حضرت سعید بن مسیب رحمہ اللہ فرماتے ہیں کہ دونوں کے درمیان جدائی کرائی جائے گی لیکن مہر شرمگاہ کے حلال ہونے کا عوض بنے گا۔ [مصنف ابن ابي شيبه/كتاب النكاح/حدیث: 18080]

حضرت سلیمان بن یسار رحمہ اللہ فرماتے ہیں کہ دونوں کے درمیان جدائی کرائی جائے گی اور مہر بیت المال میں جمع کرایا جائے گا۔ [مصنف ابن ابي شيبه/كتاب النكاح/حدیث: 18081]

حضرت ابراہیم رحمہ اللہ فرماتے ہیں کہ ہر نکاح فاسد جیسے عورت کا عدت میں شادی کرنا وغیرہ، ایسے نکاحوں میں اگر آدمی نے بیوی سے دخول کیا تو عورت کو مہرتوملے گا البتہ دونوں میں جدائی کرادی جائے گی۔ [مصنف ابن ابي شيبه/كتاب النكاح/حدیث: 18082]

حضرت حکم رحمہ اللہ فرماتے ہیں کہ دونوں کے درمیان جدائی کرادی جائے گی۔ البتہ فرج کو حلال کرنے کی وجہ سے عورت کو مہرملے گا۔ [مصنف ابن ابي شيبه/كتاب النكاح/حدیث: 18083]

حضرت مسروق رحمہ اللہ فرماتے ہیں کہ ایک عورت نے اپنی عدت میں شادی کی تو حضرت عمر رضی اللہ عنہ نے فیصلہ فرمایا کہ جب تک یہ زندہ ہیں ان کے درمیان جدائی کرادی جائے اور ان کا مہر بیت المال میں جمع کرادیا جائے۔ اور فرمایا کہ ان کا نکاح بھی حرام تھا اور مہر بھی حرام ہے۔ [مصنف ابن ابي شيبه/كتاب النكاح/حدیث: 18084]

حضرت علی رضی اللہ عنہ نے اس عورت کے بارے میں یہ فیصلہ فرمایا کہ ان دونوں کے درمیان جدائی کرادی جائے، پھر عورت پہلے خاوند کی باقی ماندہ عدت پوری کرے، پھر تین حیض عدت گزارے، اور شرمگاہ کو حلال کرنے کی وجہ سے اسے مہر ملے گا۔ پھر اگر آدمی چاہے تو اس کے بعد اسے نکاح کا پیغام بھیج دے۔ [مصنف ابن ابي شيبه/كتاب النكاح/حدیث: 18085]

حضرت عبد اللہ بن حبیب رحمہ اللہ فرماتے ہیں کہ رسول اللہ صلی اللہ علیہ وسلم ایک مرتبہ باہر تشریف لائے، ایک خاتون پر آپ کی نگاہ پڑی اور وہ آپ کو بھلی محسوس ہوئی۔ آپ واپس حضرت ام سلمہ رضی اللہ عنہا کے پاس تشریف لائے، ان کے پاس کچھ عورتیں بیٹھی خوشبو بنا رہی تھیں۔ ان عورتوں نے حضور صلی اللہ علیہ وسلم کو دیکھا تو چلی گئیں۔ حضور صلی اللہ علیہ وسلم نے اپنی حاجت کو پورا فرمایا اور باہر تشریف لے آئے۔ پھر آپ نے فرمایا کہ تم میں سے کسی شخص کی نظر اگر کسی عورت پر پڑے اور وہ اسے بھلی محسوس ہو تو اپنی بیوی سے صحبت کرلے کیونکہ جو کچھ اس عورت میں ہے وہ اس کی بیوی میں بھی ہے۔ [مصنف ابن ابي شيبه/كتاب النكاح/حدیث: 18086]

ایک اور سند سے الفاظ کے فرق کے ساتھ یونہی منقول ہے۔ [مصنف ابن ابي شيبه/كتاب النكاح/حدیث: 18087]

حضرت عبد اللہ رضی اللہ عنہ فرماتے ہیں کہ تم میں سے کسی شخص کی نظر اگر کسی عورت پر پڑے اور وہ اسے بھلی محسوس ہو تو اپنی بیوی سے صحبت کرلے کیونکہ جو کچھ ان عورتوں میں ہے وہ اس کی بیویوں میں بھی ہے۔ [مصنف ابن ابي شيبه/كتاب النكاح/حدیث: 18088]

حضرت سالم بن ابی جعد رحمہ اللہ فرماتے ہیں کہ حضور صلی اللہ علیہ وسلم کی نگاہ ایک عورت پر پڑی، وہ بھلی محسوس ہوئی تو آپ نے حضرت ام سلمہ رضی اللہ عنہا سے شرعی ملاقات کی اور ارشاد فرمایا کہ تم میں سے کسی شخص کی نظر اگر کسی عورت پر پڑے اور وہ اسے بھلی محسوس ہو تو اپنی بیوی سے صحبت کرلے کیونکہ جو کچھ ان عورتوں میں ہے وہ اس کی بیویوں میں بھی ہے۔ [مصنف ابن ابي شيبه/كتاب النكاح/حدیث: 18089]