(حضرت عباد بن منصور رحمہ اللہ کہتے ہیں کہ) میں نے یہی سوال حضرت طاوس رحمہ اللہ سے کیا تو انہوں نے بھی یہی فرمایا۔ [مصنف ابن ابي شيبه/كتاب النكاح/حدیث: 18250]

میں نے یہی سوال حسن رحمہ اللہ سے کیا تو انہوں نے بھی یہی فرمایا۔ [مصنف ابن ابي شيبه/كتاب النكاح/حدیث: 18251]

میں نے یہی سوال حضرت مجاہد رحمہ اللہ سے کیا تو انہوں نے فرمایا کہ اس میں لوگوں کا اختلاف ہے، میں اس میں کوئی بات نہیں کہتا۔ [مصنف ابن ابي شيبه/كتاب النكاح/حدیث: 18252]

میں نے یہی سوال ابن سیرین رحمہ اللہ سے کیا تو انہوں نے بھی حضرت مجاہد رحمہ اللہ والی بات کہی۔ [مصنف ابن ابي شيبه/كتاب النكاح/حدیث: 18253]

ایوب رحمہ اللہ فرماتے ہیں کہ میں نے اس کا تذکرہ حضرت محمد بن سیرین رحمہ اللہ سے کیا تو انہوں نے فرمایا کہ مجھے بتایا گیا ہے کہ اہل مدینہ کا اس بارے میں اختلاف ہے۔ بعض نے اسے مکروہ بتایا ہے اور بعض کے نزدیک اس کی کوئی حیثیت نہیں۔ جن حضرات نے اسے مکروہ بتایا ہے وہ ہمارے نزدیک زیادہ بہتر ہیں۔ [مصنف ابن ابي شيبه/كتاب النكاح/حدیث: 18254]

قاسم بن محمد رحمہ اللہ بھی اسے مکروہ سمجھنے والوں میں سے تھے۔ [مصنف ابن ابي شيبه/كتاب النكاح/حدیث: 18255]

حضرت محمد بن عمرو رحمہ اللہ فرماتے ہیں کہ حضرت زہری ہشام رحمہ اللہ کی خلافت کے ابتدائی دنوں میں مدینہ منورہ آئے اور انہوں نے بیان کیا کہ حضرت عروہ رحمہ اللہ حضرت عائشہ رضی اللہ عنہا کے حوالے سے بیان کرتے ہیں کہ ابو قعیس رحمہ اللہ حضرت عائشہ رضی اللہ عنہا سے ملاقات کے لئے اجازت چاہتے تھے، حضرت عائشہ رضی اللہ عنہا کو ابو قعیس کے بھائی کی بیوی نے دودھ پلایا تھا۔ حضرت عائشہ رضی اللہ عنہا نے انہیں اجازت دینے سے انکار کردیا۔ حضرت عروہ رحمہ اللہ کا خیال ہے کہ حضرت عائشہ رضی اللہ عنہا نے اس بات کا تذکرہ حضور صلی اللہ علیہ وسلم سے کیا تو آپ نے فرمایا کہ تم نے انہیں اجازت کیوں نہیں دی، رضاعت بھی ان چیزوں کو حرام کردیتی ہے جنہیں نسب حرام کرتا ہے۔ [مصنف ابن ابي شيبه/كتاب النكاح/حدیث: 18256]

اس پر اہل مدینہ گھبرا گئے، اور عبد اللہ بن ابی حبیبہ مولی زبیر نے اس موقع پر اپنی بیوی کو طلاق دے دی۔ [مصنف ابن ابي شيبه/كتاب النكاح/حدیث: 18257]

حضرت ہشام رحمہ اللہ فرماتے ہیں کہ حضرت محمد بن سیرین رحمہ اللہ کے سامنے ایک مرتبہ دودھ اترنے کا سبب بننے والے مرد کے حکم کا تذکرہ ہوا تو انہوں نے فرمایا کہ بعض لوگوں کے نزدیک یہ مکروہ ہے، بعض نے اس کی اجازت دی ہے۔ جن لوگوں نے اسے مکروہ خیال کیا ان کا قول زیادہ بہتر ہے۔ [مصنف ابن ابي شيبه/كتاب النكاح/حدیث: 18258]

قاسم بن محمد رحمہ اللہ بھی اسے مکروہ سمجھنے والوں میں سے تھے۔ [مصنف ابن ابي شيبه/كتاب النكاح/حدیث: 18259]