حضرت ایوب فرماتے کہ ابو الحکم البجلی نے اشھر حج کے علاوہ حج کے لیے احرام باندھا، ان سے حضرت عکرمہ کی ملاقات ہوئی تو آپ نے فرمایا کہ تو برا آدمی ہے۔ [مصنف ابن ابي شيبه/كتاب الحج/حدیث: 15251]

حضرت عطاء، حضرت طاؤس اور حضرت مجاہد دوران طواف کوئی چیز پینے میں کوئی حرج نہیں سمجھتے تھے۔ [مصنف ابن ابي شيبه/كتاب الحج/حدیث: 15252]

حضرت عکرمہ بن خالد آل وداع کے ایک شخص سے روایت کرتے ہیں کہ نبی کریم صلی اللہ علیہ وآلہ وسلم نے طواف کے دوران پانی طلب کیا، ایک شخص نے عرض کیا: کیا میں آپ کو اپنا بنایا ہوا مشروب نہ پلاؤں؟ پھر آپ صلی اللہ علیہ وآلہ وسلم کے پاس ایک برتن لایا گیا جس میں کشمش کا نبیذ تھا، آپ صلی اللہ علیہ وآلہ وسلم نے فرمایا: تم نے اس پر کوئی برتن کیوں نہ الٹ دیا یا اس پر کوئی لکڑی کیوں نہ رکھ دی؟ پھر آپ صلی اللہ علیہ وآلہ وسلم نے اس میں سے نوش فرمایا اور آپ صلی اللہ علیہ وآلہ وسلم کے ماتھے پر شکن پڑگئے، پھر آپ نے پانی منگوایا اور اسے اس میں ڈالا پھر آپ صلی اللہ علیہ وآلہ وسلم نے خود بھی نوش فرمایا اور اپنے صحابہ کو بھی پلایا۔ [مصنف ابن ابي شيبه/كتاب الحج/حدیث: 15253]

حضرت ابن عباس رضی اللہ عنہما فرماتے ہیں کہ دوران طواف کوئی چیز پینے میں کوئی حرج نہیں۔ [مصنف ابن ابي شيبه/كتاب الحج/حدیث: 15254]

حضرت ابو مسعود سے مروی ہے کہ دوران طواف نبی کریم صلی اللہ علیہ وآلہ وسلم نے پانی طلب کیا تو آپ صلی اللہ علیہ وآلہ وسلم کو نبیذ سقایہ کا ایک ڈول پیش کیا گیا تو آپ صلی اللہ علیہ وآلہ وسلم نے اس میں سے نوش فرمایا۔ [مصنف ابن ابي شيبه/كتاب الحج/حدیث: 15255]

حضرت عطاء فرماتے ہیں کہ احرام والا شخص اگر بغیر احرام والے کو شکار کی طرف اشارہ کرے، پھر وہ اس کو نہ پکڑ سکے تو اس کو چاہئے کہ یہ استغفار کرے۔ [مصنف ابن ابي شيبه/كتاب الحج/حدیث: 15256]

حضرت عامر فرماتے ہیں کہ اس طرح کرنے سے اس پر کچھ بھی لازم نہیں ہوگا۔ [مصنف ابن ابي شيبه/كتاب الحج/حدیث: 15257]

حضرت عمر ارشاد فرماتے ہیں کہ تمہاری آخری ذمہ داری (آخری عمل) بیت اللہ کا طواف ہو، اور طواف میں آخری عمل حجر اسود کا استلام یا بوسہ ہو۔ [مصنف ابن ابي شيبه/كتاب الحج/حدیث: 15258]

حضرت حکم فرماتے ہیں کہ میں نے حضرت ابراہیم سے عرض کیا کہ طواف کا آخری عمل کیا ہو؟ آپ نے فرمایا حجر اسود۔ [مصنف ابن ابي شيبه/كتاب الحج/حدیث: 15259]

حضرت مجاہد سے مروی ہے کہ صحابہ کرام اس بات کو پسند کرتے تھے کہ جب وہ واپس جانے لگیں تو ان کا آخری عمل حجر اسود ہو، (استلام یا بوسہ)۔ [مصنف ابن ابي شيبه/كتاب الحج/حدیث: 15260]