حضرت طاؤس فرماتے ہیں کہ جب دو شریک اپنے اپنے مالوں میں کام کرتے ہوں تو زکوٰۃ میں ان کے مال کو جمع نہیں کیا جائے گا۔ [مصنف ابن ابي شيبه/كتاب الزكاة/حدیث: 10794]

حضرت ابن جریج فرماتے ہیں کہ میں نے عطاء کو طاؤس کے قول کی خبر دی تو انہوں نے فرمایا کہ میں بھی اسی کو صحیح سمجھتا ہوں۔ [مصنف ابن ابي شيبه/كتاب الزكاة/حدیث: 10795]

حضرت امام زہری فرماتے ہیں کہ جب ایک شخص کے پاس بیس بکریاں ہوں اور دوسرے شخص کے پاس بھی بیس بکریاں ہوں اور دونوں شخصوں کا چرواہا بھی ایک ہو جو ان کو ساتھ لے کرجاتا ہو اور ایک ساتھ ہی واپس لے کر آتا ہو تو ان پر زکوٰۃ ہے۔ (دونوں کے مجموعے پر زکوٰۃ ہے)۔ [مصنف ابن ابي شيبه/كتاب الزكاة/حدیث: 10796]

حضرت سلمہ کے آزاد کردہ غلام حضرت یزید فرماتے ہیں کہ حضرت سلمہ رضی اللہ عنہ پر ان کے اونٹوں کی زکوٰۃ (خریدنے کے لیے) پیش کی جاتی تو آپ اس کو خریدنے سے انکار کردیتے تھے۔ [مصنف ابن ابي شيبه/كتاب الزكاة/حدیث: 10797]

حضرت ابن عمر رضی اللہ عنہما فرماتے ہیں کہ اپنے مال کی طہارت کو نہ خریدو۔ [مصنف ابن ابي شيبه/كتاب الزكاة/حدیث: 10798]

حضرت ابو زبیر فرماتے ہیں کہ میں حضرت جابر کو فرماتے ہوئے سنا کہ جب زکوٰۃ وصول کرنے والا آئے تو اس کو اپنی زکوٰۃ ادا کردو۔ اور اس سے نہ خریدو وہ لوگ کہتے ہیں کہ اس سے خرید لو۔ میں کہتا ہوں کہ بیشک وہ تو اب اللہ کا ہوگیا ہے۔ [مصنف ابن ابي شيبه/كتاب الزكاة/حدیث: 10799]

حضرت امام زہری سے ایک شخص نے دریافت کیا کہ کیا آدمی اپنی ادا شدہ زکوٰۃ کو خرید سکتا ہے؟ آپ نے فرمایا زکوٰۃ وصول کرنے والے سے نہیں خرید سکتا۔ یہاں تک کہ وہ چلا جائے۔ اور جانے کے بعد نہ خریدے یہاں تک وہ کثیر بکریوں میں مل جائے۔ [مصنف ابن ابي شيبه/كتاب الزكاة/حدیث: 10800]

حضرت عطاء سے مروی ہے کہ بیشک پہلے لوگ زکوٰۃ کے خریدنے کو ناپسند فرماتے تھے۔ حضرت عطاء فرماتے ہیں کہ اگر تم زکوٰۃ پر تم سے قبضہ کرلیے جانے کے بعد اسے خریدو تو پھر کوئی حرج نہیں۔ [مصنف ابن ابي شيبه/كتاب الزكاة/حدیث: 10801]

حضرت زید بن اسلم اپنے والد سے روایت کرتے ہیں کہ حضرت عمر نے گھوڑے کو اللہ کے راستے میں صدقہ کیا اور مجاہد کو سوار فرمایا یا کچھ کپڑے اللہ کی راہ میں صدقہ کیئے۔ بعد میں بازار میں ان کو دیکھا اور خود ہی دوبارہ خریدنے کا ارادہ فرمایا اور آنحضرت صلی اللہ علیہ وآلہ وسلم سے جا کر اس کے متعلق دریافت فرمایا: آپ صلی اللہ علیہ وآلہ وسلم نے فرمایا اسکو چھوڑ دو تا کہ قیامت کے دن اس کا (پورا) بدلہ تجھے عطاء کیا جائے۔ [مصنف ابن ابي شيبه/كتاب الزكاة/حدیث: 10802]

حضرت زبیر بن عوام رضی اللہ عنہ فرماتے ہیں کہ ایک شخص نے اللہ کی راہ میں گھوڑا صدقہ کیا۔ اور پھر اس گھوڑے کی نسل کے کسی گھوڑے یا مہرے کو بازار میں فروخت ہوتے دیکھ کر خریدنے کا ارادہ کیا۔ تو اسے اس سے منع کردیا گیا۔ [مصنف ابن ابي شيبه/كتاب الزكاة/حدیث: 10803]