حضرت محمد بن حاطب فرماتے ہیں کہ رسول اللہ صلی اللہ علیہ وسلم نے ارشاد فرمایا کہ حلال و حرام کے درمیان آواز یعنی دف بجانے کا فرق ہے۔ [مصنف ابن ابي شيبه/كتاب النكاح/حدیث: 17200]

حضرت عمرو بن ربیعہ کہتے ہیں کہ میں حضرت ثابت بن ودیعہ اور حضرت قرظہ بن کعب کے ساتھ ایک شادی میں شریک تھا۔ میں نے گانے کی آواز سنی تو کہا کہ کیا آپ دونوں یہ آواز نہیں سن رہے؟ انہوں نے فرمایا کہ ہمیں شادی میں گانے کی اور میت پر نوحہ کے بغیر رونے کی اجازت دی گئی ہے۔ [مصنف ابن ابي شيبه/كتاب النكاح/حدیث: 17201]

حضرت ابن عون فرماتے ہیں کہ محمد رحمہ اللہ کے ایک گھر میں شادی تھی۔ جب لوگ شادی کی تقریب سے فارغ ہوگئے اور محمد رحمہ اللہ اپنے گھر واپس آئے تو عورتوں سے پوچھا کہ تمہارے دف کہاں ہیں۔ [مصنف ابن ابي شيبه/كتاب النكاح/حدیث: 17202]

حضرت ابن عون فرماتے ہیں کہ اس سے مراد دف ہے۔ [مصنف ابن ابي شيبه/كتاب النكاح/حدیث: 17203]

ایک صاحب نقل کرتے ہیں کہ حضرت عبد اللہ بن مسعود رضی اللہ عنہ ایک شادی میں شریک ہوئے جس میں بانسریاں اور گانے کے آلات تھے، آپ بیٹھ گئے اور اس سے منع نہیں فرمایا۔ [مصنف ابن ابي شيبه/كتاب النكاح/حدیث: 17204]

حضرت عکرمہ فرماتے ہیں کہ حضرت عبداللہ بن عباس رضی اللہ عنہ ما نے جب اپنے بیٹوں کے ختنے کئے تو کھیل تماشا کرنے والوں کو بلایا اور انہیں تین یا چار دراہم عطا کئے۔ [مصنف ابن ابي شيبه/كتاب النكاح/حدیث: 17205]

حضرت مغراء عمی فرماتے ہیں کہ حضرت شریح نے ایک مرتبہ دف کی آواز سنی تو فرمایا کہ فرشتے اس گھر میں داخل نہیں ہوتے جس میں دف ہو۔ [مصنف ابن ابي شيبه/كتاب النكاح/حدیث: 17206]

حضرت سوید فرماتے ہیں کہ فرشتے اس گھر میں داخل نہیں ہوتے جس میں دف ہو۔ [مصنف ابن ابي شيبه/كتاب النكاح/حدیث: 17207]

ابراہیم فرماتے ہیں کہ حضرت عبد اللہ رضی اللہ عنہ کے شاگرد گلیوں میں دف لیے ہوئے لڑکیوں کے سامنے آتے اور ان کے دف پھاڑ دیا کرتے تھے۔ [مصنف ابن ابي شيبه/كتاب النكاح/حدیث: 17208]

حضرت قثم فرماتے ہیں کہ حضرت عبد اللہ بن جعفر نے حضرت علی رضی اللہ عنہ کی سابقہ بیوی اور ان کی اس بیٹی سے نکاح کیا جو اس بیوی کے علاوہ کسی اور بیوی سے تھی۔ [مصنف ابن ابي شيبه/كتاب النكاح/حدیث: 17209]