بنو زید اللہ کی ایک خاتون بیان کرتی ہیں کہ حضرت عائشہ رضی اللہ عنہا ایک باندی کو بناؤ سنگھار کرکے اس کے ساتھ باہر آئیں اور فرمایا کہ اس کے ذریعے ہم قریش کے نوجوانوں کا شکارکریں گے۔ (مراد یہ تھ یکہ بچی کی خوبصورتی اور بناؤ سنگھار اس کے رشتۂ ازدواج میں آسانی کا باعث بن سکتا ہے۔ راویہ کے مجہول ہونے کی بنا پر یہ روایت ضعیف ہے) [مصنف ابن ابي شيبه/كتاب النكاح/حدیث: 18600]

حضرت ابو حازم رحمہ اللہ فرماتے ہیں کہ کچھ لوگ اپنی ایک سنوری ہوئی بچی کو لے کر حضرت سہل بن سعد ساعدی رضی اللہ عنہ کے پاس سے گذرے، انہوں نے اسے بلایا، اس کی طرف دیکھا، اسے اپنی گود میں بٹھایا اور اس کے سر پر ہاتھ پھیرا اور اسے برکت کی دعا دی۔ [مصنف ابن ابي شيبه/كتاب النكاح/حدیث: 18601]

حضرت عمر رضی اللہ عنہ فرماتے ہیں کہ اگر تم میں سے کوئی یہ چاہے کہ اپنی بچی کے ساتھ بھلائی کا معاملہ کرے تو اسے تیار کرے اور باہر لائے، اللہ تعالیٰ کا رزق اس کے لئے آئے گا۔ (یعنی اس کی شادی ہوجائے گی) [مصنف ابن ابي شيبه/كتاب النكاح/حدیث: 18602]

حضرت عمر رضی اللہ عنہ فرماتے ہیں کہ اپنی بیٹیوں کو بدشکل آدمیوں سے نکاح کرنے پر مجبور نہ کرو کیونکہ جو تم پسند کرتے ہو اسے وہ بھی پسند کرتی ہیں۔ [مصنف ابن ابي شيبه/كتاب النكاح/حدیث: 18603]

حضرت حسن رحمہ اللہ اس بات کو ناپسندیدہ خیال فرماتے تھے کہ آدمی ارض حرب میں شادی کرے اور اپنے بچے کو وہیں چھوڑ دے۔ [مصنف ابن ابي شيبه/كتاب النكاح/حدیث: 18604]

حضرت مجاہد رحمہ اللہ نے ایسے رومی عیسائیوں سے نکاح کو مکروہ قرار دیا ہے جو عہد میں نہ ہوں۔ [مصنف ابن ابي شيبه/كتاب النكاح/حدیث: 18605]

راوی کہتے ہیں کہ محمد رحمہ اللہ نے اس آدمی کا حال بیان کیا جو قیدی ہو اور شادی کرنا چاہے، تو انہوں نے اس کے لئے اسے مکروہ قرار دیا۔ [مصنف ابن ابي شيبه/كتاب النكاح/حدیث: 18606]

حضرت عطاء رحمہ اللہ فرماتے ہیں کہ ناجائز نکاح آدمی کو محصن نہیں بناتا۔ [مصنف ابن ابي شيبه/كتاب النكاح/حدیث: 18607]

حضرت شعبی رحمہ اللہ فرماتے ہیں کہ ناجائز نکاح آدمی کو محصن نہیں بناتا۔ [مصنف ابن ابي شيبه/كتاب النكاح/حدیث: 18608]

حضرت عمر رضی اللہ عنہ نے خضاب کے ذریعے نقش ونگار بنانے اور اس سے انگلیوں کے کناروں کو رنگنے سے منع فرمایا ہے۔ [مصنف ابن ابي شيبه/كتاب النكاح/حدیث: 18609]