حضرت علقمہ اپنے ایک دوست کی عیادت کے لیے تشریف لے گئے جو قبیلہ نخع سے تھا، آپ نے اس کی پیشانی کو چھوا تو پسینہ نکل رہا تھا آپ یہ دیکھ کر ہنس پڑے، لوگوں میں سے بعض نے عرض کیا اے ابو شبل! آپ کو کس چیز نے ہنسایا۔ فرمایا: مجھ کو عبداللہ کی بات پر ہنسی آگئی کہ مؤمن کو (جان کنی کے وقت) پسینہ نکلتا ہے تو اس کے کچھ برے عمل ہوتے ہیں تو ان کی وجہ سے اس پر موت کے وقت کچھ سختی ہوتی ہے تا کہ ان برائیوں کا کفارہ بن جائے، اور کافر وفاجر کی روح اس کی باچھ سے گدھے کے سانس کی طرح نکلتی ہے، کیونکہ اس کے بھی کچھ اچھے اعمال ہوتے ہیں تو موت کے وقت اس پر آسانی ہوتی ہے تاکہ یہ آسانی ان نیکیوں کا بدلہ ہوجائیں۔ [مصنف ابن ابي شيبه/كتاب الجنائز/حدیث: 12381]

ابراہیم فرماتے ہیں کہ مقتول (شھید) سے پوستین، جرابیں، موزے اور افراہیج اتار دیئے جائیں گے، مگر یہ کہ جرابوں سے (کپڑوں کی) طاق تعداد مکمل ہوتی ہو تو وہ اس پر چھوڑ دی جائیں گی اور اسے کپڑوں کے ساتھ دفن کردیا جائے گا۔ [مصنف ابن ابي شيبه/كتاب الجنائز/حدیث: 12382]

حضرت مجاہد فرماتے ہیں کہ مقتول کو موزوں اور جوتوں کے ساتھ دفن نہیں کیا جائے گا۔ [مصنف ابن ابي شيبه/كتاب الجنائز/حدیث: 12383]

حضرت زید بن صوحان فرماتے ہیں: موزوں کے سوا میرا کوئی کپڑا نہ اتارنا۔ کیونکہ میں قیامت کے دن ان کے ذریعے اپنے حق کا دفاع کروں گا۔ [مصنف ابن ابي شيبه/كتاب الجنائز/حدیث: 12384]

حضرت عبد اللہ بن ابو قتادہ اپنے والد سے روایت کرتے ہیں کہ نبی اکرم (صلی اللہ علیہ وآلہ وسلم) کے پاس ایک جنازہ لایا گیا، کہ آپ صلی اللہ علیہ وآلہ وسلم اس کی نماز جنازہ ادا فرمائیں، آپ صلی اللہ علیہ وآلہ وسلم نے دریافت فرمایا: کیا اس کے ذمہ کسی کا قرض ہے؟ صحابہ کرام نے عرض کیا جی ہاں دو دینار ہیں، آپ صلی اللہ علیہ وآلہ وسلم نے فرمایا: اس نے اتنا مال چھوڑا ہے جس سے ادائیگی ہو سکے؟ عرض کیا کہ نہیں، آپ صلی اللہ علیہ وآلہ وسلم نے ارشاد فرمایا: تم لوگ اپنے ساتھی کی نماز جنازہ ادا کرو، حضرت ابو قتادہ فرماتے ہیں کہ میں نے عرض کیا اے اللہ کے رسول! وہ میرے ذمہ ہیں پھر حضور صلی اللہ علیہ وآلہ وسلم نے اس کی نماز جنازہ ادا فرمائی۔ [مصنف ابن ابي شيبه/كتاب الجنائز/حدیث: 12385]

حضرت ایاس بن سلمہ اپنے والد سے روایت کرتے ہیں کہ نبی کریم صلی اللہ علیہ وآلہ وسلم کے پاس ایک انصاری شخص کا جنازہ لایا گیا تاکہ آپ صلی اللہ علیہ وآلہ وسلم اس کی نماز جنازہ ادا کریں آپ صلی اللہ علیہ وآلہ وسلم نے فرمایا: کیا اس نے کچھ چھوڑا ہے؟ صحابہ نے عرض کیا نہیں، آپ صلی اللہ علیہ وآلہ وسلم نے فرمایا کیا اس کے ذمہ کسی کا قرض ہے؟ صحابہ نے عرض کیا جی ہاں۔ اس کے ذمہ دو دینار قرض ہیں آپ صلی اللہ علیہ وآلہ وسلم نے فرمایا تم اپنے ساتھی کا جنازہ خود ہی ادا کرو، حضرت ابو قتادہ نے عرض کیا: وہ میرے ذمہ ہیں اے اللہ کے رسول (صلی اللہ علیہ وآلہ وسلم)! پھر آنحضرت صلی اللہ علیہ وآلہ وسلم نے نماز جنازہ ادا فرمائی۔ [مصنف ابن ابي شيبه/كتاب الجنائز/حدیث: 12386]

راوی کہتے ہیں کہ مجھے حضرت ایاس نے بتلایا کہ رسول اللہ صلی اللہ علیہ وآلہ وسلم کی جب بھی حضرت ابو قتادہ رضی اللہ عنہ سے ملاقات ہوتی تو دریافت فرماتے: ان دو دیناروں کا کیا بنا؟ یہاں تک کہ انہوں نے وہ دینار ادا کردیے۔ [مصنف ابن ابي شيبه/كتاب الجنائز/حدیث: 12387]

حضرت جابر بن عبد اللہ رضی اللہ عنہ سے مروی ہے کہ ایک شخص کا انتقال ہوا تو ہم نبی کریم صلی اللہ علیہ وآلہ وسلم کی خدمت اقدس میں حاضر ہوئے تاکہ آپ صلی اللہ علیہ وآلہ وسلم اس کی نماز جنازہ ادا فرمائیں، پس آپ صلی اللہ علیہ وآلہ وسلم چلے، آپ صلی اللہ علیہ وآلہ وسلم نے دریافت فرمایا اس کے ذمہ قرض ہے؟ ہم نے عرض کیا جی ہاں اس کے ذمہ دو دینار ہیں۔ آپ صلی اللہ علیہ وآلہ وسلم نے ارشاد فرمایا: تم اپنے ساتھی کی نماز جنازہ خود ہی ادا کرو۔ [مصنف ابن ابي شيبه/كتاب الجنائز/حدیث: 12388]

حضرت محمد بن عبد اللہ بن جحش سے مروی ہے کہ ایک شخص نبی کریم صلی اللہ علیہ وآلہ وسلم کی خدمت میں حاضر ہوا اور عرض کیا: اے اللہ کے رسول (صلی اللہ علیہ وآلہ وسلم)! اگر میں اللہ کے راستہ میں اپنی جان قربان کر دوں۔ (تو کیا بدلہ ہے؟) آپ صلی اللہ علیہ وآلہ وسلم نے فرمایا جنت، پھر جب وہ پلٹا تو آپ صلی اللہ علیہ وآلہ وسلم نے فرمایا: سوائے قرض کے جو حضرت جبرئیل نے مجھے ابھی بتلایا ہے۔ [مصنف ابن ابي شيبه/كتاب الجنائز/حدیث: 12389]

حضرت عبد اللہ بن ابی قتادہ اپنے والد سے اسی طرح روایت کرتے ہیں مگر اس کے آخر میں ہے کہ مجھے حضرت جبرئیل نے بتلایا ہے۔ [مصنف ابن ابي شيبه/كتاب الجنائز/حدیث: 12390]