حضرت مجاہد اور حضرت عطاء فرماتے ہیں کہ آٹھ ذی الحجہ کو حج کا احرام نہ باندھے، جب تک منیٰ کی طرف متوجہ نہ ہو۔ [مصنف ابن ابي شيبه/كتاب الحج/حدیث: 16413]

حضرت اسماعیل بن عبد الملک فرماتے ہیں کہ حضرت سعید بن جبیر آٹھ ذی الحجہ کو چلتے ہوئے نکلے میں آپ کے ساتھ تھا، آپ مسجد میں داخل ہوئے اور دو رکعتیں ادا فرمائیں پھر آپ مسجد سے نکلے اور جب منیٰ جانے لگے تو تلبیہ پڑھنا شروع کردیا۔ [مصنف ابن ابي شيبه/كتاب الحج/حدیث: 16414]

حضرت ابن عباس رضی اللہ عنہما فرماتے ہیں کہ اے مکہ والو! کوئی حرج نہیں ہے اگر تم عمرہ نہ کرو، پس اگر کرنا چاہو تو اپنے اور حرم کے درمیان بطن وادی کو رکھو۔ [مصنف ابن ابي شيبه/كتاب الحج/حدیث: 16415]

حضرت ابراہیم فرماتے ہیں کہ مکہ مکرمہ والے عمرہ کے لیے تو نکلیں گے اور حج کے لیے اپنی جگہ سے ہی احرام باندھیں گے۔ [مصنف ابن ابي شيبه/كتاب الحج/حدیث: 16416]

حضرت سالم فرماتے ہیں کہ اگر میں مکہ مکرمہ کا رہائشی ہوتا تو عمرہ نہ کرتا۔ [مصنف ابن ابي شيبه/كتاب الحج/حدیث: 16417]

حضرت عطاء فرماتے ہیں کہ مکہ مکرمہ کے رہنے والوں پر عمرہ نہیں ہے عمرہ تو وہ کرتا ہے جو بیت اللہ کی زیارت اور اس کا طواف کرنے کا خواہشمند ہو، اور مکہ مکرمہ والے تو جب چاہیں طواف کرسکتے ہیں۔ [مصنف ابن ابي شيبه/كتاب الحج/حدیث: 16418]

حضرت عطاء فرماتے ہیں کہ مکہ مکرمہ والوں پر عمرہ نہیں ہے، عمرہ تو وہ کرتا ہے جو بیت اللہ کا طواف کرنے کے لیے اس کی زیارت کرے، اور مکہ مکرمہ والے تو جب چاہیں طواف کرسکتے ہیں۔ [مصنف ابن ابي شيبه/كتاب الحج/حدیث: 16419]

حضرت عطاء فرماتے ہیں کہ مکہ مکرمہ والوں پر عمرہ نہیں ہے، حضرت ابن عباس رضی اللہ عنہما فرماتے ہیں کہ اے مکہ والو! تم پر عمرہ نہیں ہے، بیشک تمہارا عمرہ تو بیت اللہ کا طواف ہے، پس جو شخص اپنے اور حرم کے درمیان بطن وادی کو کر لے وہ احرام کے بغیر مکہ مکرمہ میں داخل نہ ہو۔ [مصنف ابن ابي شيبه/كتاب الحج/حدیث: 16420]

حضرت ابن جریج فرماتے ہیں کہ میں نے حضرت عطاء سے دریافت کیا کہ کیا حضرت ابن عباس رضی اللہ عنہما کی مراد یہ ہے کہ وادی حل میں سے ہے؟ آپ نے فرمایا بطن وادی حل ہی میں سے ہے۔ [مصنف ابن ابي شيبه/كتاب الحج/حدیث: 16421]

حضرت طاؤس فرماتے ہیں کہ مکہ والوں پر عمرہ نہیں ہے۔ [مصنف ابن ابي شيبه/كتاب الحج/حدیث: 16422]