حضرت قاسم بن محمد سے دریافت کیا گیا کہ ایک عورت نے یوم النحر میں بیت اللہ کا طواف کیا پھر نکلنے سے قبل اس کو حیض آگیا؟ آپ نے فرمایا: اللہ تعالیٰ حضرت عمر پر رحم فرمائے، تمام صحابہ کرام فرماتے ہیں کہ وہ فارغ ہوچکی ہے سوائے حضرت عمر کے، وہ فرماتے ہیں اس کا آخری عمل بیت اللہ کا طواف ہو۔ [مصنف ابن ابي شيبه/كتاب الحج/حدیث: 13650]

حضرت طاؤس فرماتے ہیں کہ میں نے حضرت ابن عباس رضی اللہ عنہما کو کبھی نہیں دیکھا کہ ابن عباس رضی اللہ عنہما سے کسی نے مخالفت کی ہو تو انہوں نے اس شخص کو چھوڑ دیا ہو جب تک کہ مسئلہ کو اس کے سامنے ثابت نہ کرلیتے، حضرت جابر بن عبد اللہ رضی اللہ عنہ نے اس عورت کے بارے میں جس کو طواف کے بعد حیض آیا ہو آپ کی مخالفت کی (اختلاف کیا) حضرت ابن عباس رضی اللہ عنہما نے فرمایا وہ نکلے گی، پھر اس عورت کو بلایا جس کے ساتھ یہ معاملہ پیش آیا تھا، اس عورت نے حضرت ابن عباس رضی اللہ عنہما کے قول کی موافقت کی۔ [مصنف ابن ابي شيبه/كتاب الحج/حدیث: 13651]

حضرت سعد بن مالک سے دریافت کیا گیا کہ عورت کو یوم النحر میں طواف کرنے کے بعد حیض آجائے؟ آپ نے فرمایا وہ واپس لوٹے گی۔ [مصنف ابن ابي شيبه/كتاب الحج/حدیث: 13652]

حضرت عبداللہ بن عمر کا قول یہ تھا کہ حائضہ عورت اگر یوم النحر کو طواف کرچکی ہو تب بھی اسے سات دن تک مکہ میں روکتے تھے تاکہ وہ کوچ کرنے کے دن کا طواف بھی کرلے۔ [مصنف ابن ابي شيبه/كتاب الحج/حدیث: 13653]

حضرت یزید بن ہانی فرماتے ہیں کہ ایک عورت نے طواف کیا پھر اس کو طواف کے بعد یوم النحر میں حیض آگیا، حضرت حسن ابن علی رضی اللہ عنہ سے دریافت کیا گیا؟ آپ نے فرمایا وہ نکلے گی (واپس لوٹے گی حج مکمل ہوگیا ہے)۔ [مصنف ابن ابي شيبه/كتاب الحج/حدیث: 13654]

حضرت حارث بن عبد اللہ فرماتے ہیں کہ میں نے حضرت عمر سے دریافت کیا کہ عورت کو اگر طواف کے بعد حیض آجائے؟ آپ نے فرمایا: لیکن اس کا آخری عمل طواف ہونا چاہئے، حضرت حارث نے فرمایا: آپ صلی اللہ علیہ وآلہ وسلم نے تو اسی طرح مجھے بتلایا تھا، حضرت عمر نے ان کو بددعا دی اور فرمایا: تو مجھ سے اس چیز کے متعلق سوال کرتا ہے جس کے متعلق تو نبی کریم صلی اللہ علیہ وآلہ وسلم سے سوال کرچکا ہے تاکہ میں اس کی مخالفت کر جاؤں؟ [مصنف ابن ابي شيبه/كتاب الحج/حدیث: 13655]

حضرت جابر بن زید فرماتے ہیں کہ روزہ اور نماز بدن کو مشقت میں ڈالتے ہیں اور مال کو مشقت میں نہیں ڈالتے، اور صدقہ مال کو مشقت میں ڈالتا ہے اور بدن کو مشقت میں نہیں ڈالتا، اور میں اس راستے سے بڑھ کر کوئی چیز نہیں جانتا جو مال اور بدن دونوں کو مشقت میں ڈالے، یعنی حج۔ [مصنف ابن ابي شيبه/كتاب الحج/حدیث: 13656]

حضرت ابراہیم فرماتے ہیں صحابہ کرام بار بار حج کرنے سے صدقہ کرنے کو افضل سمجھتے تھے۔ [مصنف ابن ابي شيبه/كتاب الحج/حدیث: 13657]

حضرت حجاج سے دریافت کیا گیا کہ ایک شخص مناسک حج ادا کرچکا ہے تو اب وہ دوبارہ حج کرے یا غلام آزاد کرے؟ آپ نے فرمایا نہیں بلکہ وہ غلام آزاد کرے۔ [مصنف ابن ابي شيبه/كتاب الحج/حدیث: 13658]

حضرت شعبی کے پاس ان کا ایک پڑوسی آیا اور عرض کیا کہ میں حج کے لیے جانے کی تیاری کرچکا ہوں لیکن میرے کچھ پاک دامن پڑوسی ہیں جو محتاج ہیں، آپ کی کیا رائے ہے؟ میں اپنا کرایہ اور سامان وغیرہ ان کو دے دوں یا حج کے لیے چلا جاؤں؟ آپ نے فرمایا: اللہ کی قسم صدقہ کا اجر بہت زیادہ ہے لیکن میرے نزدیک حج کے ان مقامات میں سے کسی ایک مقام پر ٹھہرنے کے برابر کوئی چیز بھی نہیں ہوسکتی۔ [مصنف ابن ابي شيبه/كتاب الحج/حدیث: 13659]