حضرت ابراہیم رحمہ اللہ فرماتے ہیں کہ عجمی شخص کا اپنی زبان میں طلاق دینا جائز ہے۔ [مصنف ابن ابي شيبه/كتاب الطلاق/حدیث: 19434]

حضرت سعید بن جبیر رحمہ اللہ فرماتے ہیں کہ فارسی میں طلاق دینے سے طلاق ہوجاتی ہے۔ [مصنف ابن ابي شيبه/كتاب الطلاق/حدیث: 19435]

حسن رحمہ اللہ فرماتے ہیں کہ اگر کسی آدمی نے اپنی بیوی کو ”بہشتم“ کہا تو اس پر طلاق لازم ہوجائے گی۔ [مصنف ابن ابي شيبه/كتاب الطلاق/حدیث: 19436]

حضرت ابراہیم رحمہ اللہ فرماتے ہیں کہ اگر ایک آدمی نے اپنی زبان میں بیوی کو ”بہشتم، بہشتم، بہشتم“ کہا تو طلاق ہوجائے گی۔ [مصنف ابن ابي شيبه/كتاب الطلاق/حدیث: 19437]

حضرت ابو قلابہ اور حضرت ابن سیرین d فرماتے ہیں کہ آدمی کے لئے بیوی کو خلع کا کہنا اس وقت تک حلال نہیں جب تک وہ اس کے پیٹ پر کسی دوسرے مرد کو نہ دیکھ لے، کیونکہ اللہ تعالیٰ فرماتے ہیں {إلاَّ أَنْ یَأْتِینَ بِفَاحِشَۃٍ مُبَیِّنَۃٍ }۔ [مصنف ابن ابي شيبه/كتاب الطلاق/حدیث: 19438]

ابراہیم رحمہ اللہ فرماتے ہیں کہ مرد کے لئے بیوی سے خلع کا فدیہ لینا درست نہیں، الا یہ کہ وہ اس کی اطاعت نہ کرے اور اس کی قسم کو پورا نہ کرے، پس اگر وہ ایسا کرے اور زیادتی عورت کی طرف سے ہو تو اس کے لئے فدیہ حلال ہے، اگر خاوند فدیہ قبول کرنے سے انکار کرے اور عورت اطاعت سے انکار کرے تو دونوں فیصلے کے لئے دو آدمی مقرر کریں ایک عورت کے گھر والوں سے ایک مرد کے گھر والوں سے۔ [مصنف ابن ابي شيبه/كتاب الطلاق/حدیث: 19439]

حضرت شعبی رحمہ اللہ فرماتے ہیں کہ اگر عورت اپنے خاوند کو ناپسند کرے تو آدمی اس سے فدیہ لے کر اسے چھوڑ دے۔ [مصنف ابن ابي شيبه/كتاب الطلاق/حدیث: 19440]

حضرت حمید بن عبد الرحمن حمیری رحمہ اللہ فرماتے ہیں کہ تمہارے لئے عورت سے خلع کرنا اس وقت اچھا ہے جب وہ کہے کہ میں نہ تو تمہارے لئے غسلِ جنابت کروں گی نہ تو تمہاری قسم پوری کروں گی اور نہ تمہارے حکم کی اطاعت کروں گی۔ [مصنف ابن ابي شيبه/كتاب الطلاق/حدیث: 19441]

حضرت علی رضی اللہ عنہ فرماتے ہیں کہ مرد کے لئے عورت سے اس وقت علیحدگی کرنا درست ہے جب عورت کہے کہ میں نہ تو تمہارے لئے غسلِ جنابت کروں گی، نہ تمہاری بات مانوں گی، نہ تمہاری قسم پوری کروں گی اور نہ کسی کا اکرام کروں گی۔ [مصنف ابن ابي شيبه/كتاب الطلاق/حدیث: 19442]

حضرت مقسم رحمہ اللہ فرماتے ہیں کہ جب وہ تمہیں تکلیف دے یا تمہاری نافرمانی کرے تو تمہارے لئے اس سے خلع کرنا درست ہے۔ [مصنف ابن ابي شيبه/كتاب الطلاق/حدیث: 19443]