حضرت نافع سے مروی ہے کہ حضرت عبد اللہ بن عمر رضی اللہ عنہما جب صفا پر چڑھتے تو کعبہ کی طرف رخ کرتے پھر تین تکبیریں پڑھتے اور پھر یہ دعا پڑھتے: لاَ إِلَہَ إِلاَّ اللَّہُ وَحْدَہُ لاَ شَرِیکَ لَہُ، لَہُ الْمُلْکُ وَلَہُ الْحَمْدُ، وَہُوَ عَلَی کُلِّ شَیْئٍ قَدِیرٌ، اپنی آواز بلند کردیتے اور پھر تھوڑی سے دعا فرماتے، پھر مروہ پر یہی عمل کرتے، یہاں تک کہ سات چکروں میں سات دفعہ یہ عمل کرتے، پس اکیس تکبیریں بن جاتیں، پس ابھی وہ فراغت کے قریب بھی نہیں ہوتے تھے کہ ہم پہلے ہی تھک جاتے تھے۔ حالانکہ ہم جوان تھے۔ [مصنف ابن ابي شيبه/كتاب الحج/حدیث: 15111]

حضرت سعید بن جبیر فرماتے ہیں کہ آدمی صفا ومروہ پر اتنی دیر کھڑا ہو جتنی دیر میں سورة محمد کی تلاوت کی جاتی ہے۔ [مصنف ابن ابي شيبه/كتاب الحج/حدیث: 15112]

حضرت حکم نے ابراہیم سے فرمایا: میں نے حضرت ابوبکر بن عبد الرحمن بن حارث کو دیکھا کہ آپ صفا پر اتنی دیر کھڑے رہے جتنی دیر میں آدمی ایک سو بیس آیتوں کی تلاوت کرلے، ابراہیم نے فرمایا: یقیناً وہ فقیہ ہیں۔ [مصنف ابن ابي شيبه/كتاب الحج/حدیث: 15113]

حضرت جابر سے مروی ہے کہ نبی کریم صلی اللہ علیہ وآلہ وسلم نے صفا سے ابتدا کی اور اس پر چڑھے اور ان الفاظ سے اللہ کی توحید وکبریائی بیان فرمائی: اللہ کے علاوہ کوئی الٰہ نہیں ہے۔ وہ اکیلا ہے۔ اس کا کوئی شریک نہیں۔ اسی کی بادشاہی اور اس ہی کی تمام تعریف ہے اور وہ ہر شی پر قادر ہے۔ اللہ کے علاوہ کوئی عبادت کے لائق نہیں۔ وہ اکیلا ہے اس نے اپنا وعدہ پورا کیا اور اپنے بندے کی مدد کی اور تن تنہا گروہوں کو شکست دی۔ پھر ان کے درمیان دعا فرمائی، اسی طرح تین بار کیا پھر مروہ کی طرف اترے یہاں تک کہ آپ کے قدم بطن وادی میں اتر گئے، یہاں تک کہ جب ہم (وادی سے) اوپر چڑھے تو آپ چلتے ہوئے مروہ پر آئے، اور آپ صلی اللہ علیہ وآلہ وسلم نے مروہ پر بھی وہی کیا جو صفا پر کیا تھا۔ [مصنف ابن ابي شيبه/كتاب الحج/حدیث: 15114]

حضرت ابن عمر رضی اللہ عنہما فرماتے ہیں کہ جو بالوں کو گوندھے، یا (گوند وغیرہ سے) جمائے، یا جوڑا باندھے تو اس پر ان کا حلق کروانا ہے۔ [مصنف ابن ابي شيبه/كتاب الحج/حدیث: 15115]

اور حضرت ابن عباس رضی اللہ عنہما فرماتے ہیں کہ جس کی وہ نیت کرے وہ ہے۔ [مصنف ابن ابي شيبه/كتاب الحج/حدیث: 15116]

حضرت عبد اللہ فرماتے ہیں کہ میں اپنی خالہ حضرت میمونہ کے ساتھ سفر حج پر نکلا، میں نے اپنے سر کو شہد یا گوند سے جما لیا، جس کی وجہ سے بال بکھر گئے، اور یہ مجھ پر دشوار ہوگیا حالانکہ میں حالت احرام میں تھا، میں نے آپ سے دریافت کیا؟ آپ نے فرمایا کہ اپنے سر کو پانی میں بار بار غوطہ دو۔ [مصنف ابن ابي شيبه/كتاب الحج/حدیث: 15117]

حضرت علی رضی اللہ عنہ فرماتے ہیں کہ جو بالوں کو (گوند سے) جمائے، یا جوڑا باندھے، یا گوندھے تو اس پر ان کا حلق کروانا لازم ہے۔ [مصنف ابن ابي شيبه/كتاب الحج/حدیث: 15118]

حضرت عمر ارشاد فرماتے ہیں کہ جو شخص بالوں کو گوندھے یا چوٹی بنائے یا بٹ دیکر مضبوط کرے اس پر ان کا حلق کروانا ضروری ہے۔ [مصنف ابن ابي شيبه/كتاب الحج/حدیث: 15119]

حضرت عوف ایک شیخ سے روایت کرتے ہیں، میں نے ان کے بارے میں دریافت کیا تو لوگوں کا خیال تھا کہ وہ حضرت ابو المھلب ہیں، انھوں نے فرمایا جو بالوں کو گوندھے یا چوٹی بنائے اس پر بالوں کا حلق کروانا ضروری ہے۔ [مصنف ابن ابي شيبه/كتاب الحج/حدیث: 15120]