حضرت جعفر فرماتے ہیں کہ میرے والد اور حضرت عمرو بن دینار حرم سے باہر اپنی زمینوں پر تشریف لے گئے پھر بغیر احرام کے مکہ میں واپس تشریف لے آئے۔ [مصنف ابن ابي شيبه/كتاب الحج/حدیث: 14030]

حضرت زہری فرماتے ہیں بغیر احرام کے مکہ مکرمہ میں داخل ہونے میں کوئی حرج نہیں۔ [مصنف ابن ابي شيبه/كتاب الحج/حدیث: 14031]

حضرت عطاء فرماتے ہیں کہ نبی کریم صلی اللہ علیہ وآلہ وسلم نے طواف کے سات چکر لگائے اور پھر دو رکعتیں ادا فرمائیں اور اپنی زندگی میں اسی طرح کیا۔ [مصنف ابن ابي شيبه/كتاب الحج/حدیث: 14032]

حضرت عطاء فرماتے ہیں کہ اگر کوئی شخص طواف کرے تو مجھے یہ بات پسند نہیں ہے کہ وہ دو رکعات سے زائد ادا کرے، اور اگر کوئی شخص زائد رکعات ادا کر بھی لے تو کوئی حرج نہیں، اور اگر کوئی شخص خانہ کعبہ کا دروازہ کھلا ہوا پائے تو وہ صفا ومروہ کی سعی سے پہلے کعبہ میں داخل نہ ہو۔ [مصنف ابن ابي شيبه/كتاب الحج/حدیث: 14033]

حضرت عمر بن خطاب ارشاد فرماتے ہیں کہ (اس مخلوق کو بھی) اپنی بیویوں کو حج کرواؤ، اور ایسا نہ کرو کہ ان کا رزق تو کھاتے رہو اور ان کی رسیاں ان ہی کی گردنوں میں چھوڑ دو۔ [مصنف ابن ابي شيبه/كتاب الحج/حدیث: 14034]

حضرت عطاء فرماتے ہیں کہ مرد کے ذمہ بیوی کو حج کروانا لازم نہیں ہے اگر چاہے تو کروا سکتا ہے۔ [مصنف ابن ابي شيبه/كتاب الحج/حدیث: 14035]

امام اوزاعی فرماتے ہیں کہ حضرت یحییٰ بن ابی کثیر نے فرمایا: اگر عورت نے حج نہ کیا ہو تو مرد کے ذمہ اس کو حج کروانا لازم ہے۔ [مصنف ابن ابي شيبه/كتاب الحج/حدیث: 14036]

حضرت مکحول فرماتے ہیں کہ تم پر لازم ہے کہ اپنی عورتوں کو حج کرواؤ۔ [مصنف ابن ابي شيبه/كتاب الحج/حدیث: 14037]

حضرت عطاء سے مروی ہے کہ نبی کریم صلی اللہ علیہ وآلہ وسلم صفا ومروہ پہاڑی پر چڑھے اور آپ صلی اللہ علیہ وآلہ وسلم مروہ کے پاس البیضاء پر کھڑے ہوئے۔ [مصنف ابن ابي شيبه/كتاب الحج/حدیث: 14038]

حضرت عثمان بن عفان صفا پہاڑی میں حوض اسفل کے پاس کھڑے ہوئے۔ [مصنف ابن ابي شيبه/كتاب الحج/حدیث: 14039]