حضرت میمون فرماتے ہیں کہ جو اونٹ کو اپنے اوپر لازم کرے وہ مکہ مکرمہ ہی میں ذبح کرے اور جو اونٹنی کی نذر مانے وہ جہاں چاہے ذبح کرے۔ [مصنف ابن ابي شيبه/كتاب الحج/حدیث: 16111]

حضرت ابراہیم فرماتے ہیں کہ عورت اگر عمرہ کے لئے احرام باندھے پھر اس کو حج کے فوت ہوجانے کا اندیشہ ہو تو وہ حج کے لئے احرام باندھ لے اور عمرہ کی قضا کرے اور اس پر دم اور عمرہ لازم ہے۔ [مصنف ابن ابي شيبه/كتاب الحج/حدیث: 16112]

حضرت ابن ابو نجیح فرماتے ہیں کہ میں نے حضرت مجاہد اور حضرت عطاء سے دریافت کیا کہ عورت عمرہ کا احرام باندھ کر مکہ آئے پھر اس کو حیض آجائے اور اس کو حج کے فوت ہوجانے کا اندیشہ ہو؟ آپ نے فرمایا کہ وہ حج کے لئے تلبیہ پڑھے اور عمرے کی قضا کرے۔ [مصنف ابن ابي شيبه/كتاب الحج/حدیث: 16113]

حضرت حسن اس شخص کے متعلق فرماتے ہیں جو عمرہ کا احرام باندھے اور جب وہ آئے تو لوگ عرفات میں ٹھہرے ہوں تو اگر اس کو یقین ہو کہ مکہ جاسکتا ہے (یعنی جانے سے حج نہیں نکلے گا) تو اپنے عمرہ سے حلال ہوجائے (یعنی مکہ سے عمرہ مکمل کر کے حلالی بن کر آجائے) ورنہ حج کے لئے تلبیہ پڑھے اور دو طواف کرے۔ [مصنف ابن ابي شيبه/كتاب الحج/حدیث: 16114]

حضرت طاؤس فرماتے ہیں کہ اگر خاتون عمرہ کو چھوڑنے والی ہو (اندیشہ کی وجہ سے) تو اس پر دم اور اس عمرہ کی قضا ہے۔ [مصنف ابن ابي شيبه/كتاب الحج/حدیث: 16115]

حضرت ابن سیرین محرم میں عمرہ کرنے کو مستحب خیال کرتے تھے۔ [مصنف ابن ابي شيبه/كتاب الحج/حدیث: 16116]

حضرت ایوب فرماتے ہیں کہ میں نے حضرت سالم بن عبداللہ سے دریافت کیا کہ محرم کا عمرہ یقینی طور پر ہوجائے گا؟ آپ نے فرمایا: ہاں۔ [مصنف ابن ابي شيبه/كتاب الحج/حدیث: 16117]

حضرت ابن عون فرماتے ہیں کہ میں نے حضرت قاسم سے محرم میں عمرہ کے متعلق دریافت کیا؟ آپ نے فرمایا کہ صحابہ کرام اس کو عمرہ تامہ سمجھتے تھے۔ [مصنف ابن ابي شيبه/كتاب الحج/حدیث: 16118]

حضرت ایوب فرماتے ہیں کہ میں نے حضرت سلیمان بن یسار اور سالم بن عبداللہ سے محرم کے عمرہ کے متعلق دریافت کیا؟ آپ نے فرمایا کہ یہ مکمل ہے اس کو ادا کیا جائے گا۔ [مصنف ابن ابي شيبه/كتاب الحج/حدیث: 16119]

حضرت طاؤس سے محرم کے عمرہ کے متعلق دریافت کیا گیا؟ آپ نے فرمایا: رب کعبہ کی قسم مجھے نہیں معلوم یہ کیا ہے (اس کی کیا حیثیت ہے) [مصنف ابن ابي شيبه/كتاب الحج/حدیث: 16120]