حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم کے پاس ایک انصاری شخص کا جنازہ لایا گیا، آپ صلی اللہ علیہ وآلہ وسلم نے اس کی نماز جنازہ ادا فرمائی پھر دریافت فرمایا: اس نے کیا چھوڑا ہے؟ صحابہ کرام نے عرض کیا: دو یا تین دینار چھوڑے ہیں، آپ صلی اللہ علیہ وآلہ وسلم نے فرمایا دو یا تین داغ چھوڑے ہیں۔ [مصنف ابن ابي شيبه/كتاب الجنائز/حدیث: 12391]

حضرت عبد الرحمن بن العدائ فرماتے ہیں کہ میں نے حضرت ابو امامہ سے سنا وہ رسول اکرم (صلی اللہ علیہ وآلہ وسلم) کی حدیث بیان کرتے ہیں کہ ایک شخص کا انتقال ہوا اس نے ایک یا دو دینار چھوڑے، نبی کریم صلی اللہ علیہ وآلہ وسلم نے ارشاد فرمایا: ایک داغ یا دو داغ چھوڑے ہیں۔ [مصنف ابن ابي شيبه/كتاب الجنائز/حدیث: 12392]

حضرت عبد اللہ فرماتے ہیں کہ نبی کریم صلی اللہ علیہ وآلہ وسلم سے ایک سیاہ فام غلام ملا پھر اس کا انتقال ہوگیا، نبی کریم صلی اللہ علیہ وآلہ وسلم کو اس کے بارے میں آگاہ کیا گیا، آپ صلی اللہ علیہ وآلہ وسلم نے فرمایا: دیکھو اس نے کچھ چھوڑا ہے؟ صحابہ کرام نے عرض کیا دو دینار چھوڑے ہیں۔ نبی کریم صلی اللہ علیہ وآلہ وسلم نے فرمایا یہ دو داغ ہیں۔ [مصنف ابن ابي شيبه/كتاب الجنائز/حدیث: 12393]

حضرت برید بن اصرم فرماتے ہیں کہ میں نے حضرت علی رضی اللہ عنہ کرم اللہ وجہہ سے سنا وہ فرماتے ہیں کہ اصحاب صفہ میں سے ایک شخص کا انتقال ہوا، صحابہ کرام نے عرض کیا اے اللہ کے رسول (صلی اللہ علیہ وآلہ وسلم)! اس نے ایک دینار یا ایک درھم چھوڑا ہے۔ آپ صلی اللہ علیہ وآلہ وسلم نے فرمایا: دو داغ ہیں، تم اپنے ساتھی کی نماز جنازہ اد کرلو۔ [مصنف ابن ابي شيبه/كتاب الجنائز/حدیث: 12394]

حضرت عائشہ رضی اللہ عنہا فرماتی ہیں کہ میرے پاس ایک یہودیہ خاتون آئی تو میں نے اسے خوشبو ھبہ کی، اس نے کہا اللہ تعالیٰ آپ کو عذاب قبر سے پناہ دے۔ حضرت عائشہ رضی اللہ عنہا فرماتی ہیں کہ میرے دل میں اس کے بارے میں خیال آیا، جب نبی کریم صلی اللہ علیہ وآلہ وسلم تشریف لائے تو میں نے نبی کریم صلی اللہ علیہ وآلہ وسلم کی خدمت میں عرض کیا اے اللہ کے رسول! کیا قبر میں عذاب ہے؟ آپ صلی اللہ علیہ وآلہ وسلم نے فرمایا: ہاں، بیشک وہ اپنی قبروں میں عذاب دیئے جاتے ہیں، جس کو بہائم سنتے ہیں۔ [مصنف ابن ابي شيبه/كتاب الجنائز/حدیث: 12395]

حضرت عائشہ رضی اللہ عنہا سے اسی کے مثل منقول ہے۔ [مصنف ابن ابي شيبه/كتاب الجنائز/حدیث: 12396]

حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: جہنم سے اللہ کی پناہ مانگو، عذاب قبر سے اللہ کی پناہ مانگو، مسیح دجال کے فتنہ سے اللہ کی پناہ مانگو، اللہ پاک سے زندگی اور موت کے فتنوں کی پناہ مانگو۔ [مصنف ابن ابي شيبه/كتاب الجنائز/حدیث: 12397]

حضرت زید بن ثابت سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: بیشک اس امت کو قبروں میں (عذاب میں) مبتلا کیا جائے گا، اگر تم لوگ مردہ کو دفن کرنا چھوڑ نہ دو تو میں اللہ پاک سے دعا کرتا کہ وہ تمہیں بھی عذاب قبر سنواتا جو میں سنتا ہوں، پھر ہماری طرف متوجہ ہوئے اور فرمایا: عذاب قبر سے اللہ کی پناہ مانگو، ہم نے عرض کیا ہم عذاب قبر سے اللہ کی پناہ مانگتے ہیں۔ [مصنف ابن ابي شيبه/كتاب الجنائز/حدیث: 12398]

حضرت عبد اللہ سے مروی ہے کہ حضرت ام حبیبہ نے یوں دعا مانگی، اے اللہ! مجھے میرے شوہر محمد (صلی اللہ علیہ وآلہ وسلم)، میرے والد ابو سفیان اور میرے بھائی معاویہ سے فائدہ پہنچا، نبی کریم صلی اللہ علیہ وآلہ وسلم نے ارشاد فرمایا: بیشک تو نے اللہ سے ان تقدیروں کے بارے میں جو طے ہوچکی اور ان دنوں کے جو گنے جا چکے اور اس رزق کا جو تقسیم ہوچکا ہے سوال کیا ہے، کوئی بھی چیز اپنے مقررہ وقت سے نہ پہلے ہوگی، نہ مؤخر ہوگی، اگر تو اللہ تعالیٰ سے عذاب جہنم سے نجات اور عذاب قبر سے نجات کا سوال کرتی تو وہ زیادہ بہتر اور افضل ہوتا۔ [مصنف ابن ابي شيبه/كتاب الجنائز/حدیث: 12399]

حضرت مسلم بن ابی بکرہ اپنے والد سے روایت کرتے ہیں کہ نبی کریم صلی اللہ علیہ وآلہ وسلم نماز کے بعد یوں دعا فرماتے: اے اللہ! میں کفر، فقر اور عذاب قبر سے پناہ مانگتا ہوں۔ [مصنف ابن ابي شيبه/كتاب الجنائز/حدیث: 12400]