حضرت سالم فرماتے ہیں کہ قرآن پاک کی آیت { وَلاَ یَعْصِیْنَکَ فِیْ مَعْرُوفٍ } سے مراد نوحہ نہ کرنا ہے۔ [مصنف ابن ابي شيبه/كتاب الجنائز/حدیث: 12481]

حضرت ابو البختری فرماتے ہیں کہ میت پر نوحہ جاہلیت کے کاموں میں سے ہے۔ [مصنف ابن ابي شيبه/كتاب الجنائز/حدیث: 12482]

حضرت اسماعیل بن عبد الرحمن بن عطیہ انصاری فرماتے ہیں کہ میں نے اپنی والدہ سے پوچھا: وہ معروف کیا ہے جس کے بارے میں تم (عورتوں) کو ممانعت کی گئی تھی؟ انہوں نے فرمایا: نوحہ کرنا۔ [مصنف ابن ابي شيبه/كتاب الجنائز/حدیث: 12483]

حضرت زید بن اسلم فرماتے ہیں کہ قرآن پاک کی آیت { وَلاَ یَعْصِیْنَکَ فِیْ مَعْرُوفٍ } سے مراد، عورتیں اپنے گریبان چاک نہیں کریں گی، چہروں پر نہیں ماریں گی، بالوں کو نہیں پھیلائے (بکھیریں) گی اور آہ آہ (مصیبت کے وقت چیخنا اور نوحہ کرنا) نہیں پکا ریں گی۔ [مصنف ابن ابي شيبه/كتاب الجنائز/حدیث: 12484]

حضرت ابو العالیہ فرماتے ہیں کہ { وَلاَ یَعْصِیْنَکَ فِیْ مَعْرُوفٍ } سے مراد نوحہ ہے، اور فرمایا: (معروف کا حکم) ہر اس کام میں ہے جو اللہ کی اطاعت کے موافق ہو، اور اللہ نے اپنے نبی کے لیے یہ پسند نہیں کیا کہ اللہ کی معصیت میں ان کی اطاعت کی جائے۔ [مصنف ابن ابي شيبه/كتاب الجنائز/حدیث: 12485]

حضرت شعبی فرماتے ہیں کہ نوحہ کرنے والی اور اس کو تھامنے (ساتھ دینے) والی پر لعنت کی گئی ہے۔ [مصنف ابن ابي شيبه/كتاب الجنائز/حدیث: 12486]

حضرت جابر فرماتے ہیں کہ نبی کریم صلی اللہ علیہ وآلہ وسلم نے فرمایا: میں نے تو صرف نوحہ کرنے سے منع کیا ہے۔ [مصنف ابن ابي شيبه/كتاب الجنائز/حدیث: 12487]

حضرت عطاء بن السائب فرماتے ہیں کہ حضرت ابو البختری بڑے نرم دل کے تھے اور وہ نوحہ بھی سنتے تھے۔ [مصنف ابن ابي شيبه/كتاب الجنائز/حدیث: 12488]

حضرت سعید بن صالح فرماتے ہیں کہ حضرت ابو وائل نوحہ سنتے اور روتے تھے۔ [مصنف ابن ابي شيبه/كتاب الجنائز/حدیث: 12489]

حضرت ابو بردہ اپنے والد سے روایت کرتے ہیں کہ جب حضرت عمر کو زخم لگا تو حضرت صھیب ہائے ہمارے بھائی (کہہ کر رونے لگے) حضرت عمر نے فرمایا: اے صھیب! کیا تجھے نہیں معلوم کہ نبی کریم صلی اللہ علیہ وآلہ وسلم نے فرمایا ہے: بیشک زندوں کے رونے کی وجہ سے میت کو عذاب ہوتا ہے؟ [مصنف ابن ابي شيبه/كتاب الجنائز/حدیث: 12490]