ابن عمر رضی اللہ عنہما کے بارے میں روایت ہے کہ انہوں نے شکار کے تازہ اور خشک دونوں قسم کے گوشت کو محرم کے لیے ناپسند کیا ہے۔ [مصنف ابن ابي شيبه/كتاب الحج/حدیث: 15080]

حضرت صعب نے رسول اللہ صلی اللہ علیہ وآلہ وسلم کو حمار وحشی کا ھدیہ بھیجا تو آپ صلی اللہ علیہ وآلہ وسلم نے فرمایا کہ اس کو واپس کردو ہم تو حالت احرام میں ہیں۔ [مصنف ابن ابي شيبه/كتاب الحج/حدیث: 15081]

حضرت طاؤس محرم کو منع فرماتے تھے کہ وہ شکار کا گوشت کھائے، خواہ وہ سفر کے لیے سکھایا ہوا گوشت ہو یا کوئی اور۔ [مصنف ابن ابي شيبه/كتاب الحج/حدیث: 15082]

حضرت ابو الشعثائ محرم کے لیے اس کے کھانے کو ناپسند کرتے تھے، اور قرآن پاک کی یہ آیت تلاوت فرماتے { وَ حُرِّمَ عَلَیْکُمْ صَیْدُ الْبَرِّ مَا دُمْتُمْ حُرُمًا }۔ [مصنف ابن ابي شيبه/كتاب الحج/حدیث: 15083]

حضرت عروہ سے مروی ہے کہ حضرت عائشہ رضی اللہ عنہا نے مجھ سے فرمایا: اے بھتیجے! بیشک یہ چند راتیں ہیں، اگر تیرے سینے میں کوئی چیز کھٹکے تو اس کو چھوڑ دے۔ [مصنف ابن ابي شيبه/كتاب الحج/حدیث: 15084]

حضرت ابن عباس رضی اللہ عنہما فرماتے ہیں کہ یہ گوشت مبھم ہے۔ [مصنف ابن ابي شيبه/كتاب الحج/حدیث: 15085]

حضرت علی رضی اللہ عنہ اس کے کھانے کو ناپسند کرتے تھے۔ [مصنف ابن ابي شيبه/كتاب الحج/حدیث: 15086]

حضرت عبد اللہ بن حارث فرماتے ہیں کہ حضرت عثمان کے لیے تیتر ھدیہ لائے گئے آپ اس وقت اپنے ایک حج میں حالت احرام میں تھے، آپ نے ان کے پکانے کا حکم فرمایا: ان کی ثرید بنائی گئی اور پیالوں میں لائی گئی، ہم سب حالت احرام میں تھے ہم سب نے اس کو کھایا مگر حضرت علی رضی اللہ عنہ نے اس میں سے تناول نہ فرمایا۔ [مصنف ابن ابي شيبه/كتاب الحج/حدیث: 15087]

حضرت اسماعیل فرماتے ہیں کہ میں نے حضرت شعبی سے اس کے متعلق دریافت کیا؟ آپ نے فرمایا کہ اس کے متعلق اختلاف واقع ہوا ہے، میرے نزدیک پسندیدہ تو یہی ہے کہ تو اس کو نہ کھا۔ [مصنف ابن ابي شيبه/كتاب الحج/حدیث: 15088]

حضرت ابن عباس رضی اللہ عنہما ارشاد فرماتے ہیں کہ اگر تجھ سے ہو سکے تو حالت احرام میں اپنی بیوی کے قریب نہ جا۔ [مصنف ابن ابي شيبه/كتاب الحج/حدیث: 15089]