حضرت عبد اللہ بن عمرو رضی اللہ عنہ فرماتے ہیں کہ میرے والد نے وصیت فرمائی کہ جب تم مجھے چارپائی پر اٹھاؤ تو مجھے لے کر میانہ انداز میں چلو، اور جنازے کے پیچھے رہو، بیشک اس کے آگے ملائکہ ہوتے ہیں اور پچھلا حصہ انسانوں کے لیے ہے۔ [مصنف ابن ابي شيبه/كتاب الجنائز/حدیث: 11611]

حضرت علقمہ ارشاد فرماتے ہیں جنازہ کو نصاریٰ کی طرح آہستہ آہستہ مت لے کر چلو۔ [مصنف ابن ابي شيبه/كتاب الجنائز/حدیث: 11612]

حضرت علی الازدی رحمہ اللہ فرماتے ہیں کہ میں نے حضرت عبد اللہ بن عمر رضی اللہ عنہما کو جنازہ میں دیکھا، لوگوں نے چارپائی کو چاروں طرف سے اٹھایا تو آپ نے داہنی جانب پہلے کندھا دیا پھر وہاں سے ہٹ کر الگ ہوگئے۔ قریب رہے زیادہ دور نہ گئے۔ [مصنف ابن ابي شيبه/كتاب الجنائز/حدیث: 11613]

حضرت حسن فرماتے ہیں کہ چارپائی کے جس مرضی جانب سے ابتداء کرو کوئی حرج نہیں ہے، [مصنف ابن ابي شيبه/كتاب الجنائز/حدیث: 11614]

حضرت عبداللہ بن عباس ارشاد فرماتے ہیں اگر استطاعت اور قدرت ہو تو چارپائی کے داہنی جانب (کے پائیوں) سے ابتداء کرے، پھر چارپائی کے گرد گھوم جائے، وگرنہ اس کے قریب ہوجا۔ [مصنف ابن ابي شيبه/كتاب الجنائز/حدیث: 11615]

حضرت جعفر بن ایاس فرماتے ہیں کہ میں حضرت حسن کو ایک جنازے کے پیچھے اس کو اٹھا کر جاتے دیکھا، آپ نے چار پائی اپنے بائیں کندھے پر رکھا، پھر پلٹے اور چارپائی کے اگلے حصہ کو اپنی داہنی کندھا پر رکھا، پھر پیچھے آئے اور چارپائی کے پچھلے حصے کو داہنی کندھا پر رکھا پھر دوبارہ پلٹے اور چارپائی کے پچھلے حصہ کو بائیں کندھے پر رکھا پھر اس کو (دوسروں کیلئے) چھوڑ دیا۔ [مصنف ابن ابي شيبه/كتاب الجنائز/حدیث: 11616]

حضرت عبید بن نسطاس فرماتے ہیں کہ ہم حضرت ابو عبیدہ بن عبد اللہ کے ساتھ ایک جنازے میں تھے تو انہوں نے فرمایا کہ حضرت عبد اللہ رضی اللہ عنہ نے فرمایا: جب تم میں سے کوئی شخص کسی جنازے میں ہو تو وہ چارپائی کے چاروں حصوں کو کندھا دے بیشک یہ سنت میں سے ہے۔ پھر اس کو (نفلی طور پر) اٹھائے یا (دوسروں کیلئے) چھوڑ دے۔ [مصنف ابن ابي شيبه/كتاب الجنائز/حدیث: 11617]

حضرت ابو ہریرہ رضی اللہ عنہ ارشاد فرماتے ہیں کہ جس نے جنازے کو تین بار اٹھایا اس نے وہ حق ادا کردیا جو اس پر تھا۔ [مصنف ابن ابي شيبه/كتاب الجنائز/حدیث: 11618]

حضرت عامر بن جشیب اور اہل شام کے کچھ دوسرے لوگ فرماتے ہیں کہ حضرت ابو الدرداء رضی اللہ عنہ نے فرمایا: جنازے کے اجر کی تکمیل میں سے یہ ہے کہ آدمی اس کے گھر والوں کے پاس سے اس کے ساتھ چلے، اس کو چاروں کونوں سے کندھا دے اور قبر میں مٹی ڈالے۔ [مصنف ابن ابي شيبه/كتاب الجنائز/حدیث: 11619]

حضرت مسروق فرماتے ہیں کہ رسول اللہ صلی اللہ علیہ وآلہ وسلم کسی جنازہ کے لیے نکلے جس کے ساتھ ایک عورت بھی تھی تو آپ اس وقت تک نہ ٹلے کہ جب تک وہ عورت گھروں میں اوجھل نہ ہوگئی۔ [مصنف ابن ابي شيبه/كتاب الجنائز/حدیث: 11620]