حضرت ابراہیم فرماتے ہیں کہ صحابہ کرام جو چیز اللہ تعالیٰ کے لیے قربان کرتے تھے پھر اس میں سے خود تناول نہ کرتے تھے، پھر ان کو اجازت دے دی گئی کہ وہ ھدی اور قربانی کے جانور اور اس جیسی دوسری چیزوں کو خود بھی کھا سکتے ہیں۔ [مصنف ابن ابي شيبه/كتاب الحج/حدیث: 13670]

حضرت عطاء، حضرت طاؤس اور حضرت مجاہد فرماتے ہیں کہ محرم فدیہ اور شکار کی جزاء میں سے نہیں کھائے گا۔ [مصنف ابن ابي شيبه/كتاب الحج/حدیث: 13671]

حضرت ابن عمر رضی اللہ عنہما فرماتے تھے کہ اگر اونٹ راستے میں تھک جائے یا اس کا پاؤں ٹوٹ جائے تو اس کا مالک اس میں سے خود بھی کھا سکتا ہے اور دوسروں کو بھی کھلا سکتا ہے، اس پر اس کا بدل لازم نہیں ہے، ہاں اگر وہ نذر یا شکار کے بدلے کا جانور ہو تو پھر اگر کھالیا تو بدل لازم آئے گا۔ [مصنف ابن ابي شيبه/كتاب الحج/حدیث: 13672]

حضرت عطاء فرماتے ہیں کہ جو جانور شکار کی جزاء ہو یا قربانی کے لیے یا مساکین کے لیے نذر ہو تو اس میں سے خود نہیں کھائے گا۔ [مصنف ابن ابي شيبه/كتاب الحج/حدیث: 13673]

حضرت ابراہیم فرماتے ہیں کہ شکار کے جزاء میں دی جانے والی قربانی میں سے خود نہیں کھائے گا۔ [مصنف ابن ابي شيبه/كتاب الحج/حدیث: 13674]

حضرت سعید بن جبیر ارشاد فرماتے ہیں کہ جو قربانی نذر کی ہو یا کفارہ کی ہو یا مساکین کے لیے ہو اس میں سے خود نہ کھائے۔ [مصنف ابن ابي شيبه/كتاب الحج/حدیث: 13675]

حضرت علی رضی اللہ عنہ فرماتے ہیں کہ نذر کی قربانی میں سے اور شکار کی جزاء میں سے اور جو مساکین کے لیے مقرر کردیا گیا ہو اس میں سے نہ کھایا جائے۔ [مصنف ابن ابي شيبه/كتاب الحج/حدیث: 13676]

حضرت ابن عباس رضی اللہ عنہما فرماتے ہیں کہ شکار کرنے کے بدلے جو قربانی کی جائے اس میں سے خود نہ کھائے۔ [مصنف ابن ابي شيبه/كتاب الحج/حدیث: 13677]

حضرت ابن عباس رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے ھدی کے کوہان کے داہنی طرف اشعار کیا اور اس سے خون کو دور کردیا۔ [مصنف ابن ابي شيبه/كتاب الحج/حدیث: 13678]

حضرت مسور بن مخرمہ اور مروان بن حکم سے مروی ہے کہ نبی کریم صلی اللہ علیہ وآلہ وسلم نے حدیبیہ کے سال ھدی کو قلادہ ڈالا اور اس کا اشعار کیا۔ [مصنف ابن ابي شيبه/كتاب الحج/حدیث: 13679]