حضرت ابن جریج کہتے ہیں کہ میں نے حضرت عطاء سے سوال کیا کہ اگر میں کسی مرغ یا بھیڑ کو تیر ماروں تو کیا آپ اسے کھائیں گے؟ انہوں نے فرمایا نہیں وہ تو مردار ہے۔ [مصنف ابن ابي شيبه/كتاب الصيد/حدیث: 21035]

حضرت طاوس اس سے منع فرمایا کرتے تھے۔ [مصنف ابن ابي شيبه/كتاب الصيد/حدیث: 21036]

حضرت ابن عمر رضی اللہ عنہما کچھ لوگوں کے پاس سے گذرے جو مرغی کو باندھ کر نشانہ بنا رہے تھے۔ آپ نے فرمایا کہ رسول اللہ صلی اللہ علیہ وسلم نے ان لوگوں پر لعنت کی ہے جو جانوروں پر نشانے بازی کریں۔ [مصنف ابن ابي شيبه/كتاب الصيد/حدیث: 21037]

حضرت ابو سعید رضی اللہ عنہ فرماتے ہیں کہ حضور صلی اللہ علیہ وسلم نے جانوروں پر نشانہ بازی کرنے سے منع فرمایا ہے۔ [مصنف ابن ابي شيبه/كتاب الصيد/حدیث: 21038]

حضرت ابن عباس رضی اللہ عنہما انصار کے کچھ لوگوں کے پاس سے گذرے جنہوں نے ایک کبوتری رکھی ہوئی تھی اور اسے تیر مار رہے تھے، آپ نے فرمایا کہ حضور صلی اللہ علیہ وسلم نے ذی روح کو نشانہ بازی کے لیے ہدف بنانے سے منع فرمایا ہے۔ [مصنف ابن ابي شيبه/كتاب الصيد/حدیث: 21039]

حضرت ہشام بن زید بن انس رحمہ اللہ فرماتے ہیں کہ میں حضرت انس رضی اللہ عنہ کے ساتھ دارالامارۃ میں داخل ہوا، وہاں کچھ لوگوں نے ایک مرغی کو باندھ رکھا تھا اور اسے نشانہ بنا رہے تھے، حضرت انس رضی اللہ عنہ نے فرمایا کہ حضور صلی اللہ علیہ وسلم نے اس بات سے منع فرمایا ہے کہ جانوروں کو باندھ کر انہیں نشانہ بنا کر مار دیا جائے۔ [مصنف ابن ابي شيبه/كتاب الصيد/حدیث: 21040]

حضرت ابو زبیر فرماتے ہیں کہ رسول اللہ صلی اللہ علیہ وسلم نے اس بات سے منع فرمایا ہے کہ جانور کو باندھ کر نشانہ بنا کر قتل کیا جائے۔ [مصنف ابن ابي شيبه/كتاب الصيد/حدیث: 21041]

حضرت ابو ایوب رضی اللہ عنہ فرماتے ہیں کہ میں نے رسول اللہ صلی اللہ علیہ وسلم کو سنا کہ آپ نے جانور کو باندھ کر نشانہ بنانے سے منع فرمایا۔ مجھے یہ بات پسند نہیں کہ میں ایک مرغی کو بھی اس طرح باندھ کر ہلاک کروں اور مجھے اس کے بدلے فلاں فلاں چیز مل جائے۔ [مصنف ابن ابي شيبه/كتاب الصيد/حدیث: 21042]

حضرت ابو ثعلبہ فرماتے ہیں کہ حضور صلی اللہ علیہ وسلم نے کچلی والے ہر جانور کو کھانے سے منع فرمایا۔ [مصنف ابن ابي شيبه/كتاب الصيد/حدیث: 21043]

حضرت ابو امامہ فرماتے ہیں کہ حضور صلی اللہ علیہ وسلم نے غزوہ خیبر میں کچلی والے جانور کو کھانے سے منع فرمایا۔ [مصنف ابن ابي شيبه/كتاب الصيد/حدیث: 21044]