حضرت ابن عمر رضی اللہ عنہما فرماتے ہیں کہ جس عورت کو طلاق بائن دے دی گئی ہو یا اس کا خاوند انتقال کرگیا ہو تو وہ رات اپنے خاوند کے گھر ہی میں گزارے گی جب تک اس کی عدت پوری نہ ہوجائے۔ [مصنف ابن ابي شيبه/كتاب الطلاق/حدیث: 19924]

حضرت یحییٰ بن سعید رحمہ اللہ کہتے ہیں کہ مدینہ میں ایک عورت کو طلاق دی گئی پھر اس کے بارے میں مدینہ کے فقہاء سے سوال کیا گیا تو انہوں نے فرمایا کہ وہ اپنے خاوند کے گھر میں رہے گی۔ اس بارے میں حضرت سعید رحمہ اللہ سے سوال کیا گیا تو انہوں نے فرمایا کہ وہ اپنے خاوند کے گھر میں ہی رہے گی۔ [مصنف ابن ابي شيبه/كتاب الطلاق/حدیث: 19925]

حضرت عروہ رحمہ اللہ فرماتے ہیں کہ حضرت فاطمہ بنت قیس رضی اللہ عنہا نے (طلاق کے بعد) حضور صلی اللہ علیہ وسلم سے عرض کیا کہ یا رسول اللہ! مجھے اندیشہ ہے کہ اس گھر میں کوئی مجھ پر گھس آئے گا۔ آپ صلی اللہ علیہ وسلم نے انہیں (وہاں سے) منتقل ہونے کا حکم دیا۔ [مصنف ابن ابي شيبه/كتاب الطلاق/حدیث: 19926]

حضرت حسن رحمہ اللہ فرماتے ہیں کہ جس عورت کو تین طلاقیں دے دی گئی ہوں اگر وہ چاہے تو اپنے خاوند کے گھر کے علاوہ کہیں بھی عدت گزار سکتی ہے۔ [مصنف ابن ابي شيبه/كتاب الطلاق/حدیث: 19927]

حضرت حبیب رحمہ اللہ فرماتے ہیں کہ میں نے حضرت عطاء رحمہ اللہ سے مطلقہ کی عدت کے مقام کے بارے میں سوال کیا تو انہوں نے فرمایا کہ وہ جہاں چاہے وہاں عدت گزار سکتی ہے۔ [مصنف ابن ابي شيبه/كتاب الطلاق/حدیث: 19928]

حضرت حسن رحمہ اللہ بھی یہی فرماتے تھے۔ [مصنف ابن ابي شيبه/كتاب الطلاق/حدیث: 19929]

حضرت ابوسلمہ رحمہ اللہ فرماتے ہیں کہ میں نے یہ بات حضرت فاطمہ بنت قیس رضی اللہ عنہا کے منہ سے سن کر لکھی۔ وہ فرماتی ہیں کہ میں بنومخزوم کے ایک آدمی کے نکاح میں تھی۔ انہوں نے مجھے حتمی طلاق دے دی تو رسول اللہ صلی اللہ علیہ وسلم نے مجھ سے فرمایا کہ تم ابن ام مکتوم رضی اللہ عنہ کے گھر چلی جاؤ۔ وہ نابینا آدمی ہیں۔ اگر تم ضرورت کے تحت اپنے کپڑے اتارو گی تو بھی وہ کچھ نہ دیکھ سکیں گے۔ [مصنف ابن ابي شيبه/كتاب الطلاق/حدیث: 19930]

حضرت ابراہیم رحمہ اللہ سے سوال کیا گیا کہ ایک عورت کرائے کے گھر میں رہتی تھی اور اسے طلاق ہوگئی تو اب وہ کیا کرے؟ انہوں نے فرمایا کہ بہتر ہے کہ آدمی مکان کا کرایہ دے اور وہ عدت کے پورا ہونے تک اسی گھر میں رہے۔ [مصنف ابن ابي شيبه/كتاب الطلاق/حدیث: 19931]

حضرت یحییٰ بن سعید رحمہ اللہ فرماتے ہیں کہ حضرت سعید بن مسیب رحمہ اللہ سے سوال کیا گیا کہ اگر ایک عورت کرائے کے گھر میں رہتی ہو اور اسے طلاق ہوجائے تو کرایہ کون دے گا؟ انہوں نے فرمایا کہ کرایہ اس کے خاوند پر لازم ہوگا۔ [مصنف ابن ابي شيبه/كتاب الطلاق/حدیث: 19932]

حضرت سعید بن مسیب رحمہ اللہ فرماتے ہیں کہ حضرت عمر رضی اللہ عنہ نے ان عورتوں کو واپس بھیج دیا جو عدت کے دنوں میں حج یا عمرے کے لئے گئی تھیں۔ [مصنف ابن ابي شيبه/كتاب الطلاق/حدیث: 19933]