حضرت شعبی فرماتے ہیں کہ ایسی صورت میں وہ عورت اسی کی بیوی رہے گی اس پر حد جاری ہوگی۔ اگر وہ چاہے تو اسے طلاق دے دے اور اگر چاہے تو روک کر رکھے۔ یہ اسی طرح ہے کہ زنا کرنے والے شخص سے اس کی بیوی دور نہیں کی جاتی۔ [مصنف ابن ابي شيبه/كتاب النكاح/حدیث: 17730]

حضرت حکم فرماتے ہیں کہ اگر کسی آدمی نے اپنی بیوی سے شرعی ملاقات سے قبل زنا کا ارتکاب کیا تو اس کی بیوی سے اس کی علیحدگی نہیں کرائی جائے گی۔ [مصنف ابن ابي شيبه/كتاب النكاح/حدیث: 17731]

حضرت زہری فرماتے ہیں کہ اگر ایک مردو عورت کا نکاح ہوا اور شرعی ملاقات سے پہلے کسی ایک نے زنا کا ارتکاب کیا تو (زنا کرنے والے کو) کوڑے لگائے جائیں گے لیکن دونوں کے درمیان جدائی نہیں کرائی جائے گی۔ [مصنف ابن ابي شيبه/كتاب النكاح/حدیث: 17732]

حضرت صفیہ بنت ابی عبید فرماتی ہیں کہ ایک آدمی نے کسی عورت سے نکاح کرنے کے بعدشرعی ملاقات سے پہلے کسی دوسری عورت سے زنا کیا تو حضرت ابوبکر نے اسے سو کوڑے لگوائے اور ایک سال کے لئے جلا وطن کیا۔ [مصنف ابن ابي شيبه/كتاب النكاح/حدیث: 17733]

حضرت ابو سعید خدری رضی اللہ عنہ بیان فرماتے ہیں کہ حضور صلی اللہ علیہ وسلم نے حنین کی جنگ میں ایک لشکر روانہ فرمایا۔ اوطاس کے دن ان کا عرب کے ایک قبیلے سے سامنا ہوا تو انہوں نے اس قبیلے کو شکست دی اور ان کے لوگوں کو قتل کیا، اور ان کی بعض ایسی عورتیں قید کرلیں جن کے خاوند تھے۔ بعض صحابہ کرام رضی اللہ عنہم نے ان کے خاوندوں کی وجہ سے ان سے جماع کرنے کو گناہ سمجھا۔ اس پر اللہ تعالیٰ نے قرآن مجید کی یہ آیت نازل فرمائی { وَالْمُحْصَنَاتُ مِنَ النِّسَائِ إلاَّ مَا مَلَکَتْ أَیْمَانُکُمْ } یعنی ان میں سے جو تمہاری باندیاں بن جائیں وہ تمہارے لئے حلال ہیں۔ [مصنف ابن ابي شيبه/كتاب النكاح/حدیث: 17734]

حضرت علی رضی اللہ عنہ قرآن مجید کی آیت { وَالْمُحْصَنَاتُ مِنَ النِّسَائِ } کی تفسیر میں فرماتے ہیں کہ ان عورتوں سے مراد وہ مشرک عورتیں ہیں جن کے خاوند ہوں۔ [مصنف ابن ابي شيبه/كتاب النكاح/حدیث: 17735]

حضرت ابن مسعود رضی اللہ عنہ قرآن مجید کی آیت { وَالْمُحْصَنَاتُ مِنَ النِّسَائِ } کی تفسیر میں فرماتے ہیں کہ ان سے مراد وہ عورتیں ہیں جو قیدی ہوں اور قیدی بنائے جانے سے پہلے ان کے خاوند ہوں۔ [مصنف ابن ابي شيبه/كتاب النكاح/حدیث: 17736]

حضرت انس رضی اللہ عنہ قرآن مجید کی آیت { وَالْمُحْصَنَاتُ مِنَ النِّسَائِ } کی تفسیر میں فرماتے ہیں کہ ان سے مراد وہ عورتیں ہیں جن کے خاوند ہوں۔ [مصنف ابن ابي شيبه/كتاب النكاح/حدیث: 17737]

حضرت سعید بن مسیب فرماتے ہیں کہ (اس سے مراد) خاوند والی عورتیں ہیں، اس کا مرجع یہ ہے کہ اللہ تعالیٰ نے زنا کو حرام قرار دیا ہے۔ [مصنف ابن ابي شيبه/كتاب النكاح/حدیث: 17738]

حضرت عبیدہ نے قرآن مجید کی آیت { وَالْمُحْصَنَاتُ مِنَ النِّسَائِ } کے بارے میں اپنے ہاتھ سے اس طرح اشارہ کیا اور چار (انگلیوں) سے اشارہ کیا (اور پڑھا) { إلاَّ مَا مَلَکَتْ أَیْمَانُکُمْ }۔ [مصنف ابن ابي شيبه/كتاب النكاح/حدیث: 17739]