حضرت حسن بن علی رضی اللہ عنہ ما نے ایک عورت سے نکاح فرمایا، اور اس کے پاس سو باندیاں بھیجیں ہر باندی کے پاس ایک ہزار درہم تھے! [مصنف ابن ابي شيبه/كتاب النكاح/حدیث: 17190]

حضرت حسن فرماتے ہیں کہ ایک مرتبہ ایک آدمی نے کسی عورت سے خفیہ طور پر شادی کی، وہ اس کے گھرآیا کرتا تھا۔ ایک مرتبہ عورت کے ایک پڑوسی نے آدمی کو اس کے گھر آتے دیکھ لیا تو اس پر تہمت لگا دی۔ یہ جھگڑا لے کر وہ حضرت عمر بن خطاب رضی اللہ عنہ کی خدمت میں حاضر ہوئے۔ تہمت لگانے والے پڑوسی نے کہا کہ اے امیر المؤمنین! یہ شخص میری پڑوسن کے پاس آتا ہے اور مجھے ان کے نکاح کا کوئی علم نہیں ہے۔ حضرت عمر رضی اللہ عنہ نے اس شخص کا بیان معلوم کیا تو اس نے کہا میں نے اس عورت سے خفیہ طور پر شادی کی ہے۔ حضرت عمر رضی اللہ عنہ نے گواہوں کی بابت سوال کیا تو اس نے کہا عورت کے کچھ رشتہ دار اس نکاح کے گواہ ہیں۔ حضرت عمر رضی اللہ عنہ نے تہمت لگانے والے پر حد تو جاری نہ کی البتہ ان سے فرمایا کہ نکاح کو اعلانیہ کیا کرو اور شرمگاہوں کو پاکدامن رکھو۔ [مصنف ابن ابي شيبه/كتاب النكاح/حدیث: 17191]

حضرت ہشام فرماتے ہیں کہ میرے والد فرمایا کرتے تھے کہ خفیہ نکاح درست نہیں ہے۔ [مصنف ابن ابي شيبه/كتاب النكاح/حدیث: 17192]

حضرت نافع فرماتے ہیں کہ اسلام میں خفیہ نکاح نہیں ہے۔ [مصنف ابن ابي شيبه/كتاب النكاح/حدیث: 17193]

حضرت عبد اللہ بن عتبہ فرماتے ہیں کہ بدترین نکاح خفیہ نکاح ہے۔ [مصنف ابن ابي شيبه/كتاب النكاح/حدیث: 17194]

حضرت عطاء فرماتے ہیں کہ ایک مرتبہ حضور صلی اللہ علیہ وسلم کا گزر ایک شادی کے پاس سے ہوا تو آپ نے فرمایا کہ اگر یہاں کچھ لہو (گانا وغیرہ) ہوتا تو اچھا تھا۔ [مصنف ابن ابي شيبه/كتاب النكاح/حدیث: 17195]

حضرت ابن سیرین فرماتے ہیں کہ ہمیں معلوم ہوا ہے کہ حضرت عمر رضی اللہ عنہ جب کوئی گانے بجانے کی آواز سنتے تو اسے برا قرار دیتے اور اس کے بارے میں سوال کرتے، اگر ان سے کہا جاتا کہ یہ شادی یا بچے کے ختنہ کی تقریب ہے تو آپ کچھ نہ کہتے۔ [مصنف ابن ابي شيبه/كتاب النكاح/حدیث: 17196]

بنو سلمہ کے ایک شیخ فرماتے ہیں کہ حضرت ابو قتادہ نے شادی کے موقع پر دف بجانے والی ایک لڑکی سے کہا کہ آگے بڑھ کر بجاؤ، آگے بڑھ کربجاؤ۔ [مصنف ابن ابي شيبه/كتاب النكاح/حدیث: 17197]

حضرت ابو سلمہ بن عبدا لرحمن فرماتے ہیں کہ شادی کی رات میں دف بجایا گیا اور حضرت عبد الرحمن بن عوف کے پاس گانا گایا گیا۔ [مصنف ابن ابي شيبه/كتاب النكاح/حدیث: 17198]

حضرت عامر بن سعد فرماتے ہیں کہ میں حضرت ابن مسعود اور حضرت قرظہ بن کعب کی خدمت میں حاضر ہوا، ان کے پاس کچھ لڑکیاں بیٹھی گانا گا رہی تھیں۔ میں نے کہا کہ تم رسول اللہ صلی اللہ علیہ وسلم کے اصحاب ہوکر ایسا کرتے ہو؟ انہوں نے فرمایا کہ شادی کے موقع پر گانے وغیرہ کی اجازت دی گئی ہے۔ [مصنف ابن ابي شيبه/كتاب النكاح/حدیث: 17199]