حضرت عطاء فرماتے ہیں کہ میت کے مرنے کے بعد اس کی طرف سے غلام آزاد کرنے، حج کرنے اور صدقہ کرنے کا ثواب اسے ملتا ہے۔ [مصنف ابن ابي شيبه/كتاب الجنائز/حدیث: 12461]

حضرت ابن بریدہ اپنے والد سے روایت کرتے ہیں کہ میں نبی کریم صلی اللہ علیہ وآلہ وسلم کی خدمت میں بیٹھا ہوا تھا ایک عورت حاضر ہوئی اور عرض کیا: میری والدہ کے ذمہ دو مہینے کے روزے تھے کیا یہ کافی ہے کہ میں ان کی طرف سے روزے رکھ لوں؟ آپ صلی اللہ علیہ وآلہ وسلم نے فرمایا: ہاں اس نے عرض کیا: میری والدہ نے کبھی حج نہیں کیا تھا کیا کافی ہے (جائز ہے) کہ میں ان کی طرف سے حج کرلوں؟ آپ صلی اللہ علیہ وآلہ وسلم نے فرمایا: ہاں۔ [مصنف ابن ابي شيبه/كتاب الجنائز/حدیث: 12462]

حضرت ابو جعفر فرماتے ہیں کہ حضرات حسنین حضرت عیِ کی وفات کے بعد ان کی طرف سے غلام آزاد کرتے تھے۔ [مصنف ابن ابي شيبه/كتاب الجنائز/حدیث: 12463]

حضرت انس سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: حیقی صبر وہ ہے جو مصیبت کے آغاز پر کیا جائے۔ [مصنف ابن ابي شيبه/كتاب الجنائز/حدیث: 12464]

حضرت مجاہد فرماتے ہیں کہ کہا جاتا تھا: حقیقی صبر وہ ہے جو مصیبت کے آغاز پر ہو۔ [مصنف ابن ابي شيبه/كتاب الجنائز/حدیث: 12465]

حضرت ابو سلمہ الحمصی فرماتے ہیں کہ حقیقی صبر وہ ہے جو مصیبت کے آغاز پر کیا جائے۔ [مصنف ابن ابي شيبه/كتاب الجنائز/حدیث: 12466]

حضرت ثابت فرماتے ہیں کہ میں نے حضرت انس سے نبی کریم صلی اللہ علیہ وآلہ وسلم کا یہ ارشاد سنا صبر وہی ہے جو صدمہ کے آغاز پر کیا جائے۔ [مصنف ابن ابي شيبه/كتاب الجنائز/حدیث: 12467]

حضرت ابراہیم سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: حقیقی صبر وہی ہے جو صدمہ کے آغاز پر ہو۔ [مصنف ابن ابي شيبه/كتاب الجنائز/حدیث: 12468]

حضرت ابن سیرین فرماتے ہیں کہ حضرت زید بن ثابت نے حضرت عثمان سے اجازت مانگی کہ جو قبریں مسجد نبوی (صلی اللہ علیہ وآلہ وسلم) میں ہیں ان کو اکھیڑ (کھود) دیا جائے، تو آپ نے ان کو اجازت دے دی، تو انہوں نے ان قبروں کو کھود کر مسجد سے نکال دیا (اور کہیں اور دفنا دیا) اور وہ قبریں مسجد میں اس لیے چھوڑی گئی تھی کہ لوگوں کی نرم زمینیں بہت کم تھیں۔ [مصنف ابن ابي شيبه/كتاب الجنائز/حدیث: 12469]

حضرت انس سے مروی ہے کہ مسجد نبوی (صلی اللہ علیہ وآلہ وسلم) بنی نجار کی تھی، نبی کریم صلی اللہ علیہ وآلہ وسلم نے ان سے فرمایا: مجھ سے اس کا ثمن لے لو، انہوں نے عرض کیا ہم اس کا ثمن اللہ تعالیٰ سے چاہتے ہیں، اور مسجد میں مشرکین کی قبریں، کھجور کے درخت اور کھیتی تھی، آپ صلی اللہ علیہ وآلہ وسلم نے کھیتی کو کاٹنے، درختوں کو کاٹنے اور قبروں کو کھودنے کا حکم دیا۔ [مصنف ابن ابي شيبه/كتاب الجنائز/حدیث: 12470]