حضرت ابو قلابہ رحمہ اللہ فرماتے ہیں کہ تمہیں عورت کا حسن کوئی نقصان نہ دے گا جب تک تم اسے پہچان نہ لو۔ [مصنف ابن ابي شيبه/كتاب النكاح/حدیث: 18110]

حضرت سعد بن ابی وقاص رضی اللہ عنہ فرماتے ہیں کہ دورانِ طواف ایک عورت پر میری نگاہ پڑی، وہ مجھے بھلی محسوس ہوئی، میں نے اس کے بارے میں سوال کرنا چاہا لیکن معلوم ہوا کہ وہ شادی شدہ تھی۔ تمہیں عورت کا حسن اس وقت تک نقصان نہیں دیتا جب تک تم اسے جان نہ لو۔ [مصنف ابن ابي شيبه/كتاب النكاح/حدیث: 18111]

حضرت طاؤس رحمہ اللہ اس بات کو ناپسند فرماتے تھے کہ مرد بیوی یا محرم رشتہ دار کے علاوہ کسی عورت کو دیکھے۔ [مصنف ابن ابي شيبه/كتاب النكاح/حدیث: 18112]

حضرت ایوب رحمہ اللہ فرماتے ہیں کہ حضرت طاؤس رحمہ اللہ کسی ایسے قافلے میں نہ جاتے جس میں عورتیں ہوتیں۔ [مصنف ابن ابي شيبه/كتاب النكاح/حدیث: 18113]

حضرت علی رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ اے علی رضی اللہ عنہ! تمہارے لئے جنت میں ایک خزانہ ہے اور تم جنت کے دونوں کناروں کو پانے والے ہو، ایک نظر پڑجائے تو دوسری مت ڈالو کیونکہ پہلی نظر کی گنجائش ہے لیکن دوسری کی اجازت نہیں۔ [مصنف ابن ابي شيبه/كتاب النكاح/حدیث: 18114]

حضرت ابن عباس رضی اللہ عنہما قرآن مجید کی آیت: اللہ آنکھوں کی خیانت اور دل میں چھپے خیالات کو جانتا ہے۔ کی تفسیر میں فرماتے ہیں کہ بعض اوقات ایک آدمی کچھ لوگوں میں بیٹھا ہوتا ہے اور وہاں سے ایک عورت گذرتی ہے، وہ لوگوں کو یہ باور کراتا ہے کہ اس نے اپنی نگاہ جھکا لی ہے، پھر اگر وہ لوگوں کو خود سے غافل پاتا ہے تو عورت کو دیکھنے لگتا ہے اور اگر اسے اندیشہ ہو کہ لوگ اسے دیکھ لیں گے تو نظر کو جھکا لیتا ہے۔ اللہ تعالیٰ اس کے دل کے خیالات سے بھی واقف ہے کہ وہ آدمی عورت کے چھپے ہوئے حصے کو بھی دیکھنا چاہتا ہے۔ [مصنف ابن ابي شيبه/كتاب النكاح/حدیث: 18115]

حضرت ابوموسیٰ رضی اللہ عنہ فرماتے ہیں کہ میرے ناک میں کسی مردار کی بو آئے یہ مجھے اس سے زیادہ پسند ہے کہ اس میں کسی عورت کی خوشبو آئے۔ [مصنف ابن ابي شيبه/كتاب النكاح/حدیث: 18116]

حضرت عبداللہ رضی اللہ عنہ فرماتے ہیں کہ میں تارکول سے لیپ کئے اونٹ سے ٹکراؤں یہ مجھے اس بات سے زیادہ پسند ہے کسی عورت سے ٹکراؤں۔ [مصنف ابن ابي شيبه/كتاب النكاح/حدیث: 18117]

حضرت ابو موسیٰ رضی اللہ عنہ فرماتے ہیں کہ ہر بد نظر آنکھ زنا کرنے والی ہے۔ [مصنف ابن ابي شيبه/كتاب النكاح/حدیث: 18118]

حضرت حسن رحمہ اللہ فرماتے ہیں کہ اگر ایک آدمی اپنی بیوی کو دخول سے پہلے ایک یا دو طلاقیں دیدے اور یہ سمجھتے ہوئے اس سے جماع کرے کہ ابھی رجوع کا حق باقی ہے تو عورت کو مہر ملے گا اور دونوں کے درمیان جدائی کرادی جائے گی۔ [مصنف ابن ابي شيبه/كتاب النكاح/حدیث: 18119]