حضرت محمد بن کعب، حضرت عمر بن حکم اور حضرت عبداللہ بن عبیدہ رحمہم اللہ فرماتے ہیں کہ جس عورت نے اپنا نفس حضور صلی اللہ علیہ وسلم کو ہبہ کردیا تھا وہ حضرت میمونہ رضی اللہ عنہا ہیں۔ [مصنف ابن ابي شيبه/كتاب النكاح/حدیث: 18060]

حضرت مجاہد رحمہ اللہ قرآن مجید کی آیت { وَامْرَأَۃً مُؤْمِنَۃً إِنْ وَہَبَتْ نَفْسَہَا لِلنَّبِیِّ } کی تفسیر میں فرماتے ہیں کہ اس سے مراد بغیر مہر کے نکاح کرنا ہے۔ [مصنف ابن ابي شيبه/كتاب النكاح/حدیث: 18061]

حضرت مجاہد رحمہ اللہ قرآن مجید کی آیت { وَامْرَأَۃً مُؤْمِنَۃً إِنْ وَہَبَتْ نَفْسَہَا لِلنَّبِیِّ } کی تفسیر میں فرماتے ہیں کہ عورت نے تو نفس ہبہ کردیا تھا لیکن حضور صلی اللہ علیہ وسلم نے قبول نہیں فرمایا۔ [مصنف ابن ابي شيبه/كتاب النكاح/حدیث: 18062]

حضرت عوف رحمہ اللہ بیان کرتے ہیں کہ قبیلہ بنو تیم اللہ کے ھمام بن عمیر نامی آدمی کے پاس جاہلیت میں دوسگی بہنیں (بیوی یاباندی کے طورپر) تھیں۔ اور ان میں سے کسی سے بھی علیحدگی اختیار نہیں کی۔ حضرت عمر رضی اللہ عنہ کی خلافت کے زمانے میں اس کا معاملہ حضرت عمر رضی اللہ عنہ کے سامنے پیش کیا گیا تو آپ نے اس کو پیغام دیا کہ دونوں میں سے ایک کو اختیار کرلو اور خدا کی قسم اگر تم دوسری کے پاس گئے تو میں تمہارے سر پر ماروں گا۔ [مصنف ابن ابي شيبه/كتاب النكاح/حدیث: 18063]

حسن رحمہ اللہ فرماتے ہیں کہ جو شخص اسلام قبول کرے اور اس کے پاس (بیوی یاباندی کے طور پر) دو سگی بہنیں ہوں تو اگر وہ چاہے تو پہلی کو روک لے۔ [مصنف ابن ابي شيبه/كتاب النكاح/حدیث: 18064]

حضرت دیلمی رضی اللہ عنہ فرماتے ہیں کہ میں حضور صلی اللہ علیہ وسلم کے پاس آیا تو اس وقت میرے نکاح میں دو سگی بہنیں تھیں جن سے میں نے جاہلیت میں شادی کی تھی۔ حضور صلی اللہ علیہ وسلم نے مجھ سے فرمایا جب تم واپس جاؤ تو ایک کو طلاق دے دینا۔ [مصنف ابن ابي شيبه/كتاب النكاح/حدیث: 18065]

حضرت ابن عمر رضی اللہ عنہما سے روایت ہے کہ غیلان بن سلمہ ثقفی رضی اللہ عنہ نے اسلام قبول کیا تو ان کے نکاح میں دس عورتیں تھیں۔ حضور صلی اللہ علیہ وسلم نے ان سے فرمایا کہ ان میں سے چار رکھ لو۔ [مصنف ابن ابي شيبه/كتاب النكاح/حدیث: 18066]

حضرت حسن رحمہ اللہ فرماتے ہیں کہ اگر ایک آدمی اسلام قبول کرے اور اس کے نکاح میں دس یا چھ عورتیں ہوں تو وہ ان میں سے چار رکھ لے۔ [مصنف ابن ابي شيبه/كتاب النكاح/حدیث: 18067]

حضرت حمیضہ بن شمردل رحمہ اللہ فرماتے ہیں کہ حضرت قیس بن حارث رضی اللہ عنہ نے اسلام قبول کیا تو ان کے نکاح میں آٹھ عورتیں تھیں حضور صلی اللہ علیہ وسلم نے انہیں چار کو اختیار کرنے کا حکم دیا۔ [مصنف ابن ابي شيبه/كتاب النكاح/حدیث: 18068]

حضرت شعبی قرآن مجید کی آیت { غَیْرِ أُولِی الْإِرْبَۃِ } کی تفسیر میں فرماتے ہیں کہ اس سے مراد وہ بچہ ہے جو اس سمجھ کو نہ پہنچا ہو کہ عورتوں کے معاملات پر آگاہ ہوسکے۔ [مصنف ابن ابي شيبه/كتاب النكاح/حدیث: 18069]