حضرت محمد فرماتے ہیں کہ نبی کریم صلی اللہ علیہ وآلہ وسلم کے صحابہ کرام ایک دوسرے کو ساتھ لے جا کر حج کرواتے تھے، اور یہ حج ان کی طرف سے ادا ہوجاتا تھا۔ [مصنف ابن ابي شيبه/كتاب الحج/حدیث: 14000]

حضرت اسلم جو حضرت عمر کے غلام ہیں فرماتے ہیں کہ حضرت عمر نے ذوالحلیفہ میں خوشبو سونگھی تو دریافت فرمایا یہ کس سے آرہی ہے؟ حضرت معاویہ نے عرض کیا مجھ سے، حضرت عمر نے فرمایا: میری عمر کی قسم کیا تجھ سے؟ حضرت معاویہ نے عرض کیا، اے امیر المؤمنین! میرے متعلق جلد بازی سے کام نہ لیں، بیشک حضرت ام حبیبہ نے مجھے خوشبو لگائی اور مجھے قسم دی ہے، حضرت عمر نے فرمایا، میں بھی تمہیں قسم دیتا ہوں کہ آپ ان کے پاس واپس جاؤ اور ان کو چاہئے کہ جس طرح انہوں نے آپ کو خوشبو لگائی ہے اسی طرح اس کو دھو دیں، حضرت اسلم فرماتے ہیں کہ حضرت معاویہ حضرت ام حبیبہ کی طرف لوٹے یہاں تک کہ راستہ میں ہی ان کے ساتھ آملے۔ [مصنف ابن ابي شيبه/كتاب الحج/حدیث: 14001]

حضرت عمر نے کپڑا منگوایا تو آپ کے پاس وہ کپڑا لایا گیا جس پر خوشبو لگی ہوئی تھی آپ نے اس کو واپس کردیا۔ [مصنف ابن ابي شيبه/كتاب الحج/حدیث: 14002]

حضرت ابراہیم نے ایک شخص کو احرام پہنتے ہوئے خوشبو لگاتے ہوئے دیکھا تو آپ نے اس کو مٹی کے ساتھ سر دھونے کا حکم فرمایا۔ [مصنف ابن ابي شيبه/كتاب الحج/حدیث: 14003]

حضرت عبد الرحمن فرماتے ہیں کہ میں نے ایک بار حج کیا تو میں نے حضرت عبد الرحمن بن عمرو بن العاص کو پایا، جب احرام کا وقت آیا تو ہم نے کچھ خوشبو لگا لی، حضرت عبد الرحمن نے مجھ سے فرمایا: کاش آپ ایسا نہ کرتے، بیشک میں نے ایک بار حضرت عثمان بن ابو العاص کے ساتھ حج کیا اور انہوں نے مقام منجشانیہ سے جو بصرہ کے قریب ہے احرام باندھا، اور ہمیں فرمایا: یہ سفید مٹی استعمال کرو اور احرام باندھتے وقت اس سے اپنے سر دھو لو۔ [مصنف ابن ابي شيبه/كتاب الحج/حدیث: 14004]

حضرت محمد اس بات کو ناپسند کرتے تھے کہ کوئی شخص احرام باندھتے وقت خوشبو لگائے۔ [مصنف ابن ابي شيبه/كتاب الحج/حدیث: 14005]

حسن سے بھی اسی طرح مروی ہے، اور وہ اس بات کو پسند کرتے تھے کہ آدمی پراگندہ بال اور غبار آلود ہو کر آئے۔ [مصنف ابن ابي شيبه/كتاب الحج/حدیث: 14006]

حضرت عطاء اس بات کو ناپسند کرتے تھے کہ کوئی شخص احرام باندھتے وقت خوشبو لگائے، اور فرماتے کہ اگر اس کو خوشبو لگی ہو تو اس کو چاہئے کہ اس کو دھو لے اور صاف کرلے۔ [مصنف ابن ابي شيبه/كتاب الحج/حدیث: 14007]

حضرت ابن عمر رضی اللہ عنہما جب احرام باندھنے کا ارادہ فرماتے تو پندرہ دن پہلے ہی کپڑوں کو دھونی دینا ترک کردیتے۔ [مصنف ابن ابي شيبه/كتاب الحج/حدیث: 14008]

حضرت سعید بن جبیر اس بات کو ناپسند فرماتے تھے کہ محرم احرام باندھتے وقت ایسا تیل لگائے جس میں مشک، افواہ یا عنبر ہو۔ [مصنف ابن ابي شيبه/كتاب الحج/حدیث: 14009]