حضرت عائشہ رضی اللہ عنہا فرماتی ہیں کہ حضرت ابوبکر صدیق کا انتقال منگل کی رات کو ہوا، اور منگل کی رات میں ہی ان کو دفن کیا گیا۔ [مصنف ابن ابي شيبه/كتاب الجنائز/حدیث: 12371]

حضرت شعبی فرماتے ہیں کہ کہا جاتا تھا کہ اچانک آنے والی موت قیامت کے قریب ہونے (کی علامت) میں سے ہے۔ [مصنف ابن ابي شيبه/كتاب الجنائز/حدیث: 12372]

حضرت عبد اللہ فرماتے ہیں کہ اچانک اور غیر متوقع آنے والی موت مؤمن کیلئے راحت ہے اور کافر کیلئے سزا۔ [مصنف ابن ابي شيبه/كتاب الجنائز/حدیث: 12373]

حضرت تمیم بن سلمہ فرماتے ہیں کہ ہم میں سے ایک شخص اچانک فوت ہوگیا تو آنحضرت صلی اللہ علیہ وآلہ وسلم کے اصحاب میں سے ایک شخص نے کہا غصہ کی حالت میں اٹھایا گیا ہے، میں نے اس کا ذکر ابراہیم سے کیا اور بہت کم ایسا ہوتا تھا کہ ہم ابراہیم سے کوئی حدیث ذکر کرتے مگر ان کے پاس اس کو پالیتے، آپ نے فرمایا: وہ حضرات ناپسند کرتے تھے اچانک اٹھائے جانے کو (موت کو) جو غضب کی پکڑ کی طرح ہو۔ [مصنف ابن ابي شيبه/كتاب الجنائز/حدیث: 12374]

حضرت عبد اللہ اور حضرت عائشہ رضی اللہ عنہا فرماتے ہیں کہ اچانک آنے والی موت مؤمن کے لیے باعث راحت اور فاجر (گناہگار) کے لیے باعث حسرت و افسوس ہے۔ [مصنف ابن ابي شيبه/كتاب الجنائز/حدیث: 12375]

حضرت مجاہد فرماتے ہیں کہ اچانک آنے والی موت قیامت کی نشانیوں میں سے ہے۔ [مصنف ابن ابي شيبه/كتاب الجنائز/حدیث: 12376]

حضرت ابراہیم سے مروی ہے کہ وہ اچانک آنے والی موت کو ناپسند سمجھتے تھے۔ [مصنف ابن ابي شيبه/كتاب الجنائز/حدیث: 12377]

حضرت عبید بن خالد صحابہ میں سے کسی سے روایت کرتے ہیں کہ اچانک آنے والی موت غضب کی پکڑ ہے۔ [مصنف ابن ابي شيبه/كتاب الجنائز/حدیث: 12378]

حضرت عمارہ فرماتے ہیں کہ حضرت عبد اللہ کے اصحاب میں سے ایک شخص بیمار تھے لوگ ان کے پاس بیٹھے ہوئے تھے، ان کی پیشانی سے پسینہ بہہ رہا تھا، ایک شخص ان کی پیشانی سے پسینہ صاف کرنے لگا تو انہوں نے اس کے ہاتھ پر مارا۔ [مصنف ابن ابي شيبه/كتاب الجنائز/حدیث: 12379]

حضرت سفیان فرماتے ہیں کہ وہ حضرات میت (یعنی مرنے والے) کے لیے پسینہ آنے کو مستحب سمجھتے تھے۔ [مصنف ابن ابي شيبه/كتاب الجنائز/حدیث: 12380]