محمد رحمہ اللہ فرماتے ہیں کہ اگر فوتیدگی یا طلاق کی گواہی قائم ہوجائے تو عورت اس دن سے عدت شروع کرے گی جس دن خاوند کا انتقال ہوا یا اس نے طلاق دی۔ [مصنف ابن ابي شيبه/كتاب الطلاق/حدیث: 20034]

حضرت سعید بن مسیب رحمہ اللہ اور حضرت شعبی رحمہ اللہ فرماتے ہیں کہ گواہی ہو تو عدت اس دن سے شروع ہوگی جس دن خاوند کا انتقال ہوا اور اگر گواہی نہ ہو تو اس دن سے جب اسے انتقال کی خبر ملی۔ [مصنف ابن ابي شيبه/كتاب الطلاق/حدیث: 20035]

حضرت مکحول رحمہ اللہ فرماتے ہیں کہ اگر کسی نے غائب ہونے کی حالت میں اپنی بیوی کو طلاق دے دی یا فوت ہوگیا تو اگر عادل گواہی قائم ہوجائے تو عورت اسی دن سے عدت گزارنا شروع کرے جس دن انتقال ہوا اور اگر عادل گواہی نہ ہو تو اس دن سے عدت گزارے جس دن اسے اطلاع ملی۔ [مصنف ابن ابي شيبه/كتاب الطلاق/حدیث: 20036]

حضرت جابر بن زید رحمہ اللہ فرماتے ہیں کہ جب گواہ گواہی دے دیں تو عورت اس دن سے عدت گزارے جس دن خاوند کا انتقال ہوا۔ [مصنف ابن ابي شيبه/كتاب الطلاق/حدیث: 20037]

حضرت عامر رحمہ اللہ فرماتے ہیں کہ غلام کا فرار ہونا طلاق نہیں ہے۔ [مصنف ابن ابي شيبه/كتاب الطلاق/حدیث: 20038]

حضرت قتادہ فرماتے ہیں کہ غلام کا فرار ہونا طلاق نہیں ہے۔ [مصنف ابن ابي شيبه/كتاب الطلاق/حدیث: 20039]

حضرت حسن رحمہ اللہ فرماتے ہیں کہ غلام کا فرار ہونا طلاق ہے۔ [مصنف ابن ابي شيبه/كتاب الطلاق/حدیث: 20040]

حضرت حوشب رحمہ اللہ فرماتے ہیں کہ حضرت حسن سے سوال کیا گیا کہ اگر شادی شدہ غلام فرار ہوجائے تو کیا حکم ہے؟ انہوں نے فرمایا کہ اگر وہ عدت پوری ہونے سے پہلے واپس آجائے تو وہ اسی کی بیوی ہوگی اور اگر عدت پوری ہوجائے تو وہ ایک طلاق کے ساتھ بائنہ ہوجائے گی۔ [مصنف ابن ابي شيبه/كتاب الطلاق/حدیث: 20041]

حضرت ابن عمر رضی اللہ عنہما کا معمول تھا کہ جب وہ ایسی طلاق دیتے جس میں رجوع کا حق باقی ہوتا تو اجازت طلب کیے بغیر بیوی کے پاس نہ جاتے۔ [مصنف ابن ابي شيبه/كتاب الطلاق/حدیث: 20042]

حضرت شعبی رحمہ اللہ فرماتے ہیں کہ ہمارے اصحاب فرمایا کرتے تھے کہ وہ اپنے جوتوں کی آواز سے اسے (اپنی آمد کی) اطلاع دے گا۔ [مصنف ابن ابي شيبه/كتاب الطلاق/حدیث: 20043]