حضرت ابو سعید الخدری سے مروی ہے نبی کریم صلی اللہ علیہ وآلہ وسلم نے ارشاد فرمایا: جو شخص جنازہ کے اہل کے پاس آیا اور ان کے ساتھ چلا یہاں تک کہ اس نے نماز جنازہ ادا کی اس کے لیے ایک قیراط اجر ہے۔ اور جو دفن تک ساتھ رہا اس کے لیے دو قیراط اجر ہے، اور قیراط احد پہاڑ کے مثل ہے۔ [مصنف ابن ابي شيبه/كتاب الجنائز/حدیث: 11971]

حضرت عبد اللہ بن عمر رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: جس نے کسی کی نماز جنازہ ادا کی اس کے لیے ایک قیراط اجر ہے۔ [مصنف ابن ابي شيبه/كتاب الجنائز/حدیث: 11972]

حضرت براء بن عازب سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: جس نے کسی کی نماز جنازہ ادا کی اس کے لیے ایک قیراط اجر ہے اور جو دفن تک ساتھ رہا اس کے لیے دو قیراط۔ [مصنف ابن ابي شيبه/كتاب الجنائز/حدیث: 11973]

حضرت عائشہ رضی اللہ عنہا سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: مسلمانوں میں سے جو بھی شخص فوت ہو اور اس پر مسلمانوں کی ایک جماعت نماز ادا کرے جن کی تعداد سو تک پہنچ جائے اور وہ اس کے لیے شفاعت (دعائے مغفرت) کریں تو ان کی شفاعت اس کے حق میں ضرور قبول کرلی جاتی ہے۔ [مصنف ابن ابي شيبه/كتاب الجنائز/حدیث: 11974]

حضرت ابی بکار فرماتے ہیں کہ میں نے حضرت ابو ملیح کے ساتھ نماز جنازہ ادا کی، آپ نے فرمایا صفیں درست کرلو اور اس کے لیے تم خوب اچھے طریقے سے شفاعت (دعائے مغفرت) کرو۔ اگر مجھے کسی شخص کا اختیار دیا جاتا تو میں اسکو اختیار کرتا۔ مجھ سے حضرت عبد اللہ بن السلیل نے بیان کیا کہ حضرت میمونہ سے مروی ہے جو ان کے رضاعی بھائی تھے نبی کریم صلی اللہ علیہ وآلہ وسلم نے ارشاد فرمایا: نہیں ہے کوئی مسلمان جس کی نماز جنازہ ایک جماعت ادا کرے مگر اس کی شفاعت کردی جاتی ہے۔ حضرت ابو الملیح فرماتے ہیں جماعت سے مراد چالیس سے سو تک لوگ ہیں۔ [مصنف ابن ابي شيبه/كتاب الجنائز/حدیث: 11975]

حضرت مالک بن ھبیرہ الشامی جو صحابی تھے، جب کسی جنازے پر آتے اور اس کے ساتھ لوگ تھوڑے ہوتے تو آپ ان کی تین صفیں بنا دیتے، پھر اس پر نماز جنازہ پڑھتے، اور آپ نے فرمایا کہ رسول اللہ صلی اللہ علیہ وآلہ وسلم کا ارشاد ہے کہ کسی میت پر بھی مسلمانوں کی تین صفیں نہیں بنتیں مگر (اس کی مغفرت) واجب ہوجاتی ہے۔ [مصنف ابن ابي شيبه/كتاب الجنائز/حدیث: 11976]

حضرت عسعس بن سلامہ فرماتے ہیں جس کے حق میں چالیس لوگ شفاعت کریں ان کی شفاعت قبول کرلی جاتی ہے۔ اور جس کے حق میں دس لوگ شفاعت کریں (گواہی دیں) ان کی گواہی قبول کرلی جاتی ہے۔ [مصنف ابن ابي شيبه/كتاب الجنائز/حدیث: 11977]

حضرت ابو ہریرہ رضی اللہ عنہ ارشاد فرماتے ہیں کہ جس پر سو مسلمان نماز ادا کریں اس کی مغفرت کردی جاتی ہے۔ [مصنف ابن ابي شيبه/كتاب الجنائز/حدیث: 11978]

حضرت جریر سے مرفوعا مروی ہے کہ نبی کریم صلی اللہ علیہ وآلہ وسلم نے ارشاد فرمایا: لحد ھمارے لیے ہے اور شق ہمارے غیر کے لیے ہے۔ [مصنف ابن ابي شيبه/كتاب الجنائز/حدیث: 11979]

حضرت حفص اپنے والد سے روایت کرتے ہیں کہ نبی کریم صلی اللہ علیہ وآلہ وسلم کے لیے لحد (بغلی قبر) بنائی گئی۔ [مصنف ابن ابي شيبه/كتاب الجنائز/حدیث: 11980]