حضرت طاؤس فرماتے ہیں کہ صرف پہلے جانور کی قربانی کرلے۔ [مصنف ابن ابي شيبه/كتاب الحج/حدیث: 15050]

حضرت ابوبکر بن ابو الجھم فرماتے ہیں کہ میں نے حضرت قبیصہ بن ذویب سے اس کے متعلق دریافت کیا؟ آپ نے فرمایا دونوں جانوروں کو اکٹھے ذبح کر۔ [مصنف ابن ابي شيبه/كتاب الحج/حدیث: 15051]

حضرت عطاء فرماتے ہیں کہ اگر پہلا جانور (گم ہونے والا) نفلی تھا تو پھر دونوں کو ذبح کرے گا اور اگر پہلا جانور واجب تھا تو پھر اسی کو ذبح کرے گا دوسرے جانور میں اس کی مرضی ہے چاہے تو ذبح کرے اگر چاہے تو نہ کرے۔ [مصنف ابن ابي شيبه/كتاب الحج/حدیث: 15052]

حضرت حسن اور حضرت عطاء ارشاد فرماتے ہیں کہ اگر نفلی قربانی والا جانور گم ہوگیا اور اس نے اس کی جگہ دوسرا خرید لیا اور اس کو بھی قلادہ ڈال دیا تو اب دونوں کو ذبح کرے گا اور اگر ابھی تک قلادہ نہیں ڈالا تو اگر چاہے تو اس کو فروخت کرسکتا ہے۔ [مصنف ابن ابي شيبه/كتاب الحج/حدیث: 15053]

حضرت عبد الرحمن بن سابط سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: جو شخص اس حال میں دنیا سے رخصت ہوا کہ اس نے حج فرض (حج اسلام) ادا نہ کیا، اور اس کو کسی بیماری، مجبوری یا ظالم بادشاہ نے بھی نہ روکا، تو وہ جس مرضی حال پر مرے، خواہ یہودی ہو کر خواہ نصرانی ہو کر۔ [مصنف ابن ابي شيبه/كتاب الحج/حدیث: 15054]

حضرت الاسود نے ایک مالدار شخص سے فرمایا کہ اگر تو بغیر حج کیے مرگیا تو میں تیرا جنازہ نہ پڑھوں گا۔ [مصنف ابن ابي شيبه/كتاب الحج/حدیث: 15055]

حضرت مجاہد بن رومی فرماتے ہیں کہ میں نے حضرت سعید بن جبیر، حضرت عبد الرحمن بن ابی لیلیٰ اور حضرت عبد اللہ بن معقل سے اس شخص کے متعلق دریافت کیا جو صاحب استطاعت ہونے کے باوجود حج کیے بغیر مرجائے؟ حضرت سعید نے فرمایا آگ، آگ۔ [مصنف ابن ابي شيبه/كتاب الحج/حدیث: 15056]

اور حضرت ابن معقل نے فرمایا کہ وہ اس حال میں مرا کہ وہ اللہ کا نافرمان ہے۔ [مصنف ابن ابي شيبه/كتاب الحج/حدیث: 15057]

اور حضرت ابن ابی لیلیٰ نے فرمایا کہ مجھے امید ہے کہ اس کا ولی اس کی طرف سے حج ادا کر دے۔ [مصنف ابن ابي شيبه/كتاب الحج/حدیث: 15058]

حضرت سعید بن جبیر فرماتے ہیں کہ اگر میرا مالدار پڑوسی حج ادا کیے بغیر مرجائے تو میں اس کی نماز جنازہ نہیں ادا کروں گا۔ [مصنف ابن ابي شيبه/كتاب الحج/حدیث: 15059]