حضرت ابو جعفر محرم کے متعلق فرماتے ہیں کہ اس کے سر کو ڈھانپا جائے گا کھولا نہیں جائے گا۔ [مصنف ابن ابي شيبه/كتاب الحج/حدیث: 15040]

حضرت عطاء فرماتے ہیں کہ اس کو خوشبو نہیں لگائی جائے گی۔ [مصنف ابن ابي شيبه/كتاب الحج/حدیث: 15041]

حضرت عائشہ رضی اللہ عنہا نے ایک اونٹ خریدا تو وہ گم ہوگیا، انھوں نے اس کے بدلے دوسرا اونٹ خرید لیا، تو وہ پہلا والا بھی دوبارہ مل گیا، آپ نے دونوں اونٹوں کی قربانی کی اور فرمایا کہ اللہ تعالیٰ کے علم میں تھا کہ میں دونوں قربان کروں گی، اور یہ نفل قربانی میں تھا۔ [مصنف ابن ابي شيبه/كتاب الحج/حدیث: 15042]

حضرت عروہ سے مروی ہے کہ حضرت عائشہ رضی اللہ عنہا نے دونوں اونٹوں کو ذبح فرمایا۔ [مصنف ابن ابي شيبه/كتاب الحج/حدیث: 15043]

حضرت ماعز بن مالک یا مالک بن ماعز الثقفی سے مروی ہے کہ میرے والد محترم نے اپنی طرف سے، اپنی اہلیہ کی طرف سے اور اپنی بیٹی کی طرف سے دو ھدی بھیجیں، وہ مقام ذوالمجاز میں آ کر گم ہوگئیں، جب قربانی کا دن آیا تو انھوں نے حضرت عمر سے اس کا ذکر کیا، آپ نے فرمایا کہ آج کے دن، کل اور پرسوں تک انتظار کرلو، بیشک قربانی کے یہ تین دن ہیں، اگر تمہارے جانور تمہیں مل جائیں تو ان دونوں کو ذبح کرو، اور اگر وہ نہ ملیں تو تیسرے دن ان کی جگہ دو جانور اور خریدو اور ان کو ذبح کرو اور جب تک ذبح نہ کرلو احرام نہ کھولنا، پھر خریدی ہوئی قربانی کے ذبح کرنے کے بعد وہ پہلے والے جانور بھی واپس مل جائیں تو ان کو بھی ذبح کردو۔ [مصنف ابن ابي شيبه/كتاب الحج/حدیث: 15044]

حضرت ابو الخصیب القیسی نے اپنی والدہ کی طرف سے ھدی کا جانور بھیجا تو وہ راستہ میں گم ہوگیا، انھوں نے اس کی جگہ دوسرا جانور خرید لیا اور اس کو قلادہ ڈالا، اتنے میں وہ پہلا جانور بھی مل گیا، انھوں نے حضرت حضرت ابن عمر رضی اللہ عنہما سے دریافت کیا؟ آپ نے فرمایا کہ دونوں کو ذبح کر دے۔ [مصنف ابن ابي شيبه/كتاب الحج/حدیث: 15045]

حضرت ابن عباس رضی اللہ عنہما ارشاد فرماتے ہیں کہ دونوں جانوروں کو ذبح کریں گے۔ [مصنف ابن ابي شيبه/كتاب الحج/حدیث: 15046]

حضرت عائشہ رضی اللہ عنہا نے دو اونٹ ھدی بھیجے تو وہ راستہ میں گم ہوگئے، حضرت ابن زبیر نے ان کے لیے دو اونٹ قربانی کے لیے بھیجے، انھوں نے ان کو ذبح کیا تو سابقہ دو اونٹ بھی عائشہ رضی اللہ عنہا کو مل گئے تو آپ نے دونوں کو ذبح فرمایا۔ [مصنف ابن ابي شيبه/كتاب الحج/حدیث: 15047]

حضرت علی بن نافع رحمہ اللہ ارشاد فرماتے ہیں کہ میں قربانی کا اونٹ ہانک کر لے گیا تو وہ گم ہوگیا، میں نے اس کی جگہ دوسرا اونٹ خرید کر قربانی کردی، پھر مجھے وہ پہلا اونٹ دوبارہ مل گیا، میں نے حضرت عروہ بن زبیر سے اس کے متعلق دریافت کیا؟ آپ نے فرمایا کہ دونوں کی قربانی کرو۔ [مصنف ابن ابي شيبه/كتاب الحج/حدیث: 15048]

(حضرت علی بن نافع فرماتے ہیں کہ) میں نے حضرت عکرمہ سے (اس کے متعلق) دریافت کیا تو آپ نے فرمایا کہ یہ تمہارے اونٹوں میں سے ایک اونٹنی ہے۔ [مصنف ابن ابي شيبه/كتاب الحج/حدیث: 15049]