حضرت ابن جریج فرماتے ہیں کہ میں نے حضرت عطاء سے عرض کیا اللہ پاک کا ارشاد ہے، { وَالْبُدْنَ جَعَلْنَاہَا لَکُمْ مِنْ شَعَائِرِ اللہِ } البدنہ سے کیا مراد ہے؟ آپ نے فرمایا: اونٹ اور گائے۔ [مصنف ابن ابي شيبه/كتاب الحج/حدیث: 15281]

حضرت سعید بن المسیب فرماتے ہیں کہ اس سے مراد اونٹ اور گائے ہے۔ [مصنف ابن ابي شيبه/كتاب الحج/حدیث: 15282]

حضرت مجاہد فرماتے ہیں البدن صرف اونٹ میں سے ہی ہو۔ [مصنف ابن ابي شيبه/كتاب الحج/حدیث: 15283]

حضرت قاسم بن محمد فرماتے ہیں کہ بکری نسیکہ (عام قربانی) ہونے سے آگے نہیں بڑھتی، بیشک گائے بھی البدن میں شامل ہے۔ [مصنف ابن ابي شيبه/كتاب الحج/حدیث: 15284]

حضرت عبد الکریم فرماتے ہیں کہ حضرت عطاء اور حضرت حکم کا اس بارے میں اختلاف ہوا، حضرت عطاء فرماتے ہیں کہ گائے اور اونٹ میں سے ہو۔ [مصنف ابن ابي شيبه/كتاب الحج/حدیث: 15285]

اور حضرت حکم فرماتے ہیں صرف اونٹ میں سے ہو۔ [مصنف ابن ابي شيبه/كتاب الحج/حدیث: 15286]

حضرت یعقوب سے مروی ہے کہ میرے محلہ کا ایک شخص فوت ہوا اور اس نے وصیت کی کہ اس کی طرف سے بدنہ کی قربانی کی جائے، میں نے حضرت ابن عباس رضی اللہ عنہما سے دریافت کیا کہ گائے ذبح کی جاسکتی ہے؟ آپ نے فرمایا کافی ہوجائے گی، آپ نے پوچھا کہ تو کون سی قوم میں سے ہے؟ میں نے عرض کیا بنو رباح سے، آپ نے فرمایا بنو رباح کے پاس گائے کہاں سے آگئی؟ گائے تو ازد اور قبیلہ عبد قیس کے پاس ہوتی ہیں۔ [مصنف ابن ابي شيبه/كتاب الحج/حدیث: 15287]

حضرت عبد الرحمن بن عوف نبی کریم صلی اللہ علیہ وآلہ وسلم کے ساتھ طواف فرما رہے تھے، حضور صلی اللہ علیہ وآلہ وسلم نے آپ سے فرمایا: کتنے چکر ہوگئے ہیں؟ پھر (بعد میں) فرمایا کہ میں نے تجھ سے اس لیے پوچھا تھا تاکہ تو اچھی طرح یاد کرلے (چکروں کو)۔ [مصنف ابن ابي شيبه/كتاب الحج/حدیث: 15288]

حضرت عبد اللہ بن عمر رضی اللہ عنہما سے صفا ومروہ کی سعی کے متعلق دریافت کیا گیا؟ آپ نے سوال کرنے والے سے فرمایا: صفا سے چکر (سعی) شروع کر اور مروہ پر ختم کر اور اگر چکروں کے بھول جانے کا اندیشہ ہو تو اپنے ساتھ چھوٹے پتھر یا کنکریاں لے لو اور ایک کنکری صفا پر اور دوسری کنکری مروہ پر ڈال دو (اس طرح گننے میں آسانی ہوگی)۔ [مصنف ابن ابي شيبه/كتاب الحج/حدیث: 15289]

حضرت سعید بن جبیر نے ایک خاتون کو دیکھا جو طواف کر رہی تھی اور اس کے ہاتھ میں کنکریاں تھیں جن سے وہ (طواف کے چکروں کو شمار کر رہی تھی) آپ نے اس کے ہاتھ پر (زور سے) مارا۔ [مصنف ابن ابي شيبه/كتاب الحج/حدیث: 15290]