حضرت ابن سیرین فرماتے ہیں بڑے کی طرح بچے کی نماز جنازہ بھی ادا کی جائے گی۔ [مصنف ابن ابي شيبه/كتاب الجنائز/حدیث: 11941]

حضرت ابن سیرین فرماتے ہیں کہ جنین کی نماز جنازہ پڑھو اور اس کا نام رکھو کیونکہ وہ فطرت اسلام پر پیدا ہوا ہے۔ [مصنف ابن ابي شيبه/كتاب الجنائز/حدیث: 11942]

حضرت عمرو بن مرہ فرماتے ہیں کہ میں نے حضرت ابن ابی لیلیٰ سے اس کے متعلق دریافت کیا؟ آپ نے فرمایا: میں نے انصار کے باقی ماندہ لوگوں کو پایا کہ وہ اپنے بچوں کی نماز جنازہ ادا کرتے تھے۔ [مصنف ابن ابي شيبه/كتاب الجنائز/حدیث: 11943]

حضرت سعید بن المسیب اس جنین کے بارے میں کہ جو مردہ ہی پیدا ہوا ہو فرماتے کہ جب اس میں روح پھونکی جا چکی ہو تو اس پر نماز جنازہ پڑھی جائے گی، اور یہ روح چار ماہ میں پھونکی جاتی ہے۔ [مصنف ابن ابي شيبه/كتاب الجنائز/حدیث: 11944]

حضرت خالد الاحدب فرماتے ہیں کہ حضرت عبد اللہ بن عمر رضی اللہ عنہما سے بچوں کی نماز جنازہ کے بارے میں سوال کیا گیا؟ آپ نے فرمایا جس کا کوئی گناہ نہیں اس کی نماز جنازہ پڑھنا مجھے زیادہ پسند ہے۔ [مصنف ابن ابي شيبه/كتاب الجنائز/حدیث: 11945]

حضرت ابراہیم فرماتے ہیں کہ بچے کی نماز جنازہ نہیں ادا کریں گے جب تک کہ وہ چیخے نہیں۔ [مصنف ابن ابي شيبه/كتاب الجنائز/حدیث: 11946]

حضرت ابراہیم سے اسی طرح منقول ہے۔ [مصنف ابن ابي شيبه/كتاب الجنائز/حدیث: 11947]

حضرت عمرو بن مرہ فرماتے ہیں کہ میں نے حضرت سعید بن جبیر سے سنا آپ فرماتے ہیں کہ بچے کی نماز جنازہ نہیں ادا کی جائے گی۔ [مصنف ابن ابي شيبه/كتاب الجنائز/حدیث: 11948]

حضرت عثمان بن جحاش فرماتے ہیں کہ میں نے حضرت سمرہ بن جندب کو یہ فرماتے ہوئے سنا جب ان کا چھوٹا بیٹا فوت ہوا، آپ نے فرمایا: اسکو لے جاؤ اور دفنا دو، اس پر نماز جنازہ نہیں پڑھی جائے گی کہ اس پر گناہ نہیں ہے۔ اللہ پاک سے اس کے والدین کے لیے دعا کرو کہ وہ اس بچہ کو ان کے لیے پیش رو اور اجر کا ذریعہ بنائے۔ [مصنف ابن ابي شيبه/كتاب الجنائز/حدیث: 11949]

حضرت زہری فرماتے ہیں کہ نو مولود کی نماز جنازہ نہیں ادا کی جائے گی، اور نہ ہی وہ وارث بنایا جائے گا جب تک کہ وہ نہ چیخے۔ [مصنف ابن ابي شيبه/كتاب الجنائز/حدیث: 11950]