حضرت مجاہد، حضرت عطاء اور حضرت طاؤس مکہ مکرمہ کے مکان کو فروخت کرنے کو ناپسند سمجھتے تھے۔ [مصنف ابن ابي شيبه/كتاب الحج/حدیث: 15321]

حضرت مجاہد فرماتے ہیں کہ مکہ مکرمہ کے مکان فروخت کرنا جائز نہیں ہے۔ [مصنف ابن ابي شيبه/كتاب الحج/حدیث: 15322]

حضرت مجاہد سے مرفوعاً مروی ہے کہ نبی کریم صلی اللہ علیہ وآلہ وسلم نے ارشاد فرمایا: مکہ مکرمہ کے مکان فروخت کرنا جائز نہیں ہیں۔ [مصنف ابن ابي شيبه/كتاب الحج/حدیث: 15323]

حضرت علقمہ بن نضلہ فرماتے ہیں کہ نبی کریم صلی اللہ علیہ وآلہ وسلم کے دور میں اور حضرت صدیق اکبر اور حضرت عمر کے زمانہ میں مکہ مکرمہ کے مکانات کو سوائب (یعنی آزاد، بلا ملکیت) کہا جاتا تھا، کہ جو خود محتاج ہوتا وہ خود اس میں رہتا اور جو مالدار ہوتا وہ دوسروں کو اس میں رہنے کی جگہ دیتا۔ [مصنف ابن ابي شيبه/كتاب الحج/حدیث: 15324]

حضرت عروہ سے مروی ہے کہ نبی کریم صلی اللہ علیہ وآلہ وسلم نے فتح مکہ والے سال مقام جعرانہ سے عمرہ کیا، نبی کریم صلی اللہ علیہ وآلہ وسلم جب عمرہ سے فارغ ہوئے تو حضرت ابوبکر صدیق کو مکہ پر امیر مقرر فرمایا اور ان کو حکم دیا کہ لوگوں کو مناسک حج کی تعلیم دو، اور لوگوں میں یہ اعلان (بھی) کروا دو کہ جو اس سال حج کرے وہ مامون ہے، اور اس سال کے بعد مشرک حج نہیں کرسکتا اور بیت اللہ کا طواف برہنہ ہو کر نہیں کیا جاسکتا۔ [مصنف ابن ابي شيبه/كتاب الحج/حدیث: 15325]

حضرت ابن عباس رضی اللہ عنہما سے مروی ہے ایک دیہاتی خدمت رسول (صلی اللہ علیہ وآلہ وسلم) میں حاضر ہوا اور عرض کیا: اے بنو عبد المطلب کے بیٹے! السلام علیکم، حضور صلی اللہ علیہ وآلہ وسلم نے جواب میں وعلیک کہا۔ پھر اس اعرابی نے کہا کہ میں آپ کے ننہال یعنی قبیلہ بنو سعد بن بکر سے ہوں (یہ قبیلہ حضور کا رضاعی ماموں تھے) اور میں اپنی قوم کا آپ کی طرف بھیجا ہوا قاصد اور ان کا نمائندہ ہوں۔ میں آپ صلی اللہ علیہ وآلہ وسلم کو ایک قسم دینے لگا ہوں اور سوال کرنے لگا ہوں، اس قسم اور سوال کا جواب آپ صلی اللہ علیہ وآلہ وسلم ہی کو دینا ہوگا۔ حضور صلی اللہ علیہ وآلہ وسلم نے فرمایا کہ اے بنی سعد کے بھائی تو خود سے سوال کرلے۔ (یعنی قرابت کی وجہ سے حضور نے اپنے اور اس شخص میں کوئی فرق نہ رکھا)۔ اس نے عرض کیا بیشک ہم نے آپ کی کتاب (مکتوب) میں پایا ہے اور ہمیں آپ صلی اللہ علیہ وآلہ وسلم کے قاصدوں نے حکم دیا ہے کہ ہم لوگ حج بیت اللہ کریں، میں آپ کو قسم دے کر پوچھتا ہوں، کیا آپ صلی اللہ علیہ وآلہ وسلم نے ہمیں اس کا حکم فرمایا ہے؟ آپ صلی اللہ علیہ وآلہ وسلم نے فرمایا، ہاں۔ [مصنف ابن ابي شيبه/كتاب الحج/حدیث: 15326]

