حضرت طلحہ حضرت حماد کو ملے اور فرمایا: آپ کا عمل (عمرہ) قبول ہو۔ [مصنف ابن ابي شيبه/كتاب الحج/حدیث: 16553]

حضرت ابن عمر رضی اللہ عنہما نے ایک شخص کو دعا دی جب وہ حج کرے آیا کہ: اللہ تعالیٰ تیرے عمل کو قبول کرے، اور تیرے اجر کو بڑھائے اور تیرے نفقہ کا بہتر بدلہ تجھے عطا کرے۔ [مصنف ابن ابي شيبه/كتاب الحج/حدیث: 16554]

حضرت عبد اللہ بن السائب سے مروی ہے کہ میں نے نبی کریم صلی اللہ علیہ وآلہ وسلم کو رکن یمانی اور حجر اسود کے درمیان یہ دعا کرتے ہوئے سنا کہ اے اللہ ہمیں دنیا اور آخرت میں بھلائی عطا فرما اور آگ کے عذاب سے بچا۔ [مصنف ابن ابي شيبه/كتاب الحج/حدیث: 16555]

حضرت ابن عباس رضی اللہ عنہما رکن یمانی اور مقام ابراہیم کے درمیان یہ دعا کبھی نہیں چھوڑا کرتے تھے کہ اے میرے رب تو نے جو رزق مجھے عطا فرمایا ہے مجھے اس پر قناعت کی توفیق عطا فرما اور اس میں میرے لیے برکت پیدا فرما۔ جو کچھ بھی ضائع یا کم ہوجائے تو اس کا بہتر بدل عطا فرما۔ [مصنف ابن ابي شيبه/كتاب الحج/حدیث: 16556]

حضرت محمد بن اسحاق سے مروی ہے کہ مکہ کی ایک عمر رسیدہ خاتون فرماتی ہیں کہ جب حضرت ابن عفان کی شہادت ہوئی اس وقت میں چودہ سال کی لڑکی تھی، میں نے کعبہ کو اس حال میں دیکھا کہ اس پر کوئی چادر وغیرہ نہ تھی مگر جو لوگوں نے اس پر چڑھا دیا تھا، ایک سرخ رنگ کی چادر جو لوگوں نے اس پر ڈال دی تھی اور سفید کپڑا، اور اونی چادر، اور جو چیز بھی اسے پہنائی جاتی وہ اس پر لٹکا دی جاتی تھی۔ تحقیق میں نے بیت اللہ کو اس حال میں دیکھا کہ اس پر کوئی سونا، چاندی نہ تھا۔ [مصنف ابن ابي شيبه/كتاب الحج/حدیث: 16557]

حضرت محمد فرماتے ہیں کہ حضرت ابوبکر اور حضرت عمر رضی اللہ عنہما کے دور میں خانہ کعبہ پر غلاف نہیں چڑھایا جاتا تھا، اور حضرت عمر بن عبد العزیز نے اس پر وصائل اور قبطی چادریں (غلاف) چڑھائیں، اور وصائل یمنی کپڑے ہیں۔ [مصنف ابن ابي شيبه/كتاب الحج/حدیث: 16558]

حضرت ابن عمر رضی اللہ عنہما جب خانہ کعبہ کو غلاف وغیرہ نہیں پہنایا جاتا تھا تو ابن عمر رضی اللہ عنہما اپنی قربانی ک ے جانور کا کپڑا یا جل کو قربانی کرنے سے قبل اتار کر خانہ کعبہ کے خزانہ میں جمع کرا دیتے تھے تاکہ اس کو خانہ کعبہ پر چڑھا دیا جائے، پھر جب کعبہ پر غلاف چڑھایا جانے لگا تو آپ نے اس عمل کو ترک فرما دیا۔ [مصنف ابن ابي شيبه/كتاب الحج/حدیث: 16559]

حضرت لیث سے مروی ہے کہ نبی کریم صلی اللہ علیہ وآلہ وسلم کے زمانے میں چمڑے اور ٹاٹ کا غلاف خانہ کعبہ پر چڑھایا جاتا تھا۔ [مصنف ابن ابي شيبه/كتاب الحج/حدیث: 16560]

ابراہیم سے مروی ہے کہ اسلاف جب کسی مریض کے پاس آتے جس نے حج نہ کیا ہو تو اس کو اونٹ کی قربانی کا حکم فرماتے۔ [مصنف ابن ابي شيبه/كتاب الحج/حدیث: 16561]

ابراہیم فرماتے ہیں کہ اسلاف اس بات کو پسند فرماتے تھے کہ جب حج نہ کرسکے تو قربانی کی وصیت کر دے۔ [مصنف ابن ابي شيبه/كتاب الحج/حدیث: 16562]