حضرت ابن عباس رضی اللہ عنہما احرام پہنتے وقت خوشبو لگانے میں کوئی حرج نہ سمجھتے اور یوم النحر میں بیت اللہ کے طواف سے قبل لگانے میں بھی حرج نہ سمجھتے تھے۔ [مصنف ابن ابي شيبه/كتاب الحج/حدیث: 13990]

حضرت ابن عباس رضی اللہ عنہما فرماتے ہیں کہ میں احرام باندھنے سے قبل اپنے سر کو خوشبو لگا کر کنگھی کرنے کو اور اس کے اثر کے باقی رہنے کو پسند کرتا ہوں۔ [مصنف ابن ابي شيبه/كتاب الحج/حدیث: 13991]

اور حضرت ابن زبیر رضی اللہ عنہ فرماتے ہیں کہ میں اس میں کوئی حرج نہیں سمجھتا۔ [مصنف ابن ابي شيبه/كتاب الحج/حدیث: 13992]

اور حضرت ابن عمر رضی اللہ عنہما فرماتے ہیں کہ نہ میں اس کا حکم دیتا ہوں اور نہ ہی اس سے روکتا ہوں۔ [مصنف ابن ابي شيبه/كتاب الحج/حدیث: 13993]

حضرت ابراہیم فرماتے ہیں کہ احرام باندھتے وقت ہر طرح کی خوشبو لگا سکتا ہے سوائے عورتوں کی خوشبو اور زعفران سے۔ [مصنف ابن ابي شيبه/كتاب الحج/حدیث: 13994]

حضرت عائشہ رضی اللہ عنہا فرماتی ہیں کہ گویا کہ میں نبی کریم صلی اللہ علیہ وآلہ وسلم کے سر کے درمیان خوشبو کی چمک دیکھ رہی ہوں حالانکہ آپ تلبیہ پڑھ رہے تھے۔ [مصنف ابن ابي شيبه/كتاب الحج/حدیث: 13995]

حضرت عائشہ رضی اللہ عنہا فرماتی ہیں کہ میں نبی کریم صلی اللہ علیہ وآلہ وسلم کو اپنے پاس موجود خوشبوؤں میں سے بہترین خوشبو احرام کے وقت لگاتی۔ [مصنف ابن ابي شيبه/كتاب الحج/حدیث: 13996]

حضرت عائشہ رضی اللہ عنہا فرماتی ہیں کہ میں نبی کریم صلی اللہ علیہ وآلہ وسلم کے احرام پر احرام باندھنے سے پہلے خوشبو لگاتی اور احرام کھولنے سے قبل بھی خوشبو لگاتی تھی، بیت اللہ کا طواف کرنے سے پہلے۔ [مصنف ابن ابي شيبه/كتاب الحج/حدیث: 13997]

حضرت ابن زبیر جب احرام باندھنے لگتے تو عمدہ غالیہ خوشبو لگاتے۔ [مصنف ابن ابي شيبه/كتاب الحج/حدیث: 13998]

حضرت ابراہیم فرماتے ہیں کہ حضرت علقمہ اور حضرت اسود، اشتر کے بھائی حضرت عبد اللہ بن حارث کے ساتھ حج کرتے تھے، اور وہ ان کا خرچ خود اٹھاتے تھے۔ [مصنف ابن ابي شيبه/كتاب الحج/حدیث: 13999]