حضرت ابراہیم رحمہ اللہ فرماتے ہیں کہ عورت کا نفقہ مرد پر اس وقت لازم ہوتا ہے جب عورت مطالبہ کرے۔ [مصنف ابن ابي شيبه/كتاب الطلاق/حدیث: 20144]

حضرت عامر رحمہ اللہ فرماتے ہیں کہ جب دوری کی وجہ عورت ہو تو وہ مرد پر نفقہ دیناواجب نہیں۔ [مصنف ابن ابي شيبه/كتاب الطلاق/حدیث: 20145]

حضرت شعبی رحمہ اللہ سے سوال کیا گیا کہ اگر کوئی عورت خاوند کی نافرمانی میں گھر سے نکلے تو کیا اسے نفقہ ملے گا؟ فرمایا کہ نہیں خواہ وہ بیس سال تک باہر رہے۔ [مصنف ابن ابي شيبه/كتاب الطلاق/حدیث: 20146]

حضرت شعبہ رحمہ اللہ فرماتے ہیں کہ میں نے حضرت حکم سے سوال کیا کہ اگر کوئی عورت خاوند کی نافرمانی میں گھر سے نکلے تو کیا اسے نفقہ ملے گا؟ انہوں نے فرمایا ہاں۔ [مصنف ابن ابي شيبه/كتاب الطلاق/حدیث: 20147]

(حضرت شعبہ فرماتے ہیں کہ) میں نے حضرت حماد سے سوال کیا تو انہوں نے فرمایا کہ اسے نفقہ نہیں ملے گا۔ [مصنف ابن ابي شيبه/كتاب الطلاق/حدیث: 20148]

حضرت ہارون رحمہ اللہ کہتے ہیں کہ میں نے حضرت حسن رحمہ اللہ سے سوال کیا کہ اگر کوئی عورت خاوند کی نافرمانی میں گھر سے نکلے تو کیا اسے نفقہ ملے گا؟ انہوں نے فرمایا کہ اسے مٹی کا بورا ملے گا۔ [مصنف ابن ابي شيبه/كتاب الطلاق/حدیث: 20149]

حضرت صالح رحمہ اللہ فرماتے ہیں کہ حضرت عبد الرحمن بن عوف رضی اللہ عنہ نے اپنی بیوی کو مرض الموت میں طلاق دی تو حضرت عثمان رضی اللہ عنہ نے انہیں عدت گزرنے کے بعد میراث میں حصہ دار بنایا۔ [مصنف ابن ابي شيبه/كتاب الطلاق/حدیث: 20150]

حضرت ابی بن کعب رضی اللہ عنہ فرماتے ہیں کہ اگر کوئی شخص اپنی بیوی کو مرض الموت میں طلاق دے تو وہ وارث ہوگی۔ اگرچہ اس کے بعد ایک سال گزر جائے۔ البتہ اگر آدمی پھر سے تندرست ہوگیا یا عورت کا انتقال ہوگیا تو پھر میراث نہیں ملے گی۔ [مصنف ابن ابي شيبه/كتاب الطلاق/حدیث: 20151]

حضرت ابن ابی ملیکہ رحمہ اللہ فرماتے ہیں کہ میں نے حضرت ابن زبیر رضی اللہ عنہ سے سوال کیا کہ اگر کوئی شخص مرض الموت میں اپنی بیوی کو تین طلاقیں دے دے تو کیا وہ اس کے مال میں وراثت کا حصہ پائے گی؟ انہوں نے فرمایا کہ حضرت عثمان نے اصبغ کی بیٹی کو میراث میں حصہ دلوایا تھا لیکن میرے خیال میں ایسی عورت وارث نہ ہوگی۔ [مصنف ابن ابي شيبه/كتاب الطلاق/حدیث: 20152]

حضرت خالد بن عبداللہ رحمہ اللہ نے حضرت حسن رحمہ اللہ سے سوال کیا کہ اگر کوئی شخص مرض الموت میں اپنی بیوی کو تین طلاقیں دے دے، پھر وہ ایسی حالت میں فوت ہو کہ عورت کی عدت گزر چکی ہو تو کیا وہ اس کے مال میں وراثت کا حصہ پائے گی؟ انہوں نے فرمایا کہ وہ وارث ہوگی۔ [مصنف ابن ابي شيبه/كتاب الطلاق/حدیث: 20153]