حضرت عطاء، حضرت طاؤس اور حضرت مجاہد فرماتے ہیں ھدی کا اشعار کرنا ضروری نہیں۔ [مصنف ابن ابي شيبه/كتاب الحج/حدیث: 13680]

حضرت عطاء، حضرت طاؤس اور حضرت مجاہد فرماتے ہیں کہ اگر تو چاہے تو جانور کا اشعار کر اور اگر چاہے تو نہ کر۔ [مصنف ابن ابي شيبه/كتاب الحج/حدیث: 13681]

حضرت عائشہ رضی اللہ عنہا سے دریافت کیا گیا کہ قربانی کے اونٹ کا اشعار کیا جائے گا؟ آپ نے فرمایا کہ اگر چاہے تو اشعار کرلے، اشعار تو صرف اس لیے کیا جاتا ہے تاکہ معلوم ہوجائے یہ قربانی کا اونٹ ہے۔ [مصنف ابن ابي شيبه/كتاب الحج/حدیث: 13682]

حضرت ابن عمر رضی اللہ عنہما فرماتے ہیں کہ جانور قربانی کے لیے نہیں ہوتا جب تک کہ اس کو قلادہ نہ ڈالا جائے اور اس کا اشعار نہ کردیا جائے اور اسے عرفہ میں کھڑا نہ کردیا جائے۔ [مصنف ابن ابي شيبه/كتاب الحج/حدیث: 13683]

حضرت عطاء اور حضرت عبد الرحمن بن اسود فرماتے ہیں کہ ھدی کو جھول پہنائے اور پھر اشعار کرے۔ [مصنف ابن ابي شيبه/كتاب الحج/حدیث: 13684]

حضرت عائشہ رضی اللہ عنہا سے مروی ہے کہ نبی کریم صلی اللہ علیہ وآلہ وسلم نے ھدی کا اشعار فرمایا تھا۔ [مصنف ابن ابي شيبه/كتاب الحج/حدیث: 13685]

حضرت سعید بن جبیر فرماتے ہیں کہ ھدی کے اونٹ کو قلادہ بھی ڈالا جائے گا اشعار بھی کیا جائے گا اور ھدی کی گائے کو صرف قلادہ ڈالا جائے گا اس کا اشعار نہیں کیا جائے گا اور ھدی کی بکری کو نہ قلادہ ڈالے گا اور نہ اس کا اشعار کرے گا۔ [مصنف ابن ابي شيبه/كتاب الحج/حدیث: 13686]

حضرت ابن عباس رضی اللہ عنہما فرماتے ہیں کہ اگر چاہو تو ھدی کے جانور کا اشعار کرلو اور اگر چاہے تو نہ کرو، (ضروری نہیں ہے)۔ [مصنف ابن ابي شيبه/كتاب الحج/حدیث: 13687]

حضرت عطاء سے مروی ہے کہ ایک شخص نے کبوتر اور اس کے بچوں پر دروازہ بند کیا اور منیٰ اور عرفات چلا گیا پھر جب واپس لوٹا تو وہ کبوتر اور بچے مرچکے تھے، وہ شخص حضرت ابن عمر رضی اللہ عنہما کی خدمت میں حاضر ہوا اور ان سے ذکر کیا آپ نے اس پر تین بکریوں کا دینا لازم قرار دیا اور ایک اور شخص نے ان کے ساتھ حکم لگایا۔ [مصنف ابن ابي شيبه/كتاب الحج/حدیث: 13688]

حضرت عطاء بن السائب سے مروی ہے کہ ہم لوگ ایک گھر میں آئے اور گھر میں ایک کبوتر کو قید کردیا جس سے کبوتر مرگیا، ہم نے حضرت عطاء سے دریافت کیا تو آپ نے فرمایا اس میں بکری دیناپڑے گی۔ [مصنف ابن ابي شيبه/كتاب الحج/حدیث: 13689]