبه/كتاب الزكاة/حدیث: 10759]

حضرت عبد اللہ فرماتے ہیں کہ وہ ہمیں عطاء (وظیفہ) ٹوکریوں میں دیتے تھے اور اس میں سے زکوٰۃ نکال لیتے تھے۔ [مصنف ابن ابي شيبه/كتاب الزكاة/حدیث: 10760]

حضرت ہبیرہ سے مروی ہے کہ حضرت عبد اللہ بن مسعود رضی اللہ عنہ وظائف پر زکوٰۃ ادا فرماتے وہ ہر ہزار پر پچیس ہوتی تھی۔ [مصنف ابن ابي شيبه/كتاب الزكاة/حدیث: 10761]

حضرت حمید بن عبد الرحمن سے مروی ہے کہ حضرت عبد الرحمن بن عبد القاری حضرت عبد اللہ بن ارقم کے ساتھ حضرت عمر فاروق کے زمانے میں بیت المال پر (نگران) مقرر تھے۔ جب بیت المال سے وظائف نکالے جاتے تو حضرت عمر تاجروں کے مال کو جمع فرماتے پھر نقد اور ادھار کا حساب لگاتے اور پھر ہر حاضر و غائب سے زکوٰۃ وصول فرماتے۔ [مصنف ابن ابي شيبه/كتاب الزكاة/حدیث: 10762]

حضرت قاسم سے مروی ہے کہ حضرت ابوبکر صدیق جب کسی شخص کو وظیفہ عطا فرماتے تو اس سے دریافت فرماتے۔ باقی حدیث اسی طرح بیان فرمائی۔ [مصنف ابن ابي شيبه/كتاب الزكاة/حدیث: 10763]