حضرت طاؤس فرماتے ہیں کہ جو کچھ لوگ خرچ کرتے ہیں ان میں سے سب سے زیادہ اجر اس خون کا ہے جو یوم النحر میں بہایا جاتا ہے، سوائے اس کے کہ کوئی رشتہ دار محتاج ہو اس کے ساتھ صلہ رحمی کرنا اس سے زیادہ ثواب واجر والا کام ہے۔ [مصنف ابن ابي شيبه/كتاب الحج/حدیث: 13660]

حضرت حسین بن علی رضی اللہ عنہ فرماتے ہیں کہ میں مدینہ میں کسی گھرانے پر روزانہ ایک صاع یا دو صاع مہینے میں خرچ کروں یہ مجھے اس سے زیادہ پسند ہے کہ میں حج پر حج کرتا جاؤں۔ [مصنف ابن ابي شيبه/كتاب الحج/حدیث: 13661]

حضرت ضحاک فرماتے ہیں کہ اللہ تعالیٰ کے نزدیک ادائے فریضہ کے بعد سب سے محبوب عمل مسکین کو کھانا کھلانا ہے۔ [مصنف ابن ابي شيبه/كتاب الحج/حدیث: 13662]

حضرت سنان بن سلمہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: نفلی قربانی کو خود نہیں کھائے گا اگر کھالیا تو جرمانہ ادا کرنا پڑے گا۔ [مصنف ابن ابي شيبه/كتاب الحج/حدیث: 13663]

حضرت علی رضی اللہ عنہ اور حضرت عبد اللہ فرماتے ہیں کہ نفلی قربانی کو اگر کھالے تو جرمانہ لازم ہوگا۔ [مصنف ابن ابي شيبه/كتاب الحج/حدیث: 13664]

حضرت عمر ارشاد فرماتے ہیں کہ جو شخص نفلی قربانی بھیجے اور وہ (راستے میں) ہلاک ہونے لگے تو اسے حرم سے پہلے ہی ذبح کردے اور خود اس میں سے کچھ نہ کھائے، اگر اس نے خود کھالیا تو اس پر اس کا بدل لازم ہے۔ [مصنف ابن ابي شيبه/كتاب الحج/حدیث: 13665]

حضرت علقمہ فرماتے ہیں کہ حضرت عبد اللہ نے میرے ساتھ قربانی کا جانور بھیجا اور مجھے حکم دیا کہ اس کو جب ذبح کروں تو ایک تہائی صدقہ کروں اور ایک تہائی خود کھاؤں اور ایک تہائی ان کے بھائی عتبہ کے گھر بھیج دوں۔ [مصنف ابن ابي شيبه/كتاب الحج/حدیث: 13666]

حضرت سعید بن المسیب قربانی کے اونٹ کے متعلق فرماتے ہیں کہ اس پر نفل میں کچھ لازم نہیں ہے مگر یہ کہ وہ اس کے بارے میں کوئی حکم دے یا وہ خود اس میں سے کھالے یا کسی کو کھلائے، اگر وہ ایسا کرے گا تو اس پر اس کا بدل لازم ہے۔ [مصنف ابن ابي شيبه/كتاب الحج/حدیث: 13667]

حضرت جابر بن زید فرماتے ہیں کہ جب تو نے نفلی قربانی میں سے خود کھالیا تو جرمانہ اور بدل لازم ہوگیا۔ [مصنف ابن ابي شيبه/كتاب الحج/حدیث: 13668]

حضرت لیث فرماتے ہیں کہ میرے پاس قربانی کا جانور تھا جو مساکین کے صدقہ کے لیے تھا، پس مجھے حکم دیا کہ میں اس میں سے خود بھی کھاؤں اور ذخیرہ بھی کروں۔ [مصنف ابن ابي شيبه/كتاب الحج/حدیث: 13669]