حضرت عطاء فرماتے ہیں کہ جس نے ایک چھپکلی کو مارا اس کے سات گناہ معاف کر دئیے جائیں گے۔ [مصنف ابن ابي شيبه/كتاب الصيد/حدیث: 21075]

حضرت فاکہ بن مغیرہ کی مولاۃ حضرت سائبہ فرماتی ہیں کہ میں ایک مرتبہ حضرت عائشہ رضی اللہ عنہا کے کمرے میں ان کے پاس حاضر ہوئی تو وہاں ایک نیزہ پڑا تھا۔ میں نے پوچھا کہ اے ام المؤمنین! آپ اس نیزے کا کیا کریں گی؟ انہوں نے فرمایا کہ ہم اس سے چھپکلیوں کو قتل کریں گے۔ اللہ کے نبی صلی اللہ علیہ وسلم نے ہمیں بتایا ہے کہ جب خلیل اللہ حضرت ابراہیم (علیہ السلام) کو آگ میں ڈالا گیا تو زمین پر موجود ہر جانور آگ کو بجھا رہا تھا جبکہ چھپکلی آپ پر پھونکیں مار کر اسے اور زیادہ بھڑکا رہی تھی اس پر رسول اللہ صلی اللہ علیہ وسلم نے اسے مارنے کا حکم دیا۔ [مصنف ابن ابي شيبه/كتاب الصيد/حدیث: 21076]

حضرت ام سلمہ رضی اللہ عنہا چھپکلیوں کو مارنے کا حکم دیتی تھیں۔ [مصنف ابن ابي شيبه/كتاب الصيد/حدیث: 21077]

حضرت ابن عمر رضی اللہ عنہما فرماتے ہیں کہ چھپکلی کو حل اور حرم دونوں جگہ مار ڈالو۔ [مصنف ابن ابي شيبه/كتاب الصيد/حدیث: 21078]

حضرت ابو عمیس کے والد فرماتے ہیں کہ حضرت عائشہ رضی اللہ عنہا کے پاس ایک نیزہ تھا جس سے وہ چھپکلیوں کو مارتی تھیں۔ [مصنف ابن ابي شيبه/كتاب الصيد/حدیث: 21079]

حضرت مجاہد چھپکلیوں کو مارنے کا حکم دیتے تھے۔ [مصنف ابن ابي شيبه/كتاب الصيد/حدیث: 21080]

حضرت عبد اللہ رضی اللہ عنہ فرماتے ہیں کہ ہم رسول اللہ صلی اللہ علیہ وسلم کے ساتھ ایک غار میں تھے کہ یہ آیت نازل ہوئی { وَالْمُرْسَلاَتِ عُرْفًا } اس آیت کے نازل ہوتے ہی ہم نے اسے حضور صلی اللہ علیہ وسلم کے دہن مبارک سے تازہ تازہ حاصل کرلیا۔ اتنے میں ایک سانپ غار میں داخل ہوا تو رسول اللہ صلی اللہ علیہ وسلم نے فرمایا کہ اس کو مار ڈالو۔ ہم سانپ کو مارنے کے لیے بڑھے ہی تھے کہ وہ بھاگ گیا پھر آپ نے فرمایا کہ اللہ نے اسے تمہارے شر سے اور تمہیں اس کے شر سے بچا لیا۔ [مصنف ابن ابي شيبه/كتاب الصيد/حدیث: 21081]

حضرت عمر رضی اللہ عنہ فرماتے ہیں کہ سانپوں کو ہر حال میں مار ڈالو۔ [مصنف ابن ابي شيبه/كتاب الصيد/حدیث: 21082]

حضرت علی رضی اللہ عنہ دو دھاری والے سانپوں کو مارنے کا حکم دیا کرتے تھے۔ [مصنف ابن ابي شيبه/كتاب الصيد/حدیث: 21083]

حضرت عمر رضی اللہ عنہ فرماتے ہیں کہ اپنے گھروں کو صاف رکھو، حشرات کو ان میں پیدا نہ ہونے دو، انہیں ڈراؤ قبل اس کے کہ وہ تمہیں ڈرائیں کیونکہ مسلمان (جن) تمہارے سامنے ان کی شکل میں ظاہر نہ ہوگا۔ [مصنف ابن ابي شيبه/كتاب الصيد/حدیث: 21084]