حضرت عامر فرماتے ہیں کہ ایسی عورت سے وہ تمام مہر واپس لیا جائے گا جو اس نے خرچ کردیا اور جو اس نے خرچ نہیں کیا۔ [مصنف ابن ابي شيبه/كتاب النكاح/حدیث: 17700]

حضرت ابراہیم فرماتے ہیں کہ ایسی عورت سے وہ مال واپس لیا جائے گا جو اس نے خرچ نہ کیا ہو اور جو خرچ کردیا اس کی واپسی کا مطالبہ نہیں کیا جائے گا۔ [مصنف ابن ابي شيبه/كتاب النكاح/حدیث: 17701]

حضرت شعبہ کہتے ہیں کہ میں نے حضرت حکم اور حضرت حماد سے سوال کیا کہ اگر کسی غلام نے کسی عورت سے اپنے آقا کی اجازت کے بغیر شادی کرلی تو اس کا کیا حکم ہے؟ انہوں نے فرمایا کہ دونوں کے درمیان جدائی کرائی جائے گی، عورت کو مہر نہیں ملے گا اور جو کچھ دیا گیا ہے واپس لیا جائے گا۔ [مصنف ابن ابي شيبه/كتاب النكاح/حدیث: 17702]

حضرت حسن فرماتے ہیں کہ اگر کسی غلام نے آقا کی اجازت کے بغیر شادی کرلی اور عورت سے دخول بھی کرلیا تو جو مہر عورت کو دے چکا ہے وہ عورت کا ہوگا۔ [مصنف ابن ابي شيبه/كتاب النكاح/حدیث: 17703]

حضرت زہری فرماتے ہیں کہ اگر غلام نے آقا کی اجازت کے بغیر شادی کی تو شادی نہیں ہوئی اور عورت کو مہر بھی نہیں ملے گا۔ [مصنف ابن ابي شيبه/كتاب النكاح/حدیث: 17704]

حضرت حسن فرماتے ہیں کہ اگر کسی غلام نے آقا کی اجازت کے بغیر شادی کی اور عورت کو مہر بھی دے دیا تو اگر دخول کرچکا ہے تو عورت کو پورا مہر ملے گا اور اگر دخول نہ کیا ہو تو مہر کی رقم آقا کو حاصل ہوگی۔ [مصنف ابن ابي شيبه/كتاب النكاح/حدیث: 17705]

حضرت جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا ”جس غلام نے اپنے آقا کی اجازت کے بغیر شادی کی وہ زانی ہے“ [مصنف ابن ابي شيبه/كتاب النكاح/حدیث: 17706]

حضرت جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا ”جس غلام نے اپنے آقا کی اجازت کے بغیر شادی کی وہ زانی ہے“ [مصنف ابن ابي شيبه/كتاب النكاح/حدیث: 17707]

حضرت ابن عمر رضی اللہ عنہما فرماتے ہیں کہ غلام کا آقا کی اجازت کے بغیر شادی کرنا زنا ہے اور اس کی شادی کروانے والا سزا کا مستحق ہوگا۔ [مصنف ابن ابي شيبه/كتاب النكاح/حدیث: 17708]

حضرت ابن عمر رضی اللہ عنہما کا معمول تھا کہ جب ان کا غلام ان کی اجازت کے بغیر شادی کرلیتا تو وہ اس پر حد جاری فرماتے۔ [مصنف ابن ابي شيبه/كتاب النكاح/حدیث: 17709]