حضرت معتمر بن سلیمان اپنے والد سے روایت کرتے ہیں کہ میں نے حضرت ابو قلابہ کو کئی بار دیکھا کہ وہ جنازے کو اپنی دائیں جانب رکھتے تھے۔ [مصنف ابن ابي شيبه/كتاب الجنائز/حدیث: 11571]

حضرت ابن البزی فرماتے ہیں کہ میں جنازہ میں تھا، حضرت ابوبکر صدیق اور حضرت عمر اس جنازہ کے آگے تھے اور حضرت علی رضی اللہ عنہ پیچھے چل رہے تھے۔ میں حضرت علی رضی اللہ عنہ کی خدمت میں حاضر ہوا اور عرض کیا جنازے کے پیچھے چلنا افضل ہے یا آگے؟ کیونکہ میں آپ کو دیکھتا ہوں کہ آپ پیچھے چل رہے ہیں اور یہ دونوں حضرات آگے چل رہے ہیں۔ حضرت علی رضی اللہ عنہ نے ارشاد فرمایا: ہمیں معلوم ہے کہ جنازے کے پیچھے چلنا اس کے آگے چلنے سے ایسے ہی افضل ہے جیسے جماعت کی نماز اکیلے شخص کی نماز سے افضل ہے، لیکن وہ دونوں حضرات آسانی کیلئے آگے چل رہے ہیں۔ وہ لوگوں پر آسانی کو پسند کرتے ہیں۔ [مصنف ابن ابي شيبه/كتاب الجنائز/حدیث: 11572]

حضرت ابو ماجد فرماتے ہیں کہ میں نے حضرت عبد اللہ بن مسعود رضی اللہ عنہ جنازے کی رفتار سے متعلق دریافت کیا؟ آپ نے فرمایا دُلکی (تیز) چال سے کچھ کم چلنا ہے، اور جنازہ متبوع ہے تابع نہیں ہے (یعنی لوگ اسکے پیچھے چل کر اسکی اتباع کرتے ہیں) اور جو جنازے سے آگے رہے وہ اس کے ساتھ نہیں ہے۔ [مصنف ابن ابي شيبه/كتاب الجنائز/حدیث: 11573]

حضرت مریح بن مسروق سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: ہر امت کے لیے نذر اور قربانی ہے، اور اس امت کی قربانی اس کے مردے ہیں، پس تم اپنے مردوں کو (جنازے میں) اپنے آگے رکھو۔ [مصنف ابن ابي شيبه/كتاب الجنائز/حدیث: 11574]

حضرت ابو النعمان فرماتے ہیں کہ میں حضرت ابو امامہ سے سنا وہ فرماتے ہیں: میں جنازے کے ساتھ نہ نکلوں یہ مجھے زیادہ پسند ہے اس بات سے کہ میں اس کے آگے چلوں۔ [مصنف ابن ابي شيبه/كتاب الجنائز/حدیث: 11575]

حضرت عبد اللہ بن رباح ارشاد فرماتے ہیں کہ جنازے میں پیدل چلنے والے کیلئے دو قیراط اجر ہے، اور سوار کے لیے ایک قیراط۔ [مصنف ابن ابي شيبه/كتاب الجنائز/حدیث: 11576]

حضرت ابن معقل فرماتے ہیں کہ میں نے حضرت عبد اللہ بن عمر رضی اللہ عنہما خچر پر سوار جنازے کے آگے چلتے ہوئے دیکھا۔ [مصنف ابن ابي شيبه/كتاب الجنائز/حدیث: 11577]

حضرت عیینہ بن عبد الرحمن اپنے والد سے روایت کرتے ہیں کہ میں نے حضرت عبد الرحمن بن سمرہ کے جنازے میں حضرت ابو بکرہ کو اپنے خچر پر سوار دیکھا۔ [مصنف ابن ابي شيبه/كتاب الجنائز/حدیث: 11578]

حضرت جابر ارشاد فرماتے ہیں کہ میں نے رسول اکرم (صلی اللہ علیہ وآلہ وسلم) کو ابن دحداح کے جنازے میں گھوڑے پر سوار دیکھا وہ چھوٹی چھوٹی چھلانگ لگا کر چل رہا تھا اور ہم آپ صلی اللہ علیہ وآلہ وسلم کے اردگرد تھے۔ [مصنف ابن ابي شيبه/كتاب الجنائز/حدیث: 11579]

حضرت جبار الطائی فرماتے ہیں کہ میں نے حضرت ابن عباس رضی اللہ عنہما کو حضرت ام مصعب کے جنازے میں اپنی گدھی پر سوار دیکھا، پھر وہ گزر گئے۔ [مصنف ابن ابي شيبه/كتاب الجنائز/حدیث: 11580]