حضرت سعید بن مسیب رحمہ اللہ فرماتے ہیں کہ اگر ایک آدمی نے اپنی بیوی کو طلاق دی پھر اسے رجوع کا پیغام بھیجا۔ لیکن رجوع کا پیغام ملنے سے پہلے وہ شادی کرچکی تھی تو وہ عورت بائنہ ہوجائے گی اور اگر شادی کرنے سے پہلے رجوع کا پیغام ملا تو وہ اسی کی بیوی رہے گی۔ [مصنف ابن ابي شيبه/كتاب الطلاق/حدیث: 20004]

حضرت جابر بن زید رحمہ اللہ فرماتے ہیں کہ دل میں رجوع کرنے کی کوئی شرعی حیثیت نہیں۔ [مصنف ابن ابي شيبه/كتاب الطلاق/حدیث: 20005]

ایوب رحمہ اللہ کہتے ہیں کہ میں نے حضرت سعید بن جبیر رحمہ اللہ، حضرت مجاہد رحمہ اللہ اور حضرت عطاء رحمہ اللہ سے سوال کیا کہ جس عورت کا خاوند فوت ہوجائے وہ کس دن سے عدت گزارے گی؟ انہوں نے فرمایا کہ جس دن اس کے خاوند کا انتقال ہوا۔ [مصنف ابن ابي شيبه/كتاب الطلاق/حدیث: 20006]

ایوب رحمہ اللہ کہتے ہیں کہ میں نے حضرت عکرمہ رحمہ اللہ، حضرت نافع رحمہ اللہ اور حضرت محمد بن سیرین رحمہ اللہ کو فرماتے ہوئے سنا کہ وہ اس دن سے عدت گزارے گی جس دن اس کے خاوند کا انتقال ہوا ہے۔ [مصنف ابن ابي شيبه/كتاب الطلاق/حدیث: 20007]

حضرت طلق بن حبیب رحمہ اللہ فرماتے ہیں کہ اس دن سے عدت گزارے گی جس دن اس کے خاوند کا انتقال ہوا ہے۔ [مصنف ابن ابي شيبه/كتاب الطلاق/حدیث: 20008]

حضرت ابن عباس رضی اللہ عنہما فرماتے ہیں کہ وہ اس دن سے عدت گزارے گی جس دن خاوند کا انتقال ہوا ہے۔ [مصنف ابن ابي شيبه/كتاب الطلاق/حدیث: 20009]

حضرت عبداللہ رضی اللہ عنہ فرماتے ہیں کہ عدت اس دن سے شمار ہوتی ہے جس دن خاوند کا انتقال ہو یا جس دن وہ طلاق دے۔ [مصنف ابن ابي شيبه/كتاب الطلاق/حدیث: 20010]

حضرت ابن عمر رضی اللہ عنہما فرماتے ہیں کہ عدت اس دن سے شمار ہوگی جس دن آدمی طلاق دے یا جس دن اس کا انتقال ہو۔ [مصنف ابن ابي شيبه/كتاب الطلاق/حدیث: 20011]

حضرت ابو قلابہ رحمہ اللہ، حضرت ابن سیرین رحمہ اللہ اور حضرت ابو عالیہ رحمہ اللہ فرماتے ہیں کہ عدت اس دن سے شمار ہوتی ہے جس دن خاوند کا انتقال ہو یا وہ طلاق دے۔ جس نے میراث میں سے کوئی چیز کھائی تو وہ اس کے حصہ میں سے شمار ہوگی۔ [مصنف ابن ابي شيبه/كتاب الطلاق/حدیث: 20012]

حضرت مسروق رحمہ اللہ فرماتے ہیں کہ جس عورت کا خاوند غائب ہو اس کی عدت اس دن سے شمار ہوتی ہے جس دن خاوند کا انتقال ہو یا جس دن وہ طلاق دے۔ [مصنف ابن ابي شيبه/كتاب الطلاق/حدیث: 20013]