حضرت عطاء سے دریافت کیا گیا کہ تین طلاق یافتہ عورت اور وہ عورت جس کا شوہر فوت ہوجائے اپنی عدت میں حج کرسکتی ہے؟ آپ نے فرمایا ہاں۔ [مصنف ابن ابي شيبه/كتاب الحج/حدیث: 15271]

حضرت حبیب فرماتے ہیں کہ حسن بھی یہی فرماتے تھے۔ [مصنف ابن ابي شيبه/كتاب الحج/حدیث: 15272]

حضرت سعید بن المسیب سے مروی ہے کہ حضرت عمر نے ان عورتوں کو واپس بھیج دیا تھا جو عدت میں حج یا عمرہ کرنے آئیں تھیں۔ [مصنف ابن ابي شيبه/كتاب الحج/حدیث: 15273]

حضرت سعید بن المسیب سے مروی ہے کہ حضرت عمر رضی اللہ عنہ نے حج یا عمرہ کرنے والی ان عورتوں کو واپس بھیج دیا تھا جو اپنی عدت میں نکلی تھیں۔ [مصنف ابن ابي شيبه/كتاب الحج/حدیث: 15274]

حضرت سعید بن المسیب فرماتے ہیں کہ وہ عورت جس کا شوہر فوت ہوجائے اور وہ عورت جو تین طلاق یافتہ ہو وہ نہ حج کرے نہ عمرہ اور نہ ہی زعفران میں رنگے ہوئے کپڑے استعمال کرے۔ [مصنف ابن ابي شيبه/كتاب الحج/حدیث: 15275]

حضرت مجاہد سے مروی ہے کہ حضرت عمر اور حضرت عثمان نے ان عورتوں کو واپس بھیج دیا تھا جو حج یا عمرہ کرنے آئیں تھیں یہاں تک کہ وہ اپنی عدت اپنی گھروں میں گزاریں۔ [مصنف ابن ابي شيبه/كتاب الحج/حدیث: 15276]

حضرت ابن عباس رضی اللہ عنہما اس بچہ کے متعلق فرماتے ہیں جو حرم کے کبوتروں میں سے کوئی کبوتر مار دے تو فرمایا (اس کے والد سے) اپنے بچے کی طرف سے بکری ذبح کر۔ [مصنف ابن ابي شيبه/كتاب الحج/حدیث: 15277]

حضرت عمر بن حفص فرماتے ہیں کہ ہم جب چھوٹے تھے تو ہم حضرت حفص بن عاصم کے ساتھ آئے اور ہم نے مکہ میں اپنے مکان میں کبوتری کا بچہ پکڑ کر اس سے کھیل کود شروع کردیا یہاں تک کہ وہ مرگیا، ان کی اہلیہ حضرت عائشہ بنت مطیع بن الاسود رحمہا اللہ نے ان سے کہا تو انھوں کہا کہ مینڈھا ذبح کیا جائے، پس مینڈھا ذبح کر کے صدقہ کیا گیا۔ [مصنف ابن ابي شيبه/كتاب الحج/حدیث: 15278]

حضرت ہشام بن عروہ سے مروی ہے کہ حضرت عروہ کے کچھ بچے مکہ مکرمہ کی کبوتری کے بچوں سے کھیل رہے تھے، میرے والد محترم نے بکری ذبح کرنے کا حکم دیا تو وہ ذبح کی گئی اور پھر اس کا گوشت صدقہ کیا گیا۔ [مصنف ابن ابي شيبه/كتاب الحج/حدیث: 15279]

حضرت حسن فرماتے ہیں کہ اگر بچہ کوئی شکار وغیرہ ہلاک کر دے تو اس کا دم اس پر ہے جو اس کے ساتھ حج کر رہا ہے۔ [مصنف ابن ابي شيبه/كتاب الحج/حدیث: 15280]