حضرت ابن بریدہ فرماتے ہیں کہ ہم مدینہ منورہ آئے تو حضرت عبد اللہ بن عمر رضی اللہ عنہما کے پاس حاضر ہوئے، انھوں نے فرمایا: ہم لوگ نبی کریم صلی اللہ علیہ وآلہ وسلم کی خدمت میں حاضر تھے آپ صلی اللہ علیہ وآلہ وسلم کے پاس ایک عمدہ لباس، اچھی خوشبو اور خوبصورت شکل والا ایک شخص آیا اور عرض کیا: السلام علیک یا رسول اللہ، آپ صلی اللہ علیہ وآلہ وسلم نے جواب ارشاد فرمایا وعلیک، اس نے عرض کیا اے اللہ کے رسول (صلی اللہ علیہ وآلہ وسلم)! کیا میں آپ صلی اللہ علیہ وآلہ وسلم کے قریب آ جاؤں؟ آپ صلی اللہ علیہ وآلہ وسلم نے فرمایا قریب ہو جاؤ، پس وہ تھوڑا آپ صلی اللہ علیہ وآلہ وسلم کے قریب ہوگیا، ہم نے کہا (دل میں) کہ ہم نے آج کے دن کی طرح نہیں دیکھا کوئی شخص عمدہ کپڑوں میں، اور نہ ہی اچھی خوشبو اور خوبصورت چہرے والا اور نہ ہی اس سے زیادہ نبی کریم صلی اللہ علیہ وآلہ وسلم کی توقیر کرنے والا، پھر اس نے عرض کیا: اے اللہ کے رسول (صلی اللہ علیہ وآلہ وسلم)! کیا میں آپ صلی اللہ علیہ وآلہ وسلم کے قریب آ جاؤں؟ آپ صلی اللہ علیہ وآلہ وسلم نے فرمایا: ہاں پس وہ تھوڑا سا قریب آگیا، ہم نے پھر اسی طرح سوچا، پھر اس نے تیسری مرتبہ عرض کیا اے اللہ کے رسول (صلی اللہ علیہ وآلہ وسلم)! کیا میں آپ کے قریب ہو جاؤں؟ آپ صلی اللہ علیہ وآلہ وسلم نے فرمایا ہاں، وہ آپ صلی اللہ علیہ وآلہ وسلم کے اتنا قریب ہوگیا کہ اس کے گھٹنے آپ صلی اللہ علیہ وآلہ وسلم کے مبارک گھٹنوں کے ساتھ مل گئے، اس نے عرض کیا اے اللہ کے رسول! اسلام کیا ہے؟ آپ صلی اللہ علیہ وآلہ وسلم نے فرمایا: نماز قائم کرنا، زکوٰۃ ادا کرنا، رمضان کے روزے رکھنا، حج کرنا غسل جنابت کرنا، اس نے عرض کیا آپ صلی اللہ علیہ وآلہ وسلم نے سچ کہا، ہم نے کہا اللہ کی قسم ہم لوگوں نے آج کے دن کی طرح کبھی کوئی شخص نہیں دیکھا لیکن وہ نبی کریم صلی اللہ علیہ وآلہ وسلم کو تعلیم دے رہا ہے (یا آپ صلی اللہ علیہ وآلہ وسلم اس کو تعلیم دے رہے ہیں)۔ [مصنف ابن ابي شيبه/كتاب الحج/حدیث: 15327]

حضرت سعید بن جبیر سے مروی ہے کہ ایک شخص حضرت ابن عباس رضی اللہ عنہما کی خدمت میں آیا اور عرض کیا کہ میں مروہ سے پہلے صفا پر چڑھوں یا صفا سے پہلے مروہ پر؟ طواف سے پہلے نماز ادا کروں یا نماز سے پہلے طواف کروں؟ حلق سے پہلے قربانی کروں یا قربانی سے پہلے حلق کروں؟ حضرت ابن عباس رضی اللہ عنہما نے ارشاد فرمایا: قرآن پاک کی ترتیب سے ان کو ادا کرو (اور حاصل کرو) بیشک وہ یاد کرنے میں آسان ہے (اور تو اس پر قادر ہے) اللہ تعالیٰ فرماتے ہیں کہ { اِنَّ الصَّفَا وَ الْمَرْوَۃَ مِنْ شَعَآئِرِ اللّٰہِ } پس صفا پر مروہ سے پہلے چڑھو، اللہ تعالیٰ کا ارشاد ہے { وَ لَا تَحْلِقُوْا رُئُ وْسَکُمْ حَتّٰی یَبْلُغَ الْھَدْیُ مَحِلَّہٗ } پس حلق سے پہلے قربانی کرو او اللہ پاک کا ارشاد ہے { وَ طَہِّرْ بَیْتِیَ لِلطَّآئِفِیْنَ وَ الْقَآئِمِیْنَ وَ الرُّکَّعِ السُّجُوْدِ } پس نماز سے پہلے طواف کرو۔ [مصنف ابن ابي شيبه/كتاب الحج/حدیث: 15328]

حضرت علی رضی اللہ عنہ فرماتے ہیں کہ جب سورۃ براءت نازل ہوئی تو نبی کریم صلی اللہ علیہ وآلہ وسلم نے مجھے چار باتوں کے ساتھ بھیجا (کہ میں اعلان کروں کہ) کوئی شخص بیت اللہ کا طواف برہنہ ہو کر نہ کرے، اس سال کے بعد کوئی مشرک مسجد (حرام) کے قریب نہ آئے، اور جس شخص کے اور نبی کریم صلی اللہ علیہ وآلہ وسلم کے درمیان کوئی معاھدہ تھا پس وہ اس مدت تک ہے (جو طے ہوئی تھی) اور جنت میں مسلمان کے علاوہ کوئی داخل نہ ہوگا۔ [مصنف ابن ابي شيبه/كتاب الحج/حدیث: 15329]

حضرت حسین بن عقیل سے مروی ہے کہ مجھے حضرت ضحاک نے مناسک حج لکھوائے۔ [مصنف ابن ابي شيبه/كتاب الحج/حدیث: 15330]