حضرت ابو ذر فرماتے ہیں کہ حج تمتع کرنا نبی کریم صلی اللہ علیہ وآلہ وسلم کے صحابہ کے لیے خاص تھا۔ [مصنف ابن ابي شيبه/كتاب الحج/حدیث: 16523]

حضرت ابو ذر فرماتے ہیں کہ کسی شخص کے لیے یہ نہیں ہے کہ وہ حج کے لیے احرام باندھنے کے بعد اس کو عمرہ میں تبدیل کر دے، سوائے ان لوگوں کے جو نبی کریم صلی اللہ علیہ وآلہ وسلم کے ساتھ تھے۔ [مصنف ابن ابي شيبه/كتاب الحج/حدیث: 16524]

حضرت ابن زبیر نے ارشاد فرمایا: صرف حج کیا کرو، اور اپنے اس نابینا کی بات چھوڑ دو، یہ بات جب حضرت ابن عباس رضی اللہ عنہما تک پہنچی تو آپ نے ارشاد فرمایا: اے وہ شخص جس کے دل اور آنکھوں کو اللہ تعالیٰ نے اندھا کردیا ہے، کیا تو نے اپنی والدہ سے دریافت نہیں کیا؟ پس انہوں نے والدہ سے دریافت کیا تو انہوں نے فرمایا کہ ہم لوگ نبی کریم صلی اللہ علیہ وآلہ وسلم کے ساتھ حج کے لیے نکلے، آپ صلی اللہ علیہ وآلہ وسلم نے ہمیں حکم دیا، پس ہم پوری طرح حلال ہوگئے، یہاں تک کہ مردوں اور عورتوں کے درمیان انگیٹھیوں سے خوشبو کا دھواں بلند ہوگیا۔ [مصنف ابن ابي شيبه/كتاب الحج/حدیث: 16525]

حضرت عطاء فرماتے ہیں کہ حرم کے کبوتر جب حرم سے نکل جائیں تو پھر اگر چاہو تو شکار کرسکتے ہو۔ [مصنف ابن ابي شيبه/كتاب الحج/حدیث: 16526]

حضرت عروہ فرماتے ہیں کہ حرم کے کبوتر جب حرم سے باہر نکل جائیں تو ان کو شکار کرنے میں کوئی حرج نہیں ہے۔ [مصنف ابن ابي شيبه/كتاب الحج/حدیث: 16527]

حضرت عطاء اور حضرت طاؤس فرماتے ہیں کہ اگر کوئی شخص طواف میں آٹھ چکر لگا لے اور اس کو دو رکعتیں ادا کرنے سے قبل ہی یاد آجائے تو وہ ایک طواف اور کرے جس میں چھ چکر لگائے اور اس کے بعد پھر چار رکعتیں ادا کرے اور اگر اس کو دو رکعتیں ادا کرنے کے بعد یاد آئے تو پھر طواف کے چھ چکر اور لگائے اور دو رکعتیں اور ادا کرے اور اگر چاہے تو ان کو شمار نہ کرے۔ [مصنف ابن ابي شيبه/كتاب الحج/حدیث: 16528]

حضرت حسن فرماتے ہیں کہ اگر طواف کے آٹھ چکر لگا لیے جائیں تو (بھی) دو رکعتیں ادا کی جائیں گی۔ [مصنف ابن ابي شيبه/كتاب الحج/حدیث: 16529]

حضرت سعید بن جبیر سے دریافت کیا گیا محرم کے لیے کھجور کھانا کیسا ہے؟ آپ نے دریافت فرمایا اس میں کون سی حرج والی بات ہے؟ فرمایا اس میں کیڑے ہیں، آپ نے فرمایا کھجور کو کھالو اور کیڑوں کو مت کھاؤ۔ [مصنف ابن ابي شيبه/كتاب الحج/حدیث: 16530]

حضرت حکم اور حضرت حماد سے محرم کے توشح کرنے کے متعلق روایت ہے کہ ان میں سے ایک اس کو ناپسند کرتے تھے اور دوسرے اس طرح کرنے میں کوئی حرج نہ سمجھتے تھے۔ [مصنف ابن ابي شيبه/كتاب الحج/حدیث: 16531]

حضرت عطاء سے دریافت کیا گیا کہ اگر کوئی شخص طواف کے چھ چکر لگا لے اور دو رکعتیں ادا کرلے؟ آپ نے فرمایا وہ ایک طواف اور کرے اور دو رکعتیں اور ادا کرے۔ [مصنف ابن ابي شيبه/كتاب الحج/حدیث: 16532